Aýyl sharýashylyǵy basqarmasynyń basshysy Asqar Sanaýbarov jyl basynan beri oblysta 3 494 ga jyrtýǵa jaramdy jer paıdalanýǵa berilgenin aıtady. Munymen qatar sharýashylyqtardyń sany da artyp keledi. Mysaly, bıyl qatarǵa jańadan 6 aýylsharýashylyq qurylymy qosylǵan. Bular negizinen dándi daqyldar, kartop, kókónis, maıly jáne jemshóp daqyldaryn ósirýmen aınalysady.
Qazirgi tańda memleket daqyldardyń ónimdiligin eki-úsh esege arttyratyn sýarmaly eginshilikpen shuǵyldanatyn kásipkerlerge barynsha kómektesip otyr. Naqty aıtqanda, jabdyqtardy satyp alýǵa jáne sýarmaly sýdy jetkizýge sýbsıdııalar bóledi. Mysaly, bıyldyń ózinde aýyl sharýashylyǵy taýarlaryn óndirýshilerge sý berý qyzmetine arnap 206,1 mln teńge qarastyrǵan.
Oblystyń Buqar jyraý aýdanyndaǵy «Baımyrza-Agro 2018» JShS-nyń dırektory Maksım Býkaemskıı jańbyrlatyp sýarý tehnıkasy men tyńaıtqyshtardy satyp alýǵa bólingen sýbsıdııanyń der kezinde kórsetilgen zor kómek ekenin rızashylyqpen aıtady.
– Bizde josparly keńeıtý júrip jatyr. Jyl saıyn shashyratqysh mashınalar satyp alamyz. Basynda mundaı eki mashına tek kartop úshin ǵana boldy. Al qazir sýarmaly júıe dándi daqyldar alqabynda da bar, – deıdi ol.
Negizinde «Baımyrza-Agro 2018» JShS áý bastan sýarmaly eginshilikpen aınalysý maqsatynda qurylǵan edi. Kásiporyn 2018 jyldyń kúzinde sýarý júıesi, syrtqy elektrmen jabdyqtaý, sýarý qubyry, sýarý tehnıkasyn satyp alyp, birneshe jobany birden bastap ketken bolatyn.
Qazir «Baımyrza-Agro 2018» sharýashylyǵynda 25 adam turaqty jumys istep, nápaqasyn taýyp júr. Budan bólek, jumysshy sany maýsym kezinde 70-ke deıin jetedi. Búginde Maksım Býkaemskıı sýarmaly egistik salasynyń asa bilgir mamanyna aınalǵan. Ol bul isti bastaǵan alǵashqy jyldary kartop egip, sharýashylyqta aınalmaly áreket etetin jańbyrlatqysh mashınalardy qoldanǵan.
– Qondyrǵylar daqyldardyń barlyq túrin sýarady jáne sýarýdyń birkelkiligin qamtamasyz etetin arnaıy saptamalary bar. Sý elektr sorǵylary bar betondalǵan avankameralardan alynady. Ol jabyq qubyrlar arqyly ótetindikten, shyǵyny meılinshe az bolady. Qazir bizde alty búrikkish bar. Kelesi jyly taǵy ekeýin satyp alamyz. Sýarmaly egistik alqabyn 600 gektarǵa deıin ulǵaıtqymyz keledi, – deıdi bolashaqqa senimmen qaraǵan kásiporyn basshysy.
Iá, sońǵy jyldary Maksım Býkaemskıı jetekshilik etetin sharýashylyqta egis alqaptary keńeıip keledi. Mysaly, 2022 jyly taǵy 126 gektar sýarmaly jer qosylyp, qazirgi ýaqytta 266 gektarǵa kartop, 70 gektarǵa bıdaı, 50 gektarǵa burshaq, 90 gektarǵa arpa, 210 gektarǵa dándi, burshaq jáne maıly daqyldar tuqymy sińirilgen. Sharýashylyq elıtalyq tuqym túrlerin Reseı men Germanııanyń jáne ózimizdegi mamandandyrylǵan sharýashylyqtardan satyp alady.
Sýarmaly eginshilik túrlerin damytý búgingi kúnniń talaby bolyp tur. Onyń ústine bul iske memlekettiń oń kózben qarap, barynsha qoldaý kórsetip otyrǵany da senimdi kúsheıte túsedi. Olaı bolsa, bul iske bilek sybana kirisken sharýanyń tasy órge domalamaı qoımas dep senimmen aıtýǵa bolady.
Qaraǵandy oblysy
