Sýretti túsirgen A.Dúısenbaev
Strategııalyq seriktestiktiń jańa deńgeıi
Resmı sapar barysynda Memleket basshysy Qasym-Jomart Toqaev Ilham Álıevpen kezdesip, Ázerbaıjan Prezıdentiniń «Zagýlba» rezıdensııasynda Memleket basshysyn saltanatty resmı qarsy alý is-sharasy ótti.
Qurmet Qaraýylynyń bastyǵy eki el basshylaryna raport berip, Qazaqstan men Ázerbaıjannyń ánurandary oryndalǵannan keıin Qasym-Jomart Toqaev pen Ilham Álıev bir-birine resmı delegasııalardyń quramyn tanystyrdy. Saltanatty rásimnen soń eki el prezıdentteri kelissóz júrgizdi.
Qazaqstan Prezıdenti Ázerbaıjan Respýblıkasyna resmı saparmen kelýge shaqyrǵany úshin Ilham Álıevke alǵys aıtty.
– Eń aldymen bizge kórsetken qonaqjaılyǵyńyz úshin sizge rızashylyǵymdy bildiremin. Bul – Qazaqstan Prezıdenti retinde alǵash ret resmı saparmen kelýim. Bul sapardyń men úshin mán-mańyzy aıryqsha. Búgin birqatar óte ózekti másele týraly pikir almasýlar bolady. Kelissózder nátıjesinde birqatar qujatqa qol qoıylmaq. Ol ekijaqty yntymaqtastyqty, qazaq-ázerbaıjan qarym-qatynasyn jańa deńgeıge kóteredi dep senemin, – dedi Qasym-Jomart Toqaev.
Ilham Álıev óziniń shaqyrýyn qabyl alyp, Ázerbaıjanǵa resmı saparmen kelgeni úshin Qasym-Jomart Toqaevqa rızashylyǵyn bildirip, Qazaqstan Prezıdentiniń Bakýge kelýi eki el arasyndaǵy yntymaqtastyqqa tyń serpin beretinin atap ótti.
Jeke kelissózden keıin Qasym-Jomart Toqaev qazaq-ázerbaıjan qarym-qatynastaryna qosqan zor úlesi úshin Ilham Álıevti Qazaqstan Respýblıkasynyń joǵary memlekettik nagradasy «Altyn Qyran» ordenimen marapattady. Bul marapat Ilham Álıevke eki el arasyndaǵy dostyq pen yntymaqtastyqty nyǵaıtýǵa zor úles qosqany úshin tabys etildi.
Qazaqstan Prezıdentiniń Ázerbaıjanǵa resmı saparynyń baǵdarlamasy memleketter basshylarynyń keńeıtilgen qurammen ótken kelissózimen jalǵasty.
Qasym-Jomart Toqaev pen Ilham Álıev qazaq-ázerbaıjan strategııalyq seriktestiginiń negizgi máselelerin talqylap, saıası, saýda-ekonomıkalyq, kólik-tranzıttik jáne mádenı-gýmanıtarlyq yntymaqtastyqty nyǵaıtýǵa erekshe nazar aýdardy.
Qazaqstan Prezıdenti Bakýge shaqyrǵany jáne kórsetilgen qonaqjaılylyq úshin taǵy da rızashylyǵyn bildirdi.
– Men shaǵyn quramdaǵy kezdesýge óte rızamyn, onda biz memleketterimizdiń ózara is-áreketiniń barlyq máseleleri men ártúrli salalary týraly jan-jaqty pikir almastyq. Qazaqstan men Ázerbaıjan – jaqyn memleketter, biz strategııalyq seriktespiz jáne odaqtaspyz. Búgin elderimiz arasyndaǵy strategııalyq qatynastardy nyǵaıtý jáne odaqtastyq ózara is-qımyldy tereńdetý týraly Deklarasııaǵa qol qoıylady, – dedi Memleket basshysy.
Qasym-Jomart Toqaev Ázerbaıjanǵa ekijaqty yntymaqtastyqty jańa deńgeıge shyǵarý úshin arnaıy mıssııamen kelgenin aıtty. Qazaqstan Prezıdenti ekijaqty saýda-ekonomıkalyq baılanystardy damytý máselelerine egjeı-tegjeı toqtaldy.
