Parlament

* Saýal salmaǵy

Atbasarǵa qarjy kerek

Senat otyrysynda depýtat Svetlana Jalmaǵambetova Premer-Mınıstr Kárim Másimovtiń atyna depýtattyq saýal joldady. Onda bylaı delingen: «Sizge sý tasqynynan zardap shekken Atbasar aýdany turǵyndarynyń problemalary boıynsha ótinish jasap otyrmyz. Sý basý jaǵdaılary bul óńirde buryn da bolǵan, alaıda, bıylǵy ahýal aýdan tarıhynda buryn bolmaǵan naǵyz tabıǵı apatqa aınalǵany belgili. Qysta túsken qalyń qardyń jáne klımattyń kúrt jylyp ketýinen Jabaı ózeni tasyp qana qoımaı, daladan eldi mekenderge topan sý keldi. Eldi mekenderge barlyǵy 460 mıllıon tekshe metr sý aǵyldy. Sonyń saldarynan Atbasar qalasy, Zarechnyı kenti, Borısovka, Pokrovka, Smırnovka, Sadovoe aýyldary tur­­­ǵyn­darynyń 500-den astam úıi sý astynda qaldy. 1,5 myńnan astam adam jyldar boıy jınap-tergen múlkinen aıyryldy, 18 kóshe buzyldy. Búgingi kúni zııandy baǵalaý jónindegi táýelsiz saraptama komıssııasy sý basqan aımaqtaǵy úılerdi qarap tekserdi. Biraz úı tolyq qıraǵan, kóptegen úı apatty jaǵdaıda, ıaǵnı turý úshin jaramsyz, asa kóp úı jóndeýdi, olardyń ishinde bir bóligi kúrdeli jóndeýdi qajet etedi. Memleket basshysyna,  Úkimetke sý tasqynynan zardap shekken aýdan halqyn qoldaǵandary úshin rızashylyǵymyzdy bildiremiz. Atbasarda mınıstr V.K.Bojko bastaǵan Tótenshe jaǵdaılar mınıstrligi kóp jumys istedi. Atbasarǵa birinshi vıse-premer B.Saǵyntaev kelip ketti, respýblıkalyq bıýdjetten bastapqy ýaqytqa 500 mln. teńge bólýge ýáde berildi. Turǵyndardy kóshirý, olarǵa mate­rıaldyq kómek kórsetý boıynsha oblys, aýdan basshylary aýqymdy jumystar atqarýda, qaıyrymdylyq qory ashyldy, Aqmola jáne basqa oblystar tur­ǵyn­darynan qarajat pen azyq-túlik kelip túsýde. Zardap shekken halyqqa 25 AEK mólsherinde bir jolǵy áleýmettik kómek tólenýde. Epıdemıologııalyq jaǵdaıdy turaqtandyrý jónindegi sharalar qoldanyldy. Sonymen qatar, sý basýdyń saldar­laryn joıý – keń aýqymdy jumys. Bul buzylǵan jáne avarııalyq úılerdiń ornyna jańa turǵyn úıler salý, zardap shekken, alaıda, jóndeýge keletin turǵyn úılerdi jóndeý, bul Atbasar qalasyndaǵy buzylǵan kóshelerdi rekonstrýksııalaý, mektepterdi jóndeý, bul zardap shekkenderge járdemaqylar tóleý. Júzdegen páter salý qajet bolyp otyr. Aldaǵy ýaqytta osyndaı apatqa jol bermeý úshin sý tasqynynan qorǵaý jóninde bóget salý, sý ótkizýge arnalǵan kópirlerdi jóndeý máselelerin jáne basqa da is-sharalardy qatar sheshý kerek. Qajetti jumystardyń aldyn ala quny 2,4 mlrd. teńgege baǵalanýda. Mamandar Atbasar qalasynyń únemi sý basatyn aýmaqtarynyń  turǵyndaryn keleshekte qaýipsiz jerlerge kóshirý oryndy bolady degen usynystar aıtýda. Úkimetke tabıǵı apatqa baılanysty problemalardy aıaǵyna deıin sheshýge jáne onyń saldarlaryn joıý úshin qajetti qarajat bólýge kómek kórsetý jóninde ótinish jasap otyrmyz». * Dáneker

