IT-tehnologııa: Áıelderdi qoldaýǵa jasalǵan qadam

Ulttyq komıssııanyń se­rik­tesi Technowomen qoǵamdyq bir­lestigi men Aqparat jáne qoǵam­dyq damý mınıstrliginiń uıytqy bo­lýymen ótken is-sharaǵa kásip­ker áıelder, IT jobalardyń bas­shy­lary, qoǵamdyq uıymdar­dyń kóshbasshylary, memle­kettik organdar men ulttyq kom­pa­nııalardyń ókilderi qatysty.

Ulttyq komıssııanyń tór­aǵasy, Prezıdent Ákimshiligi Bas­shysynyń orynbasary Aıda Balaeva moderatorlyq etken kez­desý barysynda áıelderdiń sıfr­lyq ekonomıkadaǵy múmkin­dikterin damytý jáne áıelder men balalar úshin áleýmettik mańyzy bar IT jobalardy praktıkaǵa engizý máseleleri pysyqtaldy.

Tusaýkeserge qatysýshylar aldynda sóılegen sózinde A.Balaeva Ulttyq komıssııa sıfr­lyq salasynda ynty­maq­tastyq týǵyzý jáne talanttardy qoldaýǵa múmkindikterdi ilgeri­letýdegi óz mindetin kórip otyr­ǵanyn atap ótti. «Bul jumys­tyń basty basymdyqtary – serik­testik úshin jaǵdaılardy keńeı­tý, qundy talanttardy anyqtaý jáne áıelder bastamalarynyń ekonomıkalyq jáne áleýmettik áleýetin iske asyrýǵa járdemdesý. Bul kezdesý – osy máselelerdi sheshýdegi kezekti qadam», dedi ulttyq komıssııa tóraǵasy.

Kezdesý eki jumys sessııa­synyń aıasynda ótti. Birinshi sessııa barysynda zańna­malyq praktıkany jetildirý jáne sek­to­­r­­aralyq yntymaqtastyqty ıns­­tı­t­ýsıo­naldyq nyǵaıtý jó­nin­degi birqatar bastama kóte­rildi.

Sessııanyń arnaıy qonaǵy Qazaqstandaǵy Google Women Techmakers baǵdarlamasynyń ambassadory Jarqyn Sheglova boldy. Sondaı-aq alańda spıkerler retinde «Sıfrlyq transformasııa» QQ basshysy, TechnoWomen Prezıdenti Azıza Shýjeeva, «Sıfrlyq ekonomıkany damytý ortalyǵy» JShS bas dırektory Bıkesh Qurmanǵalıeva, Birinshi kredıttik bıýronyń atqarýshy dırektory Ásem Nurǵalıeva, «Dogovor24» kompanııasynyń bas dırektory Elena Sedyh, «Qazposhta» AQ transformasııalaý jáne jobalyq basqarý departamentiniń dırektory Elena Chekaeva sóz sóıledi.

Ekinshi sessııa aıasynda qo­ǵam­dyq mańy­zy bar túrli máselelerdi sheshýge jáne áleý­mettik kásip­kerlikti damytýǵa baǵyt­tal­ǵan birqatar joba tanysty­ryldy. Sonyń ishinde, onlaın bilim berýdi keńeıtý, peda­gog­tar­dyń biliktiligin arttyrý jáne mek­­tepterdi sıfrlandyrý, jastardy jynys­tyq tárbıeleý, turmystyq zorlyq-zomby­lyqtyń aldyn alý, sondaı-aq onkologııalyq aýrýlardy anyqtaý jáne júktilik pen bosaný kezinde áıelderdi onlaın qoldaý bo­ıynsha ıdeıalar usynyldy.

Kezdesýdiń negizgi qory­tyn­dysy áleý­mettik áriptestik múmkindikterin nyǵaıtý jáne memlekettik qurylymdar, ulttyq kom­panııalar men IT kásipkerlik salasynyń ókilderi arasynda turaqty baılanys júıesin qalyptastyrý boldy.