Sýretti túsirgen Erlan OMAR, «EQ»
Bala sany az bolǵany sebepti mektepteri jabylǵan 306 eldi mekenderden 2 785 oqýshyny tasymaldaý uıymdastyrylady. Oblystyq bilim berý basqarmasynyń bastyǵy Názir Jáshibekovtiń aıtýyna qaraǵanda, balalardy tasymaldaýǵa ázirge 158 avtokólik daıyn. Osynyń ústine taǵy da 29 mıkroavtobýs satyp alynbaq.
Ata-analardy alańdatatyn bir másele – oqýshylardyń mektep formasy. Bul týraly N.Jáshibekov bylaı dedi: «Mektep formasy jas jetkinshektiń durys tárbıe alýyna yqpal etetinin tájirıbe kórsetip otyr. Sondyqtan bul tájirıbeden bas tartpaımyz. Árbir mekteptiń ózderiniń mektep formalarynyń úlgileri bar. Tek asyra siltep, túrli emblemalar men belgiler qadap alý mindet emes. Mektep dırektorlary osyny eskergenderi jón».
Jańa oqý baǵdarlamasyna sáıkestendirilgen oqýlyqtar 30 tamyzǵa deıin tolyq alynbaq. Bıyl barlyq mektepte «О́zin-ózi taný» sabaǵy alynyp tastaldy. Jańa oqýlyqtar men kórkem ádebıetter satyp alýǵa 930,7 mln teńge bólingen.
Qazir barsha elimizde «Mektepke jol» respýblıkalyq aksııa júrip jatyr. Onyń basty maqsaty – áleýmettik álsiz toptar balalarynyń mektepten qalyp qoımaýyn qadaǵalaý. Bizdiń oblysta 10 myńdaı oqýshy elimizde jan basyna shaqqanda ár adamǵa belgilengen eń tómengi kiris deńgeıi az otbasylarda turady. Onyń ishinde 1 561 ataýly áleýmettik kómek alatyndar bar. Bıyl osyndaı otbasylardyń balalary úshin kómek beretin Jalpyǵa mindetti oqý qoryna bıýdjetten 1 mlrd 267 mln teńge qarastyrylǵan. Buryn osy qordan balalarǵa kıim, aıaq kıim, oqý men jazý quraldary satyp áperiletin. Al bıyl bul tártip ózgerip, árbir ata-ana qajetti dúnıelerdi balalaryna ózderi satyp ápersin dep banktik kartochkalarǵa 37 389 teńgeden aýdarylatyn bolǵan. Biraq munyń da kúmándi jaǵy bar. Eger ashy sýǵa áýes ata-analar bolsa, kómek úshin berilgen aqshany ishimdikke salyp qoıýy da múmkin. Eger bul amal tıimdi bolmasa, endigi oqý jylynda qaıtadan eski ádiske kóshiriletin shyǵar. Búgingi tańǵa deıin bizdiń oblysta 1 783 bala úshin 16,3 mln teńge ata-analardyń bank kartochkalaryna aýdarylǵan.
Oblystaǵy 23 kolledjde 11 myńdaı stýdent oqıdy. Sonyń ishinde 3,5 myńy – bıyl túskender. Kolledjderde oqyp jatqan barlyq oqýshynyń 2 myńdaıy jumysshy mamandyqtaryn ıgeretinder. Al 1 500 oqýshy orta deńgeıdegi mamandyqtarǵa oqýda.
Bıyl oblystyń 26 aýyldyq mektebine kúrdeli jóndeý jumystary júrgizilgen. Keıbiri áli de jalǵasýda. Bul iske «Aýyl – el besigi» baǵdarlamasymen 1,9 mlrd, oblystyq bıýdjetten 484,7 mln teńge bólindi. Jasalyp jatqan jóndeýlerdiń negizgi bóligi tóbeni jamaý, tereze jaqtaýlaryn aýystyrý, jylý jáne elektr júıelerin jóndeý bolyp otyr. Barlyq jóndeý jumystary oqý jyly bastalǵansha aıaqtalady dep kútilýde.
Soltústik Qazaqstan oblysy