 Toleranttylyqqa tárbıeleıdi

Qazaqstan halqy Assam­­­­­bleıa­sy tóraǵasynyń orynbasary, Parlament Senatynyń depýtaty Anatolıı Bashmakov pen aımaq basshysy Samat Eskendirov M.Qozybaev atyndaǵy Soltústik Qazaqstan memlekettik ýnı­ver­sıtetinde ótken áskerı sherýdi tamashalap, joǵary oqý ornynda jańadan tusaýy kesilgen Qazaqstan halqy Assambleıasy kafedrasynyń jumysymen ta­nysty. Onyń meńgerýshisi, tarıh ǵylymdarynyń kandıda­ty ­Lıýdmıla Grıvennaıa tole­ranttylyqqa, ulttyq birlikke tárbıeleıtin mundaı kafedra L.N.Gýmılev atyndaǵy Eýra­zııa­lyq ulttyq ýnıversı­teti­nen keıin ekinshi bolyp ashyl­ǵa­nyn, ǵylymı jobalar men baǵdarlamalarǵa qatysý jos­parlanyp otyrǵanyn tilge tıek etti. Osyndaǵy áskerı kafedrada bolashaq ofıserler daıarlanady. Qazir onyń qatarynda 200-ge jýyq stýdent bar. Ýnıversıtettiń bas ǵı­ma­ratynyń aldyndaǵy alańda Uly Otan soǵysynyń ardagerleri, áskerı kafedra sarbazdary, oqytýshylar men stýdentterdiń qatysýymen Otan qorǵaýshy jáne Jeńis kúnine arnalǵan merekelik sharada sóılegen Samat Saparbekuly Prezıdenttiń elimizdiń qorǵanys qabilettiligin nyǵaıtý máselesine udaıy nazar aýdaryp kele jatqanyn, bú­­ginde Otan qorǵaýshylar qata­­rynda Uly Otan soǵysy ar­da­gerleriniń nemereleri men shó­be­releri qyzmet etetinin jet­kizdi. Elimizge beıbitshilik syı­laǵan soǵys ardagerlerine degen rızashylyǵyn bildirdi. Jınalǵan qaýymdy mereıli merekelerimen Qazaqstan halqy Assambleıasy Tóraǵasynyń or­yn­basary Anatolıı Bashmakov, ýnıversıtettiń rektory Ońdasyn Áshimov, keshegi maıdanger Qa­sym Júnisov quttyqtady. О́mir ESQALI, «Egemen Qazaqstan». Soltústik Qazaqstan oblysy. * Saýaly men jaýaby

Sen salar da men salar...