– Keıingi jyldary taýar aınalymynyń aıtarlyqtaı, úsh esege jýyq óskenine qýanyshtymyn. Biraq bul, árıne, jaıbaraqat júrýge negiz emes ekenin atap ótkim keledi. Saýdany arttyrýǵa múmkindikter bar dep esepteımin. Bizdiń úkimetterimiz jaqyn arada elderimiz arasyndaǵy taýar aınalymyn 1 mıllıard dollarǵa deıin ulǵaıtý úshin jumys isteýi kerek, – dedi Memleket basshysy.
Sondaı-aq Qazaqstan Prezıdenti gýmanıtarlyq yntymaqtastyqty damytýdyń qolaıly perspektıvalaryna nazar aýdardy.
– Meniń oıymsha, kelesi jyly eki el úkimetteri arasyndaǵy kelisim boıynsha biz Qazaqstanda Ázerbaıjan mádenıetiniń onkúndigin ótkize alamyz. Sizdiń elińizdiń mádenıetine úlken qyzyǵýshylyq bar. Biz ázerbaıjan mádenıetiniń kórnekti ókilderin óz elimizde úlken iltıpatpen qabyldaımyz, – dedi Qasym-Jomart Toqaev.
Ilham Álıev Qazaqstan Prezıdentine Ázerbaıjanǵa kelýge shaqyrýdy qabyl alǵany úshin alǵys aıtty.
– Qurmetti Qasym-Jomart Kemeluly, men sizdi taǵy da shyn júrekten qarsy alyp, qosh keldińiz degim keledi. Shaqyrýdy qabyl alyp, bizge resmı saparmen kelgenińiz úshin alǵysymdy bildiremin. Bul sapar bizdiń qarym-qatynasymyzdyń damýynyń bolashaǵy úshin úlken mańyzǵa ıe bolatynyna senimdimin. Eń aldymen, meni Qazaqstan Respýblıkasynyń eń joǵary «Altyn Qyran» ordenimen marapattaǵanyńyz úshin resmı delegasııanyń aldynda sizge taǵy da alǵys aıtamyn. Bul syılyqty qabyl alý men úshin úlken mártebe. Men muny bizdiń halyqtarymyzdyń dostyǵy men baýyrlastyǵynyń dáleli jáne Ázerbaıjannyń qarym-qatynasymyzdy nyǵaıtý baǵytynda jasap jatqan jumystaryna berilgen joǵary baǵa dep bilemin. Sondaı-aq Qazaqstannyń Ázerbaıjanǵa syılyǵy – azat etilgen aýmaqtarda salynatyn balalardyń shyǵarmashylyq damý ortalyǵynyń tusaýkeseri ótti. Bul halqymyzǵa degen baýyrmaldyq kózqarastyń taǵy bir kórinisi, Qarabaqty qalpyna keltirýge qosqan úles, – dedi Ázerbaıjan Prezıdenti.
Ázerbaıjan basshysy ekijaqty qarym-qatynastardyń keń aýqymdy kún tártibi men halyqaralyq máseleler boıynsha jan-jaqty áńgime bolǵanyn atap ótti.
– Árıne, kólik-logıstıka ınfraqurylymyn damytý jóninde úlken josparymyz bar. Qazaqstanda da, Ázerbaıjanda da osy ınfraqurylymdy qurý boıynsha ýaqtyly sharalar qabyldandy. Qazir elderimiz arasyndaǵy júk tasymalynyń kólemin jáne kólik tranzıtin arttyrý jóninde bastama kóterilip jatyr. Tıisti organdar bul baǵytta ózara belsendi jumys atqaryp otyr. Saýda-ekonomıkalyq qatynasty damytýǵa da tyń serpin beretinimizge senimdimin. Taýar aınalymyn arttyrýdaǵy rezervimiz aıtarlyqtaı kóp. Búgin biz keleshektegi saýda-ekonomıkalyq yntymaqtastyǵymyzdyń birqatar baǵyty boıynsha pikir almastyq. О́zara taýar jetkizý kólemin arttyrý josparyn naqtylaı alamyz. Sondaı-aq ınvestısııa salasynda zor múmkindigimiz bar. Qazaqstanda da, Ázerbaıjanda da qolaıly ınvestısııalyq klımat qalyptasqan. Sheteldik ınvestısııanyń kólemi úlken. Osy baǵyttaǵy kúsh-jigerimizdi biriktirip, Qazaqstan men Ázerbaıjandaǵy, sonymen qatar ózge de elderdegi birlesken ınvestısııalyq jobalarǵa qatysatyn ýaqyt keldi dep oılaımyn, – dedi Ilham Álıev.
