«Jyl saıyn medısınalyq kómek sapasyna qatysty 5,6 myńnan asa aryz tirkeledi. Bıyl birinshi jartyjyldyqta osyndaı 2,8 myń aryz-shaǵym kelip túsken. Bul rette 30%-dan asa jaǵdaıda faktiler naqtylanady. О́kinishke qaraı, jaǵdaı jaqsy jaǵyna ózgerip jatqan joq. Birqatar óńirde medısına qyzmetkerleriniń óz qyzmettik mindetterin oryndaýǵa salǵyrt qaraýy jáne medısınalyq uıymdardyń menedjementi nashar uıymdastyrylǵany baıqalady», dedi A.Ǵınııat.
Mınıstr medısınalyq kómek kórsetý erejeleri men standarttaryn buzý jappaı sıpat alyp bara jatqanyna nazar aýdardy. Bıyl 6 aıda osy tektes 500-den asa jaǵdaı tirkelgen. Sondaı-aq Medısınalyq jáne farmasevtıkalyq baqylaý komıteti kóbinese jaǵymsyz jaıttarǵa ákelip soǵatyn klınıkalyq hattamalardan negizsiz aýytqýǵa qatysty 1 600-den asa faktini anyqtady.
«Ana ólimi jaǵdaılaryn tekserý de standarttardyń saqtalmaıtynyn kórsetedi, sebebi analar óliminiń qurylymyn saralasaq, 73% – bul basqarylatyn, ıaǵnı áreket-amal jasaýǵa bolatyn sebepter, 27% ólim jaǵdaıy ǵana aýyr somatıkalyq aýrýlardyń saldarynan bolǵan», dedi A.Ǵınııat.
Mınıstr ana ólimi boıynsha ahýal máz emes óńirlerdiń reıtınginde Qaraǵandy, Pavlodar, Batys Qazaqstan, Qyzylorda, Shyǵys Qazaqstan oblystary men Almaty qalasyn atady. Ol Akýsherlik, gınekologııa jáne perınatologııa ǵylymı ortalyǵynda bıyl 3 ret ana ólimine jol berilgenin «soraqy jaǵdaı» dep atady. Sarapshylar barlyq jaǵdaıda da dıagnostıka kesh jasalǵanyn, qaýip-qater men emdeý taktıkasy durys baǵalanbaǵanyn nusqady. Saldarynan ómiri úshin mańyzdy aǵza músheleri qaıtymsyz ózgeriske ushyrap, sońy ólimmen aıaqtalǵanyn aıtty mınıstr. Akýsherlik, gınekologııa jáne perınatologııa ǵylymı ortalyǵynyń basshysy qyzmetinen bosatyldy.
Ambýlatorııa men stasıonar deńgeıinde naýqastyń jaı-kúıin jete baǵalamaý, medısınalyq uıymdar arasyndaǵy sabaqtastyqtyń joqtyǵy saldarynan ólim jaǵdaıyna alyp kelgen osyndaı shýly jaıttar Jambyl, Qyzylorda, Túrkistan oblystarynda da oryn alǵanyn mysalǵa keltirdi.
«Mundaı soraqy jaıttar búkil óńirdegi jumysty joqqa shyǵarady ári densaýlyq saqtaý salasyna nuqsan keltiredi», dep eskertti vedomstvo basshysy áriptesterine.
Máselen, mınıstr atap ótkendeı, komıtetke kelip túsken oryndy shaǵymdar boıynsha aımaqtardy saralaý nátıjesinde densaýlyq saqtaý salasyndaǵy ahýal máz emes 6 óńir anyqtaldy. Olar kelip túsken shaǵymdardyń 59%-y naqtylanǵan Pavlodar oblysy (№1 qalalyq aýrýhana, Ekibastuz qalalyq aýrýhanasy, Pavlodar qalasyndaǵy №3 emhana). Odan keıingi shaǵym kóp túsetin aımaqtar: Almaty oblysy (Ile, Talǵar aýdanynyń ortalyq aýrýhanasy, Qarasaı aýdanyndaǵy aýdanaralyq kópbeıindi aýrýhana) – 56,3%, Jambyl oblysy (Baızaq, Jambyl aýdandyq ortalyq aýrýhanasy, №5, №8 qalalyq emhanalar, Shý qalasynyń emhanasy) – 51%, Qyzylorda oblysy (Kópbeıindi qalalyq aýrýhana, Shıeli jáne Jańaqorǵandaǵy aýdanaralyq aýrýhana, №3 qalalyq aýrýhana) – 44,4%, Almaty qalasy (№4 qalalyq aýrýhana) – 35,7%, Mańǵystaý oblysy (Beıneý aýdandyq ortalyq aýrýhanasy) – 31,3%.
