Mınıstr kezdesý «halyq únine qulaq asatyn memleket» tujyrymdamasyn iske asyrý, azamattyq qorǵaý salasyndaǵy ózekti máselelerdi jedel sheshý qajettigi aıasynda ótip jatqanyn atap ótti. О́ziniń sózinde Iý.Ilın: «Mınıstrliktiń bólimsheleri tótenshe jaǵdaılardy joıýǵa bıyl ǵana 44 myńnan astam ret shyqty. 14 myńnan astam adam qutqaryldy, eki myń jeti júzge jýyq zardap shekken adamǵa alǵashqy medısınalyq kómek kórsetildi. Elimizde tótenshe jaǵdaılar men oqıǵalardyń sany azaıdy», dedi.
Kezdesý aıasynda mınıstr BAQ jáne úkimettik emes uıymdar ókilderimen de kezdesip, vedomstvonyń jumysy, azamattyq qorǵaý júıesin damytý perspektıvalary, onyń aldynda turǵan mindetterdi sheshý týraly aıtyp berdi. Odan keıin mınıstr tótenshe jaǵdaılardyń aldyn alý jáne olardy joıý salasyna qatysty máseleler boıynsha júgingen azamattardy jeke qabyldap, olardy tolǵandyrǵan máselelerge jaýap berdi. Keıbir másele boıynsha tıisti kómekshilerine naqty tapsyrmalar berdi.
Soltústik Qazaqstan oblysy TJ departamenti bólimsheleriniń jeke quramymen kezdesý barysynda Iýrıı Ilın mınıstrlik qyzmetiniń negizgi baǵyttaryn túsindirdi, beıindi bólimsheler basshylarynyń júrgizilgen jumysy týraly esepterin tyńdady, erekshe kózge túsken qyzmetkerlerge, tótenshe jaǵdaılardyń aldyn alý jáne olardy joıý isine úles qosqan azamattarǵa vedomstvolyq nagradalar men alǵys hattar tabys etti.
Sondaı-aq ol oblys ortalyǵyna jaqyn jerde salynyp jatqan Jedel qutqarý jasaǵynyń keshenine, «Bereke» shaǵyn aýdanyndaǵy órt sóndirý deposy kesheniniń qurylysyna baryp, istelgen jumystarmen tanysty. Petropavl qalasynyń №3 órt sóndirý bóliminde órtti joıýǵa jáne avarııalyq-qutqarý jumystaryn júrgizýge arnalǵan órt sóndirýshiler men qutqarýshylardyń tehnıkasy men jabdyqtaryn kózimen kórdi. Osy bólimsheniń aýmaǵynda qyzmettik boryshyn oryndaý kezinde qaza tapqan azamattyq qorǵaý organdary qyzmetkerlerin bir mınýt únsizdikpen eske alý, olardyń memorıalyna gúl shoqtaryn qoıý rásimi ótti.
Iýrıı Ilın óziniń sózinde olardyń esimderi men taǵdyrlary TJM tarıhyna máńgi jazylatynyn aıtty. «Osydan týra bir jyl buryn Jambyl oblysyndaǵy Baızaq aýdanynda órt sóndirý kezinde 10 órt sóndirýshi qaza boldy. Biz olardyń esimderin eshqashan umytpaımyz. Jalpy, elimiz Táýelsizdigin alǵan jyldarda 50-den artyq qutqarýshylarymyz eldiń amandyǵy jolynda kóz jumdy. Olar ózderiniń antynan taımaı, tilsiz jaýmen kúreste erlik pen qaharmandyqtyń úlgilerin kórsetip ketti. Sonyń ishinde, aramyzda turǵan, qurmetti Janar Ábdirahmanovanyń kúıeýi Altynbek Ábdirahmanov ta boldy. Biz Altynbektiń erligin umytpaı, árqashan ózimizdiń qyzmetkerlerimizge úlgi etemiz. Sizdiń qaıǵyńyzǵa ortaqpyz», dedi ol.
Osydan keıin mınıstr oblystyq Tótenshe jaǵdaılar jónindegi departamentke baryp, aýmaqtyq bólimsheniń kúndelikti jumystarymen tanysyp, kezekshiliktegi dıspetcherlermen áńgimelesti.
Soltústik Qazaqstan oblysy