Sonymen qatar Ázerbaıjan Prezıdenti jaqynda Sýmgaıt qalasynyń ortalyq kósheleriniń birine qazaq halqynyń kórnekti azamaty, aǵartýshy, túrkitanýshy Ahmet Baıtursynulynyń esimi berilgenin eske saldy. Ol baýyrlas eki el arasyndaǵy qarym-qatynas tabysty damıtynyna senim bildirdi.
On qujatqa qol qoıyldy
Kelissózderdiń qorytyndysy boıynsha Prezıdentter Qasym-Jomart Toqaev pen Ilham Álıev Qazaqstan Respýblıkasy jáne Ázerbaıjan Respýblıkasy arasyndaǵy strategııalyq qatynastardy nyǵaıtý jáne odaqtastyq ózara is-qımyldy tereńdetý týraly Deklarasııa jáne Qazaqstan Respýblıkasy men Ázerbaıjan Respýblıkasy arasyndaǵy 2022-2026 jyldarǵa arnalǵan yntymaqtastyqty damytý jónindegi keshendi baǵdarlamaǵa qol qoıdy.
Eki el basshylarynyń shaǵyn jáne keńeıtilgen quramdaǵy kezdesýleri kezinde uzyn-sany on qujatqa qol qoıyldy. Olar:
- Qazaqstan Respýblıkasy jáne Ázerbaıjan Respýblıkasy arasyndaǵy strategııalyq qatynastardy nyǵaıtý jáne odaqtastyq ózara is-qımyldy tereńdetý týraly Deklarasııa
- Qazaqstan Respýblıkasy men Ázerbaıjan Respýblıkasy arasyndaǵy 2022-2026 jyldarǵa arnalǵan yntymaqtastyqty damytý jónindegi keshendi baǵdarlama
- Qazaqstan Respýblıkasynyń Úkimeti men Ázerbaıjan Respýblıkasynyń Úkimeti arasyndaǵy saýda-ekonomıkalyq yntymaqtastyq týraly kelisim
- Qazaqstan Respýblıkasynyń Syrtqy ister mınıstrligi jáne Ázerbaıjan Respýblıkasynyń Syrtqy ister mınıstrligi arasyndaǵy 2023-2024 jj. arnalǵan Yntymaqtastyq jospary
- Qazaqstan Respýblıkasynyń Mádenıet jáne sport mınıstrligi men Ázerbaıjan Respýblıkasynyń Mádenıet mınıstrligi arasyndaǵy mádenı yntymaqtastyq jónindegi 2022-2025 jyldarǵa arnalǵan baǵdarlama
- Túrkistan qalasy men Shýsha qalasy arasynda baýyrlas qarym-qatynastardy ornatý týraly hattama
- Qazaqstan Respýblıkasynyń Aqparat jáne qoǵamdyq damý mınıstrligi men Ázerbaıjan Respýblıkasynyń Medıany damytý agenttigi arasyndaǵy ózara túsinistik týraly memorandým
- Qazaqstan Respýblıkasynyń Sıfrlyq damý, ınnovasııalar jáne aeroǵarysh ónerkásibi mınıstrligi men Ázerbaıjan Respýblıkasynyń Sıfrlyq damý jáne kólik mınıstrligi arasynda aqparattyq-kommýnıkasııalyq jáne joǵary tehnologııalar salasyndaǵy yntymaqtastyq boıynsha ózara túsinistik týraly memorandým
- Qazaqstan Respýblıkasynyń Indýstrııa jáne ınfraqurylymdyq damý mınıstrligi men Ázerbaıjan Respýblıkasynyń Sıfrlyq damý jáne kólik mınıstrligi arasyndaǵy kólik salasyndaǵy yntymaqtastyq týraly ózara túsinistik týraly memorandým
- Qazaqstan Respýblıkasynyń Indýstrııa jáne ınfraqurylymdyq damý mınıstrligi men Ázerbaıjan Respýblıkasynyń Sıfrlyq damý jáne kólik mınıstrligi arasyndaǵy tranzıttik júk tasymaly salasyndaǵy yntymaqtastyq týraly ózara túsinistik týraly memorandým.