О́tken jyldyń qarasha aıynda Premer-Mınıstrdiń orynbasary – Indýstrııa jáne jańa tehnologııalar mınıstri Áset Isekeshev Májiliste Qazaqstan Respýblıkasynyń ındýstrııalyq-ınnovasııalyq damýynyń 2015-2019 jyldarǵa arnalǵan tujyrymdamasynyń tusaýkeser rásimin jasady. Osy tusaýkeserde Májilis depýtaty Andreı Begeneev odan búgingi kúni elimizde jınalyp qalǵan 20 mlrd. tonna tehnogendik qaldyqtardy óńdeý boıynsha qandaı sharalar qarastyrylatyn bolady dep suraǵan edi. Bul suraqtyń týýy óte oryn­dy. О́ıtkeni, Prezıdent N.Na­zar­baev Mıneraldy resýrstar jáne metallýrgııa jónindegi ha­lyqaralyq kongreste tehnogendik qaldyqtardy ózindik shıkizat bazasy retinde qarastyrý kerek ekenin atap aıtqan bolatyn. Shynynda da, álemniń damyǵan elderiniń bárinde tehnogendik qaldyqtar qurylys materıaldaryn jáne basqa da ónimderdi jasaýǵa keńinen qoldanylady. Túrli esepteýlerge qaraǵanda, qaldyqtardyń 1 paıyzyn óńdep, paıdalaný – mıneraldy-shıkizatty keshenge salynatyn ınvestısııa kólemin 2 paıyzǵa tómendete alady eken. Máselen, beton jasaý úshin qoldanylatyn portlandsementtiń tapshylyǵyn eskere otyryp, esesine qaldyqtardan alynǵan metallýrgııalyq shlaktardy paı­dalansaq, sement shyǵynyn 30-40 paıyzǵa deıin azaıtýǵa bo­la­tyn kórinedi. Demek, qal­dyq­tar degenimiz, qoldyń astyn­da­ǵy qazyna. Alaıda, Áset Ise­ke­­shev bul suraqqa depýtatty qa­naǵattandyrarlyq jaýap aıta almaı, bul máselemen Qorshaǵan orta jáne sý resýrstary mınıstrligi aınalysatynyn kóldeneń tartqan. «Jazǵan qulda sharshaý joq» degendeı, ústimizdegi jyldyń basynda depýtat Andreı Begeneev endi óziniń suraǵyn atalǵan vedomstvonyń basshysy Nurlan Qapparovqa joldaǵan bolatyn. О́z saýalynda depýtat joǵaryda aıtylǵan dáıekterdi qaıtalaı otyryp, qoldanylmaǵan tehnogendik qaldyqtardyń kólemi jyldan-jylǵa ulǵaıyp, álemet jerdi alyp bara jatqanyn da aıtqan. Sizdiń mınıstrligińizde atalǵan qaldyqtardy qoldaný boıynsha baǵdarlama jasaldy ma, eger jasalǵan bolsa, onyń oryndalýy qalaı bolyp jatyr, dep suraǵan edi depýtat. Sol saýalǵa jaýap kelipti. Onda mınıstr Qazaqstannyń «Jasyl ekonomıkaǵa» ótý jó­nindegi sharalar josparyna sáıkes, ónerkásiptik qaldyqtardy basqarýdyń baǵdarlamasyn ázirleý jóninde usynys engizý qarastyrylǵanyn aıta kelip, onda kelesi máseleler qamtylatynyn kóldeneń tartypty: «-qaldyqtardyń naqty sanyn jáne polıgondardy ornalas­tyrý oryndarynyń jaı-kúıin kórsetý úshin qaldyqtardy jikteý qaǵıdalaryn pysyqtaý jáne olardy eýropalyq standarttarǵa sáıkes keltirý; - ónerkásiptik qaldyqtardy tógetin oryndarǵa aýdıt jasaý; - ónerkásiptik qaldyqtardy qaıta óńdeý ınfraqurylymdary men kásiporyndaryn qurý jó­nindegi josparlar (sonyń ishinde olardyń turaqty jumys isteýi úshin yntalandyrý sharalaryn engizý); - ekologııalyq tehnologııalar men úderisterdi engizý jónindegi josparlar». Kórip otyrǵanymyzdaı, qaldyqtardy óńdeý emes, sanaý, jikteý, «eýropalyq standarttarǵa keltirý», «qaldyqtar tógetin jerge aýdıt júrgizý», t.s.s. jumystar basym tur. Qaldyqtardy qaıta óńdeıtin ınfraqurylymdar men kásiporyndar qurý da usynys túrinde aıtylǵan. Eń bastysy, qajetti baǵdarlama áli jasalmaǵan. Al endi mınıstr N.Qapparov jaýabynyń sońǵy abzasyna nazar aýdaraıyq: «Sonymen qatar, Qazaqstan Respýblıkasy Úkimetiniń «Indýstrııa jáne jańa tehnologııalar mınıstrliginiń keıbir máseleleri» atty 26.11.2004 j., №1237 qaýlysynyń 16-tar­maǵyna sáıkes, taý-ken metal­lýrgııalyq keshenindegi tehno­gendik qaldyqtardy ıgerý máselesi Indýstrııa jáne jańa tehnologııa­lar mınıstrliginiń quzyretine berilgen». Mássaǵan, kerek bolsa! Mı­nıstrler qaldyqty óńdeý ju­mys­taryn bir-birine siltep otyr. Qysqasy, «sen salar da men salar, atqa jemdi kim salardyń» keri. Al 20 mlrd. tonna qaldyq odan ári kóbeıip, aspandap barady... Jaqsybaı SAMRAT, «Egemen Qazaqstan». * Áleýmettik qoldaý áleýeti

