Jeńisti jaqyndatqan jan

Atyraý oblysyna qarasty Jylyoı aýdanyna Uly Otan soǵysynyń ardageri, belgili munaıshy Hasan Aldaqov esimi keńinen tanymal. Ol qan maıdannan aman oralyp, talaı qazynaly ken oryndaryn ashýǵa belsene qatysqan azamat, bar sanaly ǵumyryn halqyna qyzmet etýge arnaǵan munaıshy edi. 19 jasynda áskerge alynǵan jas elge Uly Otan soǵysy aıaqtal­ǵan soń, ıaǵnı, 1945 jyldyń qarashasynda jetti. Ardagerdiń maıdan jolyna kóz júgirtsek, qatardaǵy jaýyngerden Lenın­grad pen Karel maıdandarynda bólimshe komandırine deıin kóterilgen. Al 1945 jyly Omby qalasynda ofıserler kýrsyn támamdaǵan. Zulmat jyldardan soń el ekonomıkasy turalap qalsa da, beıbit ómirmen qaýyshqan eldiń qýanyshynda shek bolmady. Alaıda, etigimen qan keship kelgen sarbazdardy, elde de jeńil turmys kútip turmady. Jaýyr arqalar taǵy da aýyr eńbekten qaıysa tústi. Maıdannyń lokomotıvi bol­ǵan Dossor men Jylyoıdyń muna­ıy soǵystan keıin de barsha odaqtas eldiń ekonomıkasyn kóterdi. Hasan Jaýylbaıuly elge kelgen soń, atakásibimen qaıta tabysty. Sóıtip, bastapqyda eki jyldaı «Embimunaıgaz» birlestigi Qulsary munaı kásipshiliginde tehnık qyzmetin atqardy. 1948 jy­ly Máskeýdegi Gýbkın atyn­da­ǵy mu­naı ınstıtýtyna túsip, ony 1953 jy­ly oıdaǵydaı bitirip shyq­ty. Sóıtip, qolyna dıplomyn al­ǵan jas maman teorııalyq bilimin ken oryndarynda tájirıbemen ushtastyrýǵa kiristi. Jylyoı men Maqat aýdandaryndaǵy kenish­terde aldymen burǵyshynyń kómekshisi, burǵyshy sheber, keıin ınjener jáne bólim bastyǵy bolady. «Qazaqstanmunaıbarlaý» burǵylaý sheberi qyzmetin atqardy. «Mańǵystaýmunaıgazbarlaý» tre­sinde Túbejek, Jetibaı kenishterin ıgerip, ter tókti. Al, 1965-1975 jyl­dary О́zen burǵylaý bas­qarma­synda ýchaske bastyǵy, ınje­nerlik-tehnologııalyq ortalyqta aýysym jetekshisi mindetterin de atqardy. Uly Otan soǵysy men beıbit tirlikte alǵan marapattary azamat­tyń aıshyqty tulǵasyn odan ári aıqyndaı tústi. Hasan Aldaqov Qazaq KSR Joǵarǵy Keńesiniń Qurmet gramotasyn alǵan. Onyń omyraýynda «Qyzyl Juldyz» ordeni, «Erligi úshin» medaldary jarqyrady. Baıyrǵy maıdanger, bilikti munaıshy 1981 jyldyń qarashasynda ómirden ótti. Esimi «Qazaqstan munaı ensıklopedııasy» kitabyna endi. Urpaqtarynyń endigi armany – elim, jerim dep ótken ákeleriniń esimin asqaqtatý. Osy oraıda, Hasan Aldaqovtyń atyna óziniń týǵan jeri Jylyoı óńirinen kóshe berilýine jergilikti máslıhat yqpal etse, deıdi olar. Almas MANAP, «Egemen Qazaqstan».