Respýblıkalyq forým jas muǵalimderdiń biliktiligin arttyrýǵa arnalǵan NIS-tiń aýqymdy jobasyn jalǵastyryp, elorda, О́skemen, Qaraǵandy, Almaty, Pavlodar jáne Qostanaıda birqatar keıs-sessııa uıymdastyrdy.
– Tehnologııa men ekonomıkanyń qarqyndy damýy bilim salasyna qýatty serpin beredi. Búgingi tańda muǵalimderdiń zaman talabyna saı bolýy mańyzdy. Muǵalim – suranysqa ıe mamandyq, sondyqtan onyń damý traektorııasy jeke, biraq árqashan álemdik bilim berý úrdisine saı bolýy kerek, – dedi uıymnyń basqarma tóraıymy Kúlásh Shámshıdınova.
TEDTalk-te óz kásibinde tabysqa jetken azamattar tájirıbelerimen bólisti. Máselen, Bilim Media Group elektrondy bilim berý kompanııasynyń dırektory Raýan Kenjehanuly bilim berý júıesinde jumys isteý – ómirlik tańdaýy, muǵalim – ár adam úshin ata-anadan keıingi tulǵa, al mektep – eldegi eń mańyzdy ınstıtýt ekenin jetkizdi. Belgili teleradıo júrgizýshisi, aktrısa Maıra Tólepbergen, tanymal akter Asqar Ilııasov ózderiniń muǵalimder otbasynda óskenin maqtanyshpen áńgimelese, «Assambleıa jastary» respýblıkalyq uıymynyń tóraǵasy Tımýr Jumyrbaev jas pedagogter qaýymdastyǵy olardyń áleýetin keńeıtýge kásibı alań bolatynyn atap ótti. О́ıtkeni elimizde jas pedagogtermen tikeleı jumys isteıtin, ozyq tájirıbelermen almasýǵa kómektesetin uıym joqtyń qasy. Jas oqytýshylar qataryndaǵy ulybrıtanııalyq áriptes, Kembrıdj ýnıversıtetiniń bilim berý fakýltetiniń ókili Eleın Ýılson bilimdi udaıy jetildirýdiń mańyzyna toqtaldy.
Forým aıasynda qatysýshylar Oqý-aǵartý mınıstri Ashat Aımaǵambetovpen kezdesti. Jas ustazdar elektrondy bilim berý júıelerindegi aqparattyq ıntegrasııaǵa, aýyldaǵy ınternet jyldamdyǵynyń tómendigine, mektepterge arnalǵan serverler men platformalardaǵy máselelerge vedomstvo basshysynyń nazaryn aýdardy.
Jeke sheberlik sabaqtar ótkizgen jas mamandar sabaqty uıymdastyrý jáne jeke kásibı damýda óte ózekti sanalatyn sıfrly muǵalim, sabaq forsaıty, pedagogıkalyq angajement, dıfferensııa jáne oqytýdaǵy laıfhaktar sııaqty kreatıvti keısterimen tańǵaldyrdy. Aıtalyq, Qostanaı oblysynan kelgen tarıh pániniń muǵalimi Damır Sultanov sabaqty josparlaýda YouTube pen Google-daǵy bilim jetkiliksiz bolǵan soń gıdterdi daıyndaý jáne sıfrlandyrý boıynsha túrli kýrsqa qatysý arqyly Meńdiqara aýdany boıynsha avtorlyq týrıstik baǵdarlamany qurastyrǵanyn áńgimeledi. Al Rýdnyı qalasynyń №1 orta mektebiniń qazaq tili men ádebıeti pániniń muǵalimi Gúldana Buharbaeva pedagogıkalyq angajement sheberlik sabaǵynda bilim ordasynda qurylǵan teatr jaıynda baıandap, kreatıvti tásilder qazaq tilinde sóıleý daǵdylaryn damytyp, pánge degen