Baýyrlastyqtyń bir belgisi
Qazaqstan Prezıdentiniń Bakýge resmı sapary sheńberinde Qasym-Jomart Toqaevtyń sheshimimen Ázerbaıjannyń Fızýlı qalasynda Qurmanǵazy atyndaǵy shyǵarmashylyqty damytý ortalyǵynyń irgesi qalanatyny jaıly málimdeldi.
Memleket basshysy qazaq halqynyń atynan jasalǵan bul syılyq elderimizdiń dostyǵynyń, baýyrlastyǵynyń jáne ózara qoldaýdyń taǵy bir nyshany bolatynyn atap ótti.
О́ner ortalyǵynyń jalpy aýdany – 3100 sharshy metr. Eki qabatty ǵımarat 600 adamǵa arnalǵan. Bıyl qyrkúıek aıynda irgetasy qalanyp, 2023 jyldyń jeltoqsanynda paıdalanýǵa beriledi.
Fızýlı qalasyndaǵy Qurmanǵazy atyndaǵy shyǵarmashylyq ortalyǵy mýzyka jáne mýzykalyq aspaptar, zamanaýı tehnologııalar: jumys jabdyqtary, 3D modeldeý, veb-dızaın, foto jáne vıdeo kýrstar baǵytynda jumys istemek. Sonymen qatar kilem toqýǵa, qolónerge, túrli sport pen horeografııaǵa baýlıtyn synyptar ashylady.
Ilham Álıev Qasym-Jomart Toqaevqa sheksiz alǵysyn aıtyp, Fızýlı qalasynyń balalary úshin álemdik deńgeıdegi shyǵarmashylyq ortalyq bolady dep senetinin jetkizdi.
Otyz jyl odaqtastyqtyń oń nátıjesi
Bakýdegi basqosýlardan keıin Memleket basshysy Qasym-Jomart Toqaev Ázerbaıjan Respýblıkasynyń Prezıdenti Ilham Álıevpen ótken kelissózder qorytyndysy boıynsha BAQ-qa málimdeme jasady.
Sóz basynda prezıdent keremet qala Bakýge resmı saparmen kelýge shaqyrǵany úshin shyn júrekten rızashylyǵyn bildirdi. «Biz búgin keń aýqymdy máseleler jóninde jemisti kelissóz júrgizdik. Ázerbaıjan Prezıdenti durys atap ótkendeı, eshqandaı problema, kedergiler bolǵan joq. Kerisinshe, ekonomıkalyq salada bolsyn, gýmanıtarlyq baǵytta bolsyn naqty nátıjelerge qol jetkizý úshin kúsh-jigerdi arttyrýǵa ózara nıet tanyttyq», dedi Memleket basshysy.
Málimdemesinde Qasym-Jomart Toqaev Birikken Ulttar Uıymy Qaýipsizdik Keńesiniń jarǵysy men qararlaryna sáıkes terrıtorııalyq tutastyǵyn jeńispen qalpyna keltire otyryp, Ázerbaıjan óz damýynyń jańa dáýirine qadam basqandyǵyn atap ótti.
«Árıne, baýyrlas el Ázerbaıjannyń ulttyq kóshbasshysy, Prezıdenti Ilham Geıdaruly Álıevtiń jeke eńbegi zor. Osy múmkindikti paıdalana otyryp, sizdiń qýatty basshylyǵyńyzben búginde Ázerbaıjan óziniń damýynda aıtarlyqtaı nátıjelerge qol jetkizip jatqanyn taǵy da aıtqym keledi. Biz sizdiń elińizdegi osy úrdisterdi baqylap otyrmyz ári shyn júrekten qýanamyz. Qarabaq pen Shyǵys Zangızýrdyń qalpyna kelip, damyp jatqanyn kórip otyrmyz. Sizdiń jeke eńbegińizdiń arqasynda bul óńir taıaý bolashaqta gúldengen aımaqqa aınalady, oǵan esh kúmán joq», dedi Memleket basshysy.
