Jaqsydan qalǵan sóz

Qazaq ǵylymynyń aıtýly ókili, Ál-Farabı babamyzdy atajurtyna oraltqan Aqjan ál-Mashanıdiń ǵylymı murasyn qamtyǵan jınaq taıaýda jaryq kórdi. Oǵan uıytqy bolǵan – kórnekti oqymystynyń kelini Zada Dúısenbaeva. Kitapqa ǵulamanyń qazaq ǵylymyna qosqan úlesi, Ál-Farabı men Abaıdy ushtastyra zert­te­gen zer­deli eńbekteri, qazaq ın­tel­lıgensııasyn qalyp­tas­tyrý baǵytyndaǵy izdenisteri, ulttyq geologııa, sonyń ishin­de buryn atalmaı kelgen mar­ksheıderlik is, ózge de ta­qyryptar boıynsha zert­teýshilerdiń dúnıeleri top­tastyrylyp otyr eken. Shynynda, ál-Mashanı qazaq jurtynan shyqqan aıtýly tulǵa edi. Ol Qanysh Sátbaev irgetasyn quıyp, keregesin qalap, shańyraǵyn kótergen Ulttyq ǵylym akademııasyn qurǵandardyń qatarynda boldy. Tuńǵysh ret Ál-Farabı týraly oı aıtyp, Otanyna oraltty. Qazaq tiliniń janashyry bolyp, qazaq synyptaryn ashýǵa jasy kelip qalǵan kezdiń ózinde belsene atsalysyp, «Tiliń bolmasa Ál-Farabı, Abaı kimge kerek. Qazaq jurty sóz qadirin bilgen, sózge toqtaǵan, eki sóılemegen, aıtqanynda turǵan, meńzegenin oryn­datqan», dep babalar sal­tyn sanańa sýdaı sepken. Endi, mine, sol alyp qazaq­tyń ómir jolyn, ónegeli jo­lyn qamtyǵan eńbektiń tusaý­keser rásiminde belgili ǵalym­dar: mirjaqyptaný­shy, tarıh ǵylymdarynyń doktory, elordadaǵy Ulttyq muraǵatynyń bas dırektory Marat Ábsemetov, professor Dıqan Qamzabekuly, qoǵam qaıratkeri Jeken Qalıev, ózge de zııaly qaýym ókilderi sóz alyp, ál-Mashanı týraly estelikter aıtty. Oı órbitkender endigi jerde ál-Mashanı atyn Otanymyzdyń óńirlerinde jańǵyrtyp kóshege, mektepke berse degen tilekterin de alǵa tartty. Shynynda, geologııa-mınerologııa ǵy­­­­lymy men ult rýhanııatyn tarazynyń basyndaı teń ustap, halyqtyq úlgini, tirek bolar tildi keıingi jasqa syryn ońdyrmaı, synyn ketirmeı jetkizsem dep ómir boıy eńbek etken ǵalymǵa qandaı qurmet kórsetsek te jarasary sózsiz. Súleımen MÁMET, «Egemen Qazaqstan».