Oblystyq «Syr boıy» gazetiniń tilshisi, áriptesimiz Gúlbaný Maqajan sol bozbalany izdep taýypty. Tereń qudyqqa qoryqpaı qoıyp ketken batyr 15 jastaǵy Arman Amanjol bolyp shyqty. Aral aýdany Bógen aýylynan oblys ortalyǵyndaǵy kolledjderdiń birine qujat tapsyrýǵa kelipti. Ákesi Jańalyq jumyssyz, anasy Maıra mektep ashanasynda isteıdi. Aldynda eki ápkesi, eki aǵasy bar Arman úıdiń kenjesi eken.
«Bári aıaq astynan boldy. Anasy men onyń aldyna túsip alyp, quldyrańdap sábı sál ilgeri ketip bara jatqan. Kenet anasynyń jan daýysy shyqty. Qaqpaǵy ashyq qudyqty kórgende-aq bir oqys oqıǵanyń bolǵanyn bile qoıdym. Oılanbastan qudyqqa tústim. Balany qolyma alǵan sátte jetip kelgen bir aǵaǵa tapsyrdym. Artynsha meni de sol kisi shyǵaryp aldy», deıdi ol.
M.Yqsanov atyndaǵy Qyzylorda polıtehnıkalyq kolledjine qujattaryn ótkizgen Arman bolashaqta elektrık bolǵysy keledi. Uıańdaý bozbala erliginiń jalpaq jurtqa aıan bolyp ketkenine qysylatyn sekildi. «Meniń ornymda kez kelgen adam osyny jasar edi ǵoı» deıdi kúlimsirep. Oqıǵadan habardar bolǵandar Armanǵa habarlasyp, alǵys aıtyp jatyr eken. Arnaıy shaqyrtyp, keıbir is-sharalarǵa qatystyrǵysy keletinder de bar kórinedi. «Syr medıa» JShS ǵımaratynda aty-jónin atamaýdy ótingen bir zamandasymyz erlik kórsetken bozbalaǵa qarjylaı syı tabys etti.
Qınalǵanǵa qaıyrym kórsetip, qalǵyp bara jatqan qoǵamdy bir silkip alatyn osy Armandaı aınalaıyndar ǵoı...
Qyzylorda
