Elimizdegi turmystyq zorlyq-zombylyq pen balalarǵa qatysty jasalatyn qylmystardyń sanyn azaıtýǵa baǵyttalǵan júıeli sheshimder men tapsyrmalar berilip-aq jatyr. Alaıda arnaýly organdardyń budan sabaq alyp, qanshalyqty nátıje shyǵaryp jatqany úlken suraq?!
Qosh, sonymen Abaı oblysynyń Polısııa departamentiniń málimetine súıensek, zardap shekken balanyń anasy polısııaǵa aryz berip, soǵan sáıkes kúdikti quryqtalypty.
«Sotqa deıingi tergeý amaldarynyń barysynda kúdikti adam anyqtalyp, oǵan Qylmystyq kodekstiń 120 jáne 121-baptarynyń 4-bóligine sáıkes aıyp taǵylyp, 20 jyl merzimge deıin bas bostandyǵynan aıyrý jazasy qarastyrylýy múmkin. Sol kúni sottyń quzyretimen kúdiktige qatysty kúzetpen ustaý túrindegi bultartpaý sharasy sanksııalandy», delingen jaýapty vedomstvonyń aqparatynda.
Jábirlenýshi taraptyń pikiri boıynsha, oqıǵa tamyzdyń 13-de bolǵan. Sol kúni qyzdyń anasy jumysqa kezekshilikke ketip, 9 jastaǵy balany úıde qaldyrýǵa týra kelgen. Osy sátti paıdalanyp, kórshisi aram oıyn júzege asyrǵan deıdi úrjarlyq kelinshek.
Oblystyq Polısııa departamenti qylmystyq is boıynsha tıisti sot-medısınalyq saraptamalar taǵaıyndalǵanyn, istiń barlyq mán-jaıyn zertteýdiń jan-jaqtylyǵyn jáne obektıvtiligin qamtamasyz etýge baǵyttalǵan qajetti tergeý áreketteri júrgizilip jatqanyn jetkizdi. «Balaǵa medısınalyq kómek kórsetildi», dedi quzyrly organ ókilderi.
Abaı oblysy,
Úrjar aýdany
