Endi Jánibek Álimhanulyna álem chempıony ataný úshin esh kedergi joq. Birer jyl boıy osy salmaqtyń teńdessizi bolyp kelgen Andrade qazaqtyń qaısar ulymen judyryqtasýdan bas tartty. Rasynda da, onyń óte myqty boksshy ekenine esh kúmán joq. 34 jastaǵy Rod-Aılend shtatynyń týmasy áýesqoılar arasynda da tolaǵaı tabystarǵa qol jetkizgenin dúıim jurt jaqsy biledi. Ol 2007 jyly Chıkagoda ótken álem chempıonatynda qarsylas shaq keltirmeı, bas júldeni oljalasa, Rıo-de-Janeırodaǵy Panamerıka oıyndarynda kúmis medaldy moınynda jarqyratty. Basqa da kóptegen halyqaralyq jarysta oljaǵa keneldi.
2008 jyly Rıo Olımpıadasynyń shırek fınalynda súringennen keıin Demetrıýs kásipqoı rıngte kúsh synasýdy qup kórdi. Sol aralyqta 31 kezdesý ótkizip, barlyǵynda jeńiske jetti. 19 qarsylasyn nokaýtqa jiberdi. Túrli salmaq dárejesi boıynsha chempıondyq belbeýdi ıelengen AQSh-tyń arlany kezinde Freddı Ernandes (Meksıka), Vanes Martırosıan, Braıan Roýz (AQSh), Djek Kýlkaı (Germanııa), Ýolter Kaýtondokva (Namıbııa) jáne taǵy basqa ataqty boksshylardy oısyrata utty. Sońǵy ret ol byltyrǵy jyldyń qarasha aıynda ırlandııalyq Djeıson Kýıglıdi ekinshi raýndta uryp jyqty. Biraq Jánibekten qaımyqty ma, álde basqa josparlary boldy ma, áıteýir altyn belbeýden bas tartyp, shuǵyl túrde basqa salmaqqa aýysty.
Bul kúnderi «ýaqytsha» chempıon ataǵyn ıelenip otyrǵan Jánibek Álimhanulynyń júrip ótken joly qazaq jankúıerleriniń kóz aldynda. Murat Sıqymbaevtyń qol astynda jattyqqan ol áýesqoılar arasynda álem jáne qurlyq chempıony, Azııa oıyndarynyń jeńimpazy atandy. 29 jastaǵy Almaty oblysy, Alakól aýdany Jylandy aýylynyń týmasy 2016 jyldan beri kásipqoı rıngte baq synaýda. Sol aralyqta 12 ret sharshy alańǵa shyǵyp, barlyq qarsylasyn sypyra utty. Segiz jekpe-jekti merziminen buryn aıaqtady. Bir sózben aıtsaq, Qazaq Style degen búrkenshik esimdi tańdaǵan qandasymyzdyń tolyqqandy álem chempıony atanýyna esh kedergi joq. Qazirgi kezde barsha Alash jurty WBO-nyń resmı sheshimin kútip otyr. Eger atalǵan uıym basshylyǵy aldaǵy ýaqytta ońdy sheshim qabyldap, altyn belbeýdi Jánibekke tabys etse, onda ol Qazaqstannan shyqqan besinshi álem chempıony atanady.