Qazaqstan óz tarapynan bul ıgi iske belgili bir dárejede úles qosýǵa daıyn ekenin málimdegen Prezıdent: «Búgin qazaq halqynyń atynan beriletin syıymyzdyń tanystyrylymy ótti. Kelesi jyldyń aıaǵyna deıin Fızýlı qalasynda Qurmanǵazy atyndaǵy shyǵarmashylyq ortalyǵy boı kóteredi. Meniń bul saparym mereıtoılyq data – elderimiz arasyndaǵy dıplomatııalyq qarym-qatynastardyń ornatylǵanyna 30 jyl tolýy qarsańynda ótýiniń da sımvoldyq máni bar. Naqtyraq aıtsaq, úsh kúnnen keıin biz bul datany atap ótemiz. Jalpy, men ózimniń qyzmettik mindetime baılanysty elderimizdiń arasyndaǵy yntymaqtastyqty damytý prosesine alǵashqy kúnderden-aq aralasqanymdy aıta ketý kerek. Biz uzaq joldy júrip óttik», dedi.
«Biz yqpaldastyqty basynan bastadyq jáne búginde biz elderimiz arasyndaǵy strategııalyq seriktestik pen odaqtastyq týraly senimdi túrde aıta alamyz. Osy seriktestigimizdi odan ári nyǵaıtý, ony ártaraptandyrý týraly deklarasııaǵa qol qoıyldy. Bul – alǵa qaraı jasalǵan naqty qadam. Aramyzda senimdi saıası dıalog ornady, memleketterimiz halyqaralyq alańdarda, eń aldymen Birikken Ulttar Uıymy, EQYU, Túrki memleketteriniń uıymy aıasynda yntymaqtasyp keledi. Osy múmkindikti paıdalana otyryp, qurmetti Ilham Geıdar oǵlý, sizge Azııadaǵy ózara is-qımyl jáne senim sharalary jónindegi keńes otyrysyn shaqyrý týraly Qazaqstan bastamasyna qoldaý bildirgenińiz úshin alǵys aıtamyn. Bıylǵy qazan aıynyń ortasynda bizdiń elimizdiń astanasynda sammıt ótedi jáne oǵan sizdiń qatysýyńyzdy asyǵa kútemiz. Bul is-sharaǵa sizdiń atsalysýyńyz kútiletin nátıjege qol jetkizý turǵysynan oń áser etetinine senimdimiz», dep málimdedi Memleket basshysy.
Prezıdent sondaı-aq ótken jyldyń qorytyndysy boıynsha ózara taýar aınalymynyń kólemi 3 ese artqanyn atap ótti. «Iаǵnı ósý qarqyny saqtalyp keledi. Alaıda jalpy alǵanda bul nátıje aıtarlyqtaı kóp emes, sondyqtan búgin ózara saýdanyń absolıýtti kórsetkishin arttyrýǵa kúsh salý jónindegi ýaǵdalastyqqa qol jetti. Múmkin jaqyn bolashaqta mıllıardtyq meje týraly aıtatyn bolarmyz», dedi Q.Toqaev.
«Ortaq kúsh-jigerdiń arqasynda mádenı-gýmanıtarlyq saladaǵy yqpaldastyqtyń da kúsheıip kele jatqany qýantarlyq jaıt. Árıne, bul halyqtarymyzdyń odan ári jaqyndasýyna zor septigin tıgizedi. Men búgin elimizde Ázerbaıjan mádenıetiniń onkúndigin ótkizý týraly bastama kóterdim. Bul is-sharanyń tanymaldylyǵyna eshqandaı kúmán keltirmeımin. Sebebi halqymyz ázerbaıjan mádenıetin, onyń óner qaıratkerlerin saǵynǵany anyq. Bul is-shara sátti ótedi degen oıdamyn», dedi Memleket basshysy.
Taýar kólemin ulǵaıtý kózdelip otyr
Memleketter basshylary qatysqan BAQ ókilderine arnalǵan brıfıng kezinde Qasym-Jomart Toqaev eki eldiń arasynda mádenıet qaıratkerleri men delegasııalardy turaqty almasýǵa keliskeni týraly aıtty. Ol sondaı-aq, Sýmgaıt qalasyndaǵy kóshelerdiń birine qazaq halqynyń kórnekti ókili Ahmet Baıtursynulynyń esimi berilgenine alǵysyn jetkizdi.
«Ahmet Baıtursynuly 1926 jyly osy – Baký qalasynda ótken birinshi Búkilodaqtyq túrkologtar sezine delegat retinde qatysqan. Bul fakt bizdiń elimiz ben halyqtarymyz arasynda qashan da tyǵyz baılanys bolǵanyn taǵy bir ret dáleldeıdi. Kezinde elordamyzdyń bir kóshesine kórnekti memleket qaıratkeri, Ázerbaıjan halqynyń birtýar perzenti Geıdar Álıevtiń esimi berilgen.