qyzyǵýshylyqty arttyratynyn aıtty. Almatylyq matematıka pániniń muǵalimi Temirbek Saǵyndyqovtyń sózine qaraǵanda, búgingi tańda ár muǵalimniń sıfrly bolýy qajettilikke aınaldy. Tik-Tok-ta 14 myń jazylýshyny esepterdi tez sheshýge úıretken jáne balalardyń matematıkaǵa degen qyzyǵýshylyǵyna qoldaý kórsetip júrgen Temirbektiń úlgisi jas muǵalimderdiń shabytyna qozǵaý salǵany anyq. Forýmǵa Qostanaı oblysynan kelgen Botagóz Maqatova bıologııa sabaǵyna sıfrly tehnologııany engizý úshin sabaqty STEAM zerthanasynda ótkizýdi qolǵa alǵanyn, oǵan Mozaik Web baǵdarlamasyn tańdap, ROQET ınteraktıvti panelin qoldanǵanyn jetkizdi. Al pavlodarlyq Áset Serikbaev birneshe jyl buryn qolyna AQSh Konstıtýsııasy túskenin, sol kezden bastap memlekettik qurylysqa qyzyǵýshylyq tanyta bastaǵanyn, keıin Qazaqstan Konstıtýsııasyna qosymsha jasaýdy uıǵarǵanyn áńgimeledi. Bıyl maýsym aıynda Áset qazir suranysqa ıe «PRO100 Konstıtýsııa» jobasyna patent aldy. Qaraǵandylyq Oleg Tıo men Erjan Akıjanov oqýshylardyń sabaqqa qyzyǵýshylyǵyn oıatý tájirıbelerimen bólisti. Erjan jeke bilim berý baǵyttaryn ázirlep, qosymshalardy ilkimdi paıdalanýdy alǵa tartty. Wooclap aýqymdy aýdıtorııamen jumys isteý kezinde tıimdi bolsa, Formative baǵdarlamasy qalyptastyrýshy jáne jıyntyq baǵalaýdy júrgizýge kómektesedi. Oleg «tóńkerilgen synyptyń» negizgi qaǵıdalaryn túsindirip, sandyq ádisterdiń, atap aıtqanda, ISpiring Learn, Anchor fm qosymshalarynyń oqýshylarmen sátti yntymaqtastyq qurýdaǵy mańyzyn jetkizdi. О́skemendik Alena Rahımova toptyq jumysta oqýshyny baǵalaý árdaıym qıyn ekenin, obektıvtilik balanyń oqýǵa degen qyzyǵýshylyǵyn saqtaıtynyn erekshe atap ótti. Shyǵys Qazaqstan oblysy Ulan aýdanynyń aǵylshyn tili pániniń muǵalimi Ádil Anarbekov baǵalaý kezinde balanyń psıhologııalyq jaı-kúıi sheshýshi mánge ıe ekenin, shákirt pen ustaz arasyndaǵy altyn kópir – senim, súıispenshilik pen úmitten quralatynyn aıtty.
Pedagogıkalyq sheberlik ortalyǵynyń dırektory Janbota Qabdyqárimova online.cpm.kz platformasynda jumys isteıtin «Jas muǵalim mektebi» ashyq onlaın kýrsy ázirlengenin, jańa resýrs túrli baǵyttaǵy oqý materıaldaryn biriktirgenin atap ótti. Sondaı-aq ár óńirde «Jasampaz jas ustaz» jas muǵalimder klýby quryldy, «Shamshyraq» onlaın platformasy aýyl mektepterinen kelgen úzdik jas muǵalimderdiń tájirıbesi týraly beınematerıaldar jarııalaýdy bastady.
Jahandyq bilim berý komıssııasynyń Azııa hab komıssary, «Nazarbaev zııatkerlik mektepteri» DBBU Basqarma tóraıymy Kúlásh Shámshıdınova ár delegatqa úmit artatynyn jáne otandyq bilimniń básekege qabiletti ári tabysty bolatynyna senim bildirdi.