Múgedek jandarǵa múmkindik berdi

Sirá, jumyr basty pendeniń basty armanynyń biri – jumysqa turý, qyzmetine saı tabys taba bilý bolsa kerek. Eshkimge masyl bolmaı-aq, óz basyńdy, otbasyńdy asyraı bilgenge ne jetsin, shirkin! Árıne, shyn yqylas, nıet, taýdaı talap bolsa eki qolǵa bir kúrek tabý qıyn emes qoı. Alaıda, bul máselede múgedek jandardyń ájeptáýir daǵdaryp qalatyny bar. Mamandardyń zertteýine qara­ǵanda, múmkindigi shekteýli jandardyń tolyq jumyspen qamtylmaýynyń negizgi sebepteri mynada kórinedi. Eń aldymen, basshy adamdardyń kóbisiniń múgedek jandardy jumysqa qabyldaýǵa yntasy az. Al, aýylda turatyn múgedek jandar úshin jumys oryndary óte tapshy, tipti, múldem joq dese de bolady. Sondaı-aq, bul ǵa­rip jandar álde yńǵaısyzdanady, álde tórt múshesi saý adamdarmen jary­syp jumys isteı almaıtynyn ish­teı moıyndap, jasyp kete me, áı­te­ýir, olardyń kásip izdeýge degen yn­­­ta­synyń tómendigin de moıyn­daýy­­­myz qajet. Mine, Elbasy N.Na­zar­­baevtyń bıylǵy Joldaýy osynaý múgedek jandardyń jumyspen qam­tylý múmkindigin molaıtyp, ómir­leri­ne tyń serpin bergeni anyq. Qazirgi tańda Jambyl oblysynda 40 myńdaı múgedek jan  turady. О́tken jyly ýákiletti organdarǵa ótinish bergen 352 múgedektiń 86,4 paıyzy jumys oryndarymen qamtylypty. Árıne, bul jaman kórsetkish emes. Bıyl da bul is jalǵasyn tabýda. Sonyń ishinde oblys ortalyǵyndaǵy elektr shamdaryn shyǵaratyn «Enerdjı Taraz» JShS bul iske jaqsy qoldaý kórsetip júr. Jaqynda bul kásiporyn 10-ǵa jýyq múmkindigi shekteýli jandardy ju­mysqa qabyldady.  Negizi bul mekemege arnaıy kýrstardan ótken maman­dar ǵana keletin. Biraq, kásiporyn bas­shy­lyǵy nesibesin eńbekten izdegen osy­naý ǵarip jandarǵa úlken múmkin­dik berdi. Taǵdyrdyń jazýy shyǵar, Olga Kolpakova týmysynan mylqaý eken. Biraq tirlikke pysyq, ıkemdi Olga buǵan deıin tigin atelesinde jumys istepti. Alaıda, kóp uzamaı atele ja­bylyp, jas qyz jumyssyz qal­ǵan. Endi mine, elektr shamdaryn shy­­ǵaratyn kásiporynǵa jumysqa tur­­ǵan boı­­jetken bir aıdyń ishinde munda­­ǵy­larmen tez til tabysyp, tirli­gin dóń­geletip alyp ketti. Qazir ol qur­by­la­ry­men qatar otyryp, dıod sym­daryn jal­ǵaıdy. Kásiporyn basshylyǵy osynaý jandardyń tez úırenip ketýi úshin arnaıy sýrdoaýdarmashyny da ju­mysqa qabyldapty. Sonyń kóme­gi ar­qasynda Olgamen eptep tildes­tik. «Múgedektigime baılanysty járdem­aqy alamyn. Biraq eńbekpen tabylǵan nan tátti ǵoı. El sııaqty se­­niń de qo­lyńnan is keletinin, elge paı­dańnyń tıip jatqanyn seziný de bir baqyt», deıdi júzi bal-bul janǵan Olga. Al, osynda jumysqa turǵan jan­nyń biri Igor Lýtıaev bul kásibin tez meńgerip alǵanyn aıtyp aǵynan jarylýda. Kásiporynda múmkindigi shekteýli azamattarǵa barynsha qolaıly jaǵdaı jasalǵan. Tegin tamaq beriledi. Qyz­mettik kólik jumysqa aparyp, alyp qaıtady. Kásiporynnyń qamtamasyz etý bóliminiń basshysy Ramazan Baıazıtov jumysqa jańadan turǵan bul jandardyń tirlikke óte uqypty, jaýapty, eńbek etýge degen yqylastary zor ekenin aıtady. Mine, qaıraty men jigeri muqal­maǵan osynaý ǵarip jandar taǵdyrdyń qıyndyǵyna moıynusynbastan eldiń damýy men órkendeýine óz úlesterin osylaısha qosyp otyr. Oralhan DÁÝIT, «Egemen Qazaqstan». Jambyl oblysy. * Parlamentshi paıymy