Qalamyz, astanamyz qarqyndy damyp keledi, búginde bul kóshe aýqymdy emes. Sondyqtan men elorda ákimine elimizde shynaıy qurmetke ıe Geıdar Álıevtiń esimin astanamyzdyń úlken kósheleriniń nemese dańǵyldarynyń birine berýdi usyný týraly tapsyrma berdim. Iаǵnı, kóshe ataýyn qolaılyraq nysanǵa aýystyramyz, bul ábden oryndy dep esepteımin.
Búgin biz memleketterimiz arasyndaǵy yntymaqtastyqtyń kólik-logıstıkalyq salasyn damytý týraly egjeı-tegjeı talqyladyq. Jan-jaqty taldap, eki el úkimetterine tıisti tapsyrmalar berildi dep aıta alamyz jáne bul baǵytta naqty nátıjelerge qol jetkiziletinine kúmán joq. Qalaı bolǵanda da, Qazaqstan tarapynda yntymaqtastyqtyń bul túrin damytýǵa qyzyǵýshylyq joǵary.
Aýyl sharýashylyǵy salasyn erekshe atap ótkim keledi. Bul jerde biz bir-birimizdi tolyqtyra alamyz. Qazaqstan astyq, bıdaı jáne aýyl sharýashylyǵy ónimderiniń basqa da túrlerin jetkizýge múmkindigi bar ekenin bilesizder. О́z kezeginde bizge Ázerbaıjannan aýyl sharýashylyǵy ónimderin – jemis-jıdek pen kókónisterdi ımporttaý qajettiligi týyndap otyr. Jalpy alǵanda, qazaqstandyq óndirýshilerdiń birqatary Ázerbaıjanǵa jalpy somasy 300 mıllıon dollardan asatyn 100 túrli taýar kólemin ulǵaıtýǵa daıyn. Sondyqtan biz osy taýar aınalymnyń logıstıkasyn qamtamasyz etýimiz kerek jáne bul bizdiń úkimetterimizdiń mindeti. Búgin osy jóninde kelistik.
Jalpy, saparymnyń nátıjesin óte tabysty dep baǵalaımyn. Eń aldymen, Ázerbaıjan Respýblıkasynyń Prezıdenti Ilham Geıdaruly Álıevke, sondaı-aq onyń úkimetine yntymaqtastyǵymyzdy tereńdetý jolyndaǵy óte jemisti jumysy úshin alǵys aıtqym keledi», dedi Memleket basshysy buqaralyq aqparat quraldaryna jasaǵan málimdemesinde.
Sóziniń sońynda Qasym-Jomart Toqaev: «Qazaqstanǵa keletin bolsaq, bizdiń tarapymyzdan eshqandaı kedergi bolmaıdy, biz tabysty jumys isteımiz. Bizdiń elderimizdiń arasyndaǵy qarym-qatynastardyń strategııalyq sıpaty týraly aıtýymyzǵa naqty negiz bar. «Strategııalyq» degen sóz bizdi kóp nársege mindetteıdi, biz bul baǵyttaǵy ortaq isimizge naqty maǵyna, naqty mazmun berýimiz kerek. Men yntymaqtastyǵymyzdyń keleshegine optımıstik kózqaraspen qaraımyn», dep qonaqjaılylyq tanytyp, jumys isteýge qajetti jaǵdaı jasaǵany úshin Ázerbaıjan eliniń basshysyna taǵy da alǵysyn bildirdi.
Memleket basshysy Ázerbaıjanǵa resmı sapary kezinde osy eldiń jalpyulttyq kóshbasshysy Geıdar Álıev pen onyń zaıyby Zarıfa Álıevanyń beıitine gúl shoǵyn qoıý rásimine qatysty.
Qazaqstan Prezıdenti budan keıin Ázerbaıjannyń azattyǵy men terrıtorııa tutastyǵy úshin qaza tapqan jaýyngerler jerlengen Shahıtter alleıasyndaǵy máńgilik alaýǵa da gúl shoǵyn qoıdy.
Sondaı-aq Qasym-Jomart Toqaev pen Ilham Álıev Baký kóshelerinde serýendedi.
Qazaqstan men Ázerbaıjan prezıdentteri Kaspıı teńiziniń jaǵasyn aralap kórip, munda ornatylǵan qazaqtyń kıiz úıine kirdi.
