Ýkraına: aqparattar alýan túrli

Ýkraınadaǵy eń sońǵy basty jańalyq – Donesk men Lýgansk oblystaryndaǵy referendým boıynsha da eki jaqtan barynsha qarama-qaıshy aqparattar túsip jatyr. Esterińizge sala keteıik, Ýkraınanyń ońtústik-shyǵysynda ornalasqan osy eki oblys eldiń ortalyq bıligin moıyndamaı, Donesk Halyq Respýblıkasyn jarııalaǵan edi. Endi ózderiniń sol sheshimderin referendým arqyly halyqtyń qoldaýymen bekitti. Jeksenbi kúni osy referendýmnyń daýys berý prosesi boldy. «Eýronıýs» aqparat agenttiginiń habaryna qaraǵanda, resmı Kıev bul aksııany separatızmniń kórinisi dep qabyldap, referendýmnyń qorytyn­dysyn moıyndaýdan úzildi-kesildi bas tartatynyn málimdedi. Ýkraına prezıdenti ákimshiligi basshysynyń mindetin atqarýshy Sergeı Pashınskıı daýys berý qorytyndysyn álemniń birde-bir memleketi moıyndamaıdy degen senim bildire otyryp, oǵan qatysqan laýazymdy tulǵalar jaýapqa tartylady dep te málimdegen. «Bul – referendým degenge eshqandaı qatysy joq dúnıe. Muny terrorıster, bandıtter jáne kisi óltirýshi jaýyzdar óz qylmystaryn Lýgansk jáne Donesk oblystary turǵyndarynyń atyn jamylyp, jasyrýǵa jasaǵan sátsiz qadamdary dep uǵý kerek», deı kelip, Pashınskıı mıllıondaǵan halyq turatyn terrıtorııada naǵyz referendým bolý úshin oǵan birneshe myń saılaý ýchaskeleri men saılaý komıssııalary uıymdastyrylýy kerek dep sanaıtynyn aıtqan. Endi reseılik aqparat quraldaryna sóz bereıik. Mundaǵy keıbir BAQ-tardyń arasynda azdaǵan sáıkessizdikter bolǵanymen, reseılik negizgi aqparat kózderi Donesk men Lýganskidegi referendýmnyń óte sátti ótkenin jazady. Máselen, reseılik «Gazeta rý» ınternet gazetiniń habaryna qaraǵanda, «Donesk halyqtyq respýblıkasy» dep atalatyn eshkim tanymaǵan qurylymnyń ortalyq saılaý komıssııasynyń málimetinshe, «Doneskiniń memlekettik derbestigin qoldap saılaýshylardyń 89,7 paıyzy daýys bergen» Slavıansk qalasyndaǵy «ózin ózi qorǵaý ókiliniń aıtýynsha, aldyn ala esepteýlerge qaraǵanda, tek 10 paıyz saılaýshylar ǵana táýelsizdikke qarsy, al 90 paıyzy jaqtap daýys bergen», deıdi «Gazeta rý». Sonymen qatar, ortalyq saılaý komıssııasynyń aty kórsetilmegen ókiliniń aıtýyna qaraǵanda, aldyn ala boljam boıynsha referendýmǵa Donesk oblysy turǵyndarynyń 90 paıyzy qatysypty. Osy BAQ Eýroodaq dıplomatııalyq qyzmetiniń basshysy Ketron Eshtonnyń baspasóz hatshysy Maııa Kochııanchıchtiń málimdeýine qaraǵanda, Eýroodaq bul referendýmdy moıyndamaıtynyn jazǵan. Reseılik keıbir aqparat quraldary, sonyń ishinde «Moskovskıı komsomoles» Doneskidegi daýys berýdiń belsendiligin «Ochered, kak na Mavzoleı!» dep jazǵan. Osy basylym EQYU-nyń Parlamenttik Assambleıasynyń prezıdenti Ranko Krıvokapıchtiń «Mundaı referendýmsymaqtarda halyqtyń erkin jáne ádiletti daýys berýi týraly oılaýdyń ózi absýrd» degen sózin, AQSh Memlekettik departamentiniń baspasóz hatshysy Djen Psakıdiń onyń qorytyndysy eshqashan moıyndalmaıtyndyǵy týraly málimdemesin, tipti, Reseı Prezıdenti V.Pýtınniń referendýmdy keıinge qaldyra turý kerektigi týraly aıtqanyn keltire otyryp, saılaýshylardyń belsendiligi aýyz toltyryp aıtarlyqtaı ekenine tántiligin bildiredi. Túske deıin-aq OSK tóraǵasy R.Lıagınniń málimeti boıynsha, Donesk oblysynda saılaýshylardyń – 30, Lýgansk oblysynda OSK tóraǵasy A.Malyhınniń aıtýyna qaraǵanda, saılaýshylardyń 65 paıyzy daýys berip úlgerdi, dep jazady basylym. Jaqsybaı SAMRAT, «Egemen Qazaqstan».