Biraq ony birden júzege asyrý múmkin bolmady, túrli bıýrokratııalyq kedergilerge ushyradym. Men de aldyma qoıǵan maqsatyma qol jetkizý úshin keri qaıyrylmadym, ilgeri umtyla berdim. Mundaı tabandylyǵym kelesi jyly óz jemisin berdi.
Sóıtip, 2021 jyly bizdiń ortalyǵymyz óz esigin aıqara ashty. Buǵan sol jyly qurylǵan «Altyn uıa – Erkele» qaıyrymdylyq qory kóp septigin tıgizdi. Atalǵan qor birinshi kezekte belgili sebeptermen ózderiniń quqyqtaryn qorǵaýǵa qabiletsiz, ıaǵnı aýtızmmen aýyratyn balalardyń múddesin qorǵaıdy.
Ortalyǵymyzda korreksııalyq kabınet, balalar ıogasymen aınalysýǵa arnalǵan bólme, qum terapııasy, tuz shahtasy, logoped-defektologtiń kabıneti, logopedtik massaj kabıneti bar. Qazirdiń ózinde ortalyǵymyzda aýtızmi bar 200-deı bala tirkelgen. Al ortalyq mamandarynyń basty maqsaty – balalardyń ómirin qoǵamǵa beıimdeý, ózderin tolyqqandy qoǵam múshesi retinde sezindirý. Bul jerde, árıne, mamandar men ata-analar arasynda ózara senimge negizdelgen qarym-qatynas ornatýdyń mańyzy asa zor. Bul baǵyttaǵy jumystarymyz da jemissiz emes.
Sóz retinde bizdiń ortalyǵymyz psıhıkalyq-fızıkalyq damýynda aýytqýshylyqtary bar 6 men 18 jas aralyǵyndaǵy balalardy qabyldaıtynyn aıta ketkendi jón kórip otyrmyn. Baıqasańyzdar, bári derlik mektep jasyndaǵy balalar. Demek, bizde balalardyń tıisti deńgeıde bilim alýlaryna da barlyq jaǵdaı jasalǵan. Pedagogter de tárbıelenýshiler úshin psıhologııalyq turǵydan jaıly ahýal qalyptastyrýǵa barlyq qabilet-qarymyn jumsap keledi.
Qoryta aıtqanda, bizdiń osyndaı ortalyq qurýdaǵy maqsatymyz – aýtızmi bar erekshe balalardyń ómirdegi aýyrtpalyqtaryn, qarlyǵashtyń qanatymen sý sepkendeı, sál de bolsa jeńildetýge úles qosý.
Aınur SOLOTOVA,
kópbalaly ana
NUR-SULTAN