Yntalandyrý – yqylas arttyrý amaly

Biz kúni keshe ǵana Otan qorǵaýshy kúnin atap óttik. Áskerı qyzmet adamzat ǵumyrynyń erekshe jáne asa mańyzdy túri bolyp tabylady. Tarıhtyń barsha kezeńderinde bizdiń otandastarymyz ómirin áskerı qyzmetke arnap, qoldaryna qarý alyp, elimizdi qorǵaýǵa daıyn turǵan. Elin súıý, Otanyn qorǵaý qashanda er jigittiń paryzy bolǵan. Sarbazdardyń jaýyngerlik eńbegi búgingi kúni de óz mańyzdylyǵyn joǵaltqan joq. Elimizde keıingi jyldary áskerı qyzmettegi naqty jaǵdaı túbegeıli ózgerdi. Osyǵan baılanysty, áskerı kadrlar qyzmetine ýájdemelik sıpatta kóńil bólýdi kúsheıtý qajettiligi týyndap otyr. Qorǵanys mınıstrligi, Ulttyq ulan, Ulttyq qaýip­sizdik komıtetiniń Shekara qyzmeti qatarynda qyzmet atqarý jastar úshin abyroıly mindet bolýy tıis desek, áskerı qyzmettiń bedelin arttyrýdyń yqpaldy túrleriniń biri sarbazdardy medaldarmen jáne erekshelik belgilerimen marapattaý bolyp tabylady. Búgingi kúni Qazaqstan Qa­rýly Kúshteriniń 40 paıy­zy ǵana merzimdi áskerı qyz­metshileri esebinen quralady. Al merzimdi qyzmet ýa­qyttyń bos ótkizilýimen baılanystyrylmas úshin, ony áskerı boryshty tabysty ótkizý sımvoldarymen, ıaǵnı vedomstvolyq medaldar jáne úzdiktilik belgilerimen marapattaý arqyly yntalandyrylýy tıis. Áskerdiń jáne áskerı qyzmettiń ja­ǵymdy mártebesin nasıhattaý maqsatynda, merzimdi qyzmetti óteıtinderdiń áskerden keýdesine medal men belgiler taǵyp qaıtýy óskeleń urpaqtyń aldynda áskerı qyzmettiń bedelin arttyrýmen qatar, óz Otanyna qyzmettik boryshyn atqarǵan azamattyń ózin-ózi baǵalaýyn kúsheıtýine zor yqpalyn tıgizedi. Sondyqtan, el aldyndaǵy jaýyngerlik paryzyn adal ótkergen azamattarymyz alǵysqa laıyq. Olarǵa qurmet arqyly jastardyń rýhyn kóteremiz. Elimizde vedomstvolyq nagradalar tizimine sáıkes, merzimdi áskerı qyzmettegi sarbazǵa tek tósbelgiler ǵana beriledi («Shekara qyzmetiniń úzdigi», «Qazaqstan Qarýly Kúshteriniń úzdigi», «Ishki áskerler qyzmetiniń úzdigi», «Úzdik qutqarýshy-jaýynger», «Sportshy-jaýynger»). Bul belgilerge tek sanaýlylary ǵana qol jetkize alady. Qazirgi naryqtyq ekonomıka kezeńinde merzimdi áskerı qyzmette bolýdyń ózi de erlik. Sondyqtan biz sarbazdarymyzdy tósbelgilerimen ǵana emes, medaldarmen marapattaǵanymyz jón. Al, medaldarǵa kelsek, 10 jyldan 20 jylǵa deıin min­siz qyzmet atqarǵany úshin berile­tin «Minsiz qyzmeti úshin» me­daline merzimdi qyzmet sarbazynyń qoly múlde jet­­peıdi. Eger, halyqaralyq tájirıbege júginsek, Reseı Federasııasynda merzimdi qyzmet soldat­taryn marapattaý júıesinde 40-tan astam vedomstvolyq medaldar men belgiler qaras­tyrylǵan, AQSh qarýly kúshterinde memlekettik nagradalarmen qatar, merzimdi qyzmet soldattary áskerı jáne áskerı emes jetistikteri úshin AQSh qorǵanys mınıstrliginiń birqatar vedomstvolyq medaldarymen marapattalady. Sonymen qatar, bul elderde merzimdi qyzmetin ótegen soldattarǵa joǵary bilim alýǵa memlekettik granttar qarastyrylady. Osyǵan baılanysty, jastardyń Otan aldyndaǵy azamattyq boryshy men ne­gizgi konstıtýsııalyq mindetin oryndaýǵa degen patrıottyq sezimin oıatyp, qulshynysyn arttyrý, merzimdi áskerı qyzmettiń bedelin kóterý maqsatynda Otan qorǵaýshy kúnine nemese áskerı qyz­mettiń aıaqtalýyna baılanysty mer­zimdi qyzmet sarbazdaryn marapattaýǵa arnap Qorǵanys mınıstrliginiń, Ulttyq ulan, Shekara qyzmeti áskeri­niń «Adal qyzmeti úshin» vedomstvolyq medalin tabys­taý jáne Otan aldyndaǵy mindetin úzdik atqarǵan sar­bazdarǵa memlekettik granttar arqyly joǵary bilim alý múmkindigi, taǵy da basqa áleýmettik qoldaýlar kórsetý múmkindigi qarastyrylsa, nur ústine nur bolmaq. Almas TURTAEV, Májilis depýtaty. *Jańa kitap

