Atalǵan mekteptiń bul aýdanda salynýy tegin emes. О́ıtkeni 400 myńdaı halqy bar qaladaǵy turǵyndardyń basym bóligi Shyǵys kentinde turady. Semeıge qonys aýdaratyndardyń kóbi turǵylyqty oryn retinde dál osy aýdandy tańdaıdy. Sebebi bul aýmaq ósimdik sharýashylyǵymen aınalysqanǵa qolaıly.
Oblys ákiminiń orynbasary Aıdyn Kárimov 2025 jylǵa deıin óńirde 10-nan asa mektep salynatynyn jetkizdi.
«Elimizdiń barlyq óńirinde oqý jyly bastaldy. Semeıde 5 myńnan astam oqýshy mektepke bardy. Oryn tapshylyǵyn azaıtý úshin qalada taǵy 4 mektep ashylady. Tutastaı alǵanda, 2025 jylǵa deıin oblysta 11 mektep ashylady dep kózdelip otyr. Shyǵys kentindegi bul mektep zamanaýı bilim berý standarttaryna saı jabdyqtalǵan», dedi A.Kárimov.
Abaı oblysynyń bilim basqarmasynyń málimetine súıensek, bıyl óńirde 1-synyptyń tabaldyryǵyn 10 280 bala attaǵan. Sondaı-aq oqýshy oryndarynyń tapshylyǵyn azaıtý maqsatynda 1 700 balaǵa arnalǵan 4 mektep ashylypty. Al 2025 jylǵa qaraı 5 100 oryndyq 11 mektep salý josparlanyp otyr.
«Oblysta 301 mektep bar. Olardyń barlyǵy ashylyp, qyzmetterine kiristi. Sonymen qatar Semeıde 4 jańa mektep paıdalanýǵa berildi. Shyǵys kentindegi 1 200 oqýshyǵa arnalǵan mektep zamanaýı, sońǵy standarttarǵa saı qural-jabdyqtarmen qamtylǵan. Munda bilim eki tilde beriledi. Abaı oblysyndaǵy mektepterdiń
100%-y aptasyna 5 kún oqıtyn bolady», dedi bilim basqarmasynyń ókilderi.
Sonymen qosa Jarma aýdanynyń Qapaı batyr aýylynda da 100 oqýshyǵa arnalǵan mektep ǵımaraty paıdalanýǵa berilgenin aıta ketken oryndy. Munda sport jáne akt zaldary, ashana, IT-synyby, kitaphana men arnaıy jabdyqtalǵan psıholog kabıneti qarastyrylǵan.
Osy rette «Mektepke jol» aksııasy aıasynda óńirdegi oqýshylarǵa oqý quraldary men mektep formasyn satyp alýǵa kómek kórsetilip kele jatqanyn aıta ketý kerek. Aıtalyq, osy naýqan arqyly Abaı oblysynda 5 316 bala qajetti qoldaýǵa ıe boldy.
«20-25 tamyz aralyǵynda aýdandardyń ortalyq bazarlarynda, saýda úılerinde mektep taýarlaryn tómen baǵamen satý úshin birqatar kásipkerdiń qatysýymen mektep jármeńkeleri uıymdastyryldy. Oblystyń janashyr azamattary, kásipkerleri, mesenattary aksııaǵa qosylyp, ata-analarǵa qoldaý kórsetti. Mysaly, «Voshod» kentindegi №34 orta mekteptiń 80 oqýshysyna sporttyq kıim men oqý qural-jabdyqtary bar sómkeler tabystaldy», delingen jaýapty vedomstvo aqparatynda.
Aksııa qyrkúıek aıynyń sońyna deıin jalǵasady.
Abaı oblysy
