Makroekonomıkalyq saýaldamada Ulttyq banktiń boljamdary qamtylmaıtynyn atap ótken jón. Onda ishki jáne álemdik naryqtardaǵy jaǵdaıdyń keleshek damýyna qatysty naryqtaǵy kásibı qatysýshylardyń táýelsiz pikirine, baǵalaýy men kútýine sholý jasalǵan.
Respondentterdiń medıanalyq boljamy boıynsha 2022 jyly Brent markaly munaıdyń baǵasy orta eseppen jylyna bir barrel úshin – 101 dollar, 2023 jyly – 89,9 dollar, 2024 jyly 75,0 dollar deńgeıinde qalyptasady. Aǵymdaǵy jylǵa sarapshylardyń boljaýlary bir barrel úshin 90 dollardan 110 dollarǵa deıin ózgeredi. 2023 jáne 2024 jyldarǵa arnalǵan boljamdar dıapazony keńeıedi. Degenmen respondentterdiń kópshiligi munaı baǵasynyń tómendeýin kútýde.
«Respondentterdiń boljamdary boıynsha 2022 jyly Qazaqstan ekonomıkasynyń ósimi – 3,0 paıyz, 2023 jyly – 3,8 paıyz, 2024 jyly 4 paıyz deńgeıinde qalyptasady. 2022 jylǵa sarapshylardyń boljamdary 2,6 paıyzdan 4 paıyzǵa deıin ózgeredi. 2023 jáne 2024 jyldary sarapshylar ekonomıkalyq ósýdiń qalpyna kelýin kútýde», delingen zertteýde.
Sondaı-aq saýaldamaǵa qatysýshylardyń boljaýynsha, bıyl jeltoqsanda ınflıasııa 15,1 paıyz deńgeıinde qalyptaspaq. Olardyń aldaǵy jyldarǵa jasap otyrǵan boljamdary birshama optımıstik sıpatqa ıe. Iаǵnı ınflıasııa deńgeıi 2023 jyly – 8,8 paıyzǵa, 2024 jyly 7,0 paıyzǵa deıin tómendeıdi dep paıymdaıdy. Sonymen birge saýaldamaǵa qatysýshylar bazalyq mólsherlemeniń jyl sońyna deıin 13,6 paıyzǵa joǵarylap, 2023 jyly – 12,0, 2024 jyly 9,2 paıyzǵa deıin tómendeýin kútedi. Osylaısha, respondentterdiń kópshiligi jyl sońyna deıin bazalyq mólsherlemeniń saqtalýyn nemese joǵarylaýyn kútýde.
Sarapshylar 2022 jyldyń qorytyndysy boıynsha teńgeniń aıyrbas baǵamy jylyna ortasha eseppen bir dollar úshin 460 teńge deńgeıinde, 2023 jyly – 478,4 teńgege deıin, 2024 jyly 495,0 teńgege deıin álsireıdi dep baǵamdaıdy.
«Sarapshylar áleýetti ishki jalpy ónimniń ortasha ósý qarqynyn 5 jyldyq sheginde 3,5 paıyz deńgeıinde kútedi. Boljam aýqymy 2 paıyzdan 4 paıyzǵa deıin ózgeredi. Jalpy, makroekonomıkalyq kórsetkishter boıynsha respondentterdiń boljamdarynyń dıapazony bir jyldyń sheginde de, orta merzimdi perspektıvada da keń. Bul ishki jáne álemdik naryqtardaǵy jaǵdaıdyń damý perspektıvalaryna qatysty naryq qatysýshylarynyń belgisizdiginiń joǵary deńgeıin kórsetedi», delinedi habarlamada.
Eske salaıyq, Ulttyq bank saýaldamasyna AERC, Halyk Finance, Jusan Invest, «Azııa damý banki», AKRA, «Eýrazııalyq damý banki», «Eýrazııalyq ekonomıkalyq komıssııa», «Renessans kapıtal», Sentras sekıýrıtız, «Frıdom fınans» jáne «Ekonomıkalyq zertteýler ınstıtýty» qatysqan.
