Álemdik reıtıngte 22-orynda turǵan Elena Rybakına irikteý týrnırinde jeńimpaz atanǵan 21 jastaǵy Fransııanyń jas daryny Klara Bıýrelmen sheberlik baıqasty. Jerlesimizdiń bul kezdesýde jeńiske jetetinine eshkimniń kúmáni bolǵan joq edi. Alaıda sol kúni Klara óte keremet oınap, Elenany jer sıpatyp ketti. Bir jarym saǵatqa sozylǵan saıys 4:6, 4:6 esebimen aıaqtaldy.
WTA tiziminde 37-orynda turǵan Iýlııa Pýtınseva tusaýkeser kezdesýin sol kúni, ıaǵnı 31 tamyzda 21 jasqa tolǵan Amanda Anısımovamen ótkizdi. О́ziniń jastyǵyna qaramastan AQSh tennısshisi osy kúnge deıin biraz belesti baǵyndyryp ta úlgergen. Atap aıtsaq, ol 2019 jyly Rolan Garrostyń jartylaı fınalyna deıin jetip, bıyl Ýımbldonnyń shırek fınalynda óner kórsetti. Álemdik reıtıngte 20-orynǵa jaıǵasqan Amanda WTA týrnırlerin eki ret utyp, basqa da dúbirli dodalarda óziniń aıshyqty ónerimen kózge tústi. Desek te bul tartysta Iýlııa baryn salyp, jeńisti qarsylasynyń ýysynan julyp áketti. Esep – 6:3, 6:3. Endi Pýtınseva germanııalyq Iýle Nımaıermen kezdesedi.
25 jastaǵy Aleksandr Býblık jastar býynynyń ókili Iýgo Gastonmen kúsh synasty. 26 qyrkúıekte 22 jasqa tolǵaly otyrǵan qarsylasy ATR reıtınginde 71-orynǵa turaqtaǵan. Osydan tórt jyl buryn Jasóspirimderdiń dúnıejúzilik olımpıadasynda jeńis tuǵyrynyń eń bıik satysyna kóterilgen Fransııanyń óreni 2020 jyly Rolan Garrostyń tórtinshi kezeńine shyǵyp, kópshilik nazaryn ózine aýdarǵan edi. Bul básekede jerlesimizdiń myqtylyǵy esh kúmán týǵyzǵan joq. 1 saǵat 46 mınýtqa sozylǵan oıyn 6:4, 6:4, 6:4 esebimen aıaqtaldy. Ekinshi kezeńde Býblık ıspanııalyq Pablo Karreno Býstamen oınaıdy.
Bir aıta keterligi, bıylǵy US open týrnırine álemge áıgili tennısshilerdiń birazy qatyspady. Onyń ózindik sebepteri de bar. Máselen, álemniń ekinshi raketkasy, germanııalyq Aleksandr Zverev Nıý-Iorkke jaraqatyna baılanysty kelmedi. Dańqy jer jarǵan Shveısarııanyń maqtanyshy Rodjer Federer áli de em-dom qabyldap jatqan kórinedi. ATR tiziminde altynshy orynda turǵan Serbııanyń sańlaǵy Novak Djokovıch koronavırýstan vaksınasııa alýdan bas tartqany úshin taǵy bir dúbirli dodadan shet qaldy. Áıelder arasynda Anjelıka Kerberdi korttan kórmeımiz. Nemistiń ataqty oıynshysy dekrettik demalysta.
Atalǵan týrnır bastalǵan bette birqatar sensasııalyq nátıje tirkelgenin de atap ótkenimiz jón. Álemniń kezindegi birinshi raketkasy, rýmynııalyq Sımona Halep 20 jastaǵy ýkraınalyq Darıa Snıgýrge jol berse, Reseıdiń myqtysy Darıa Kasatkına esimi kópshilikke beımálim ulybrıtanııalyq Herrıet Darttan utyldy. Al Grekııanyń maqtanyshy Stefanos Sısıpas kolýmbııalyq Danıel-Elaı Galanǵa ese jiberdi. E.Rybakına da solardyń kebin kıdi.