Búginnen – bolashaqqa!

Parlament Senatynyń depýtaty, tehnıka ǵylymdarynyń doktory Hýsaın Valıevtiń «Tórle, Máńgilik El» atty kitaby jaryq kórdi. Avtordyń bul kitabyna kúndelikti baspasóz betterinde, elektrondy buqaralyq aqparat quraldarynda jarııalanǵan maqalalary men suhbattary, álemdik deńgeıde ótken túrli forýmdar men konferensııalardyń alqaly jıyndarynda sóılegen sózderi toptastyrylǵan. Kitaptan senatordyń óz qolynan ótken zań jobalary men Úkimetke joldanǵan saýaldaryn da oqýǵa bolady. Hýsaın Hasenulynyń munan buryn Táýelsizdiktiń 20 jyl­dy­ǵyna arnap, «Prezıdent jáne álem» atty kitaby oqyrman qo­lyna tıgen edi. Senator jańa kita­bynda da Elbasy Nursultan Nazarbaevtyń eline sińirgen ólsheýsiz eńbegine sholý jasaı otyryp, onyń álemdik qoǵamdastyqta keńinen moıyndalǵanyn atap ótedi. Álemdik deńgeıdegi saıasat­kerdiń jahandyq bastamalary týraly áńgimeleıdi. Elbasynyń jahandyq ekologııalyq ener­gııa­nyń qoǵamdy turaqty damytýdaǵy jáne «Jasyl ekonomıka» baǵdarlamasy, «G-global» bastamasy», «Daǵdarystyń kilti» baǵdarlamalyq maqala­sy, bolashaqta ótkiziletin «Keleshek­tiń energııasy» aıasyndaǵy EKSPO-2017, «Qazaqstan-2050» Stra­tegııasy syndy qundy eńbekteri tek Qazaqstandy damytýda ǵana emes, adamzat aldyndaǵy álemdik problemalardy sheshýde mańyzdy oryn alady. Al munyń barlyǵynan memlekettik, bilim salasy qyzmetkerleriniń, bıznes ókilderiniń, jalpy jastardyń jáne jurtshylyqtyń alary mol. Avtor kitabynyń alǵysózinde osy shyǵarmasynyń atyna toqtalyp ótedi. «Tórle» sóziniń maǵynasyn taratyp aıtar bolsaq, «qurmetti orynǵa shyǵyńyz» degen iltıpatty bildiredi. Mundaı mártebeli orynǵa elimizdiń ejelden kele jatqan ulttyq ataýyn ıemdengen «Qazaqstan memleketi» árdaıym laıyqty ekeni sózsiz», deı kelip, «Kitaptyń «Tórle, Máńgilik El» dep atalýy barlyq Qazaqstan halqynyń jáne onyń kóp ǵasyrlyq tarıhynyń jıyntyq beınesin berip tur», dep oı túıindeıdi. Názıra JÁRIMBETOVA, «Egemen Qazaqstan». Qostanaı.