Atalǵan klýbtyń sportshylary alǵashqy jarty jyldyqtyń ózinde tolaıym tabystarǵa qol jetkizdi. Brazılııanyń Kashıas-dý-Sýl qalasynda ótken Sýrdlımpıadalyq oıyndarda saıypqyrandarymyz 6 sport túrinen baq synap, 3 kúmis jáne 8 qola júldemen oraldy.
2013 jyly Bolgarııa astanasy Sofııa qalasynda ótken alamanda erkin kúresten el tarıhynda alǵash ret altyn júlde alǵan Ǵabıt Esjanov Brazılııa tórinde tóselgen bozkilemde 57 kılogramm salmaqta baq synap, kúmis júldege qol jetkizse, 74 kılogramm salmaq dárejesinde beldesken Ǵasyr Turǵynbaı áriptesiniń nátıjesin qaıtalady. Dzıýdoshylar arasyndaǵy dodada da jambyldyqtar júldeden quralaqan qalmaı, ulttyq quramanyń qorjynyn toltyrdy. Atap aıtar bolsaq, 78 kılogramm salmaqtaǵy Anna Kramarova jekeleı synda kúmis júldeger atansa, komandalyq jarysta úzdik úshtikten kórindi. Ferıde Karaoǵly arýlar arasyndaǵy komandalyq dodada jáne jekeleı synda qola medalǵa ıe bolsa, Evelına Egemberdıeva áıelder arasyndaǵy synda, Aıdos Túgelbaev erler arasyndaǵy alamanda úzdik úshtikti qorytyndylady.
О́zge sport túrleri boıynsha topqa túsken sańlaqtar da senimniń údesinen shyqqan bolatyn. Máselen, 77 kılogramm salmaqta baq synaǵan Nurjan Asan úshinshi oryn ıelense, taekvondo sheberi Oljas Rysjanov pýmse baǵdarlamasy boıynsha jekeleı jáne juptyq jarysta qola júldeger atandy.
Para júzýden Portýgalııanyń Madeıra qalasynda ótken álem chempıonatynda Nurdáýlet Jumaǵalı brass ádisimen 100 metr qashyqtyqta kúmis júlde alsa, Sııazbek Dalıev batterflıaı ádisimen 50 metr qashyqtyqta qola medaldy moınyna taqty. Brass ádisi boıynsha 100 metr qashyqtyqta baq synaǵan Andreı Afanasev te úzdik úshtikti túıindedi.
Atalǵan klýbtyń sportshylary ózge de halyqaralyq jarystar men Álem kýbogy sekildi dýy basym dodada tolaıym tabystarǵa qol jetkizip júr.
Jambyl oblysy
