Jarysqa elimizdiń túkpir-túkpirinen ıaǵnı, Nur-Sultan, Almaty jáne Shymkent qalalarynan, sonymen qatar Almaty, Qyzylorda, Pavlodar oblystarynan 100-den asa surmergen qatysyp jatyr.
Jarystyń ashylý saltanatyna Nur-Sultan qalasynyń ákimi Altaı Kólginov, Qazaqstan sporttyq atý federasııasynyń prezıdenti Berik Asylov jáne Qazaqstan sporttyq atý federasııasynyń bas hatshysy Oleg Pochıvalov qatysyp, sportshylarǵa sáttilik tiledi.
Jarystyń ashylý saltanatynda alǵash bolyp sóz alǵan Asylov aldymen qatysýshylardy quttyqtap, stend atýdan Qazaqstan Respýblıkasy Kýbogynyń III kezeńi men Nur-Sultan qalasynyń ashyq chempıonaty ashyq dep jarııalady.
Bul jarysta Azııa oıyndary, Azııa Chempıonattary men «Azııa balalary» halyqaralyq sporttyq oıyndarynyń chempıondary men júldegerleri óz sheberlikterin kórsetýde. Atalǵan jarysqa qurlyqtyq jáne álemdik dodalarda top jaryp júrgen elordalyq sportshylar da qatysyp jatyr.
«Bir qýanarlyǵy – elordadaǵy atý alańy qaıta jandanyp, aıtýly alamandardy qabyldaı bastady. О́ıtkeni, EKSPO kórmesinen keıin 4 jyldaı turalap qalyp edi. Qazir bundaǵy jaǵdaı jaqsy. Sportshylarǵa óte qolaıly. Biz osy básekeler nátıjesinde el úzdikterin iriktep, birlesken jattyǵý jıyndaryn ótkizemiz. Odan keıin dál osy sportshylar halyqaralyq jarystarda el namysyn qorǵaıdy», deıdi Qazaqstan sporttyq atý federasııasynyń bas hatshysy Oleg Pochıvalov.
Aıta ketý kerek, baıraqty báseke 4 kezeńnen turady. Bul joly jarysqa qatysýshylar stend atýdyń skıt jáne sportıng túrleri boıynsha ózara myqtyny anyqtaıdy.
Keıin el úzdikteri qarasha aıynda taǵy da bas qosyp, Qazaqstan kýbogynyń sheshýshi, ıaǵnı, tórtinshi kezeńinde baqtaryn synaıdy.
Osy jarystar qorytyndysy boıynsha ulttyq qurama jasaqtalyp, Horvatııada ótetin lısenzııalyq álem chempıonatyna qatysýǵa múmkindik alady.
Jarystyń jalpy qorytyndysy 29 tamyzda shyǵady.
