32 jastaǵy Vıtorııa qalasynyń týmasy áýesqoı rıngte de eleýli tabystarǵa qol jetkizdi. Ol 2011 jyly Bakýde ótken álem chempıonatynda qola medal ıelense, 2012 jyly Londonda alaýy tutanǵan Olımpııa oıyndarynda kúmiske qol sozdy. Eskıva alǵashynda 81 kılo salmaq dárejesinde saıysqa tússe, odan keıin 75 kıloǵa aýysty. Qap taýynyń bókterinde Brazılııanyń betkeustary bizdiń Danabek Sýjanovty san soqtyrǵany da esimizde. Bir qyzyǵy, joǵaryda atalǵan jarystyń ekeýinde de Falkao osydan birer aı buryn ǵana bizdiń Gennadıı Golovkınnen taıaq jegen Japonııanyń juldyzy Reta Mýrataǵa ese jiberdi.
Ońtústik Amerıkanyń oǵlany 2014 jyldan beri kásipqoılar arasynda kúsh synasyp júr. Sol aralyqta birde-bir ret jeńilgen emes. 28 qarsylasynyń 20-syn nokaýtqa jiberdi. Mine, dál sol sańlaq kúni keshe ǵana Jánibek Álimhanulyn jekpe-jekke shaqyrdy. Qazaqtyń qaısar ulynyń da jaýaby kóp kúttirgen joq. Ol: «Menimen aıqasqyń kelse, áýeli chempıondyq belbeýdiń birin ıelen. Sodan keıin ǵana sóılesemiz. Seni syılaımyn, biraq eshqandaı ataq-dańqy joq boksshymen judyryqtasý meni esh qyzyqtyrmaıdy. Dál qazir maǵan keregi – Charlo men «Kanelo», dep batyl málimdeme jasady.
Jýyq arada meksıkalyq Saýl Alvarestiń Jánibekpen jekpe-jekke shyǵa qoıýy ekitalaı. О́ıtkeni bul kúnderi «Kanelo» 17 qyrkúıekte Las-Vegasta Qazaqstannyń eń beldi boksshysy Gennadıı Golovkınmen bolatyn aıqasqa qyzý daıarlanýda. Sol kezdesýden keıin onyń biraz ýaqyt boıy tynyǵatyny anyq. Al bul kúnderi WBC nusqasy boıynsha chempıondyq belbeýdi ıelenip otyrǵan Djermall Charlo kelisýi ábden múmkin. Al ol jaıynda biz ne bilemiz?
Djermall 32 jasta. Ol 1990 jyldyń 19 mamyrynda AQSh-tyń Tehas shtatyna qarasty Rıchmond qalasynda dúnıege keldi. 18 jasynda kásipqoı boksqa aýysqan daryndy jigit 2008 jyldyń kúzinde óziniń alǵashqy jekpe-jegin ótkizdi. Sol kezden beri 32 márte sharshy alańǵa kóterilip, barlyq básekede jeńiske jetti. 22 qarsylasyn nokaýtqa jiberdi. Charlodan taıaq jegender arasynda Ýgo Senteno, Antýan Smıt, Lennı Bottaı, Kornelıýs Bandreıdj, Ostın Traýt, Djýlıan Ýılıams, Matveı Korobov, Dennıs Hogan, Sergeı Derevıanchenko jáne taǵy basqa tanymal bylǵary qolǵap sheberleri bar. Sońǵy ret Charlo ústimizdegi jyldyń 18 maýsymynda polshalyq Maseı Sýleıskıdi san soqtyrdy. Kezinde ol birinshi orta salmaqta IBF nusqasynyń teńdessizi dep te tanylǵan edi.
Djermalldyń egizi Djermell Charlonyń da myqty boksshy ekenin jankúıer jaqsy biledi. 15 jasynda Jasóspirimderdiń dúnıejúzilik olımpıadasynda qola medal ıelengen ol 2007 jyldyń aıaǵynda kásipqoı rıngtegi tusaýkeser kezdesýin ótkizdi. Sol 15 jyl aralyǵynda 37 ret sharshy alańǵa kóterilip, 35 ret jeńis toıyn toılady. 19 qarsylasyn esinen tandyrdy. Iron Man («Temir adam») degen janama esimdi ıelengen Djermell tek bir ret qana jeńilistiń kermek dámin tatty. 2018 jyldyń jeltoqsan aıynda óziniń otandasy Tonı Harrısonǵa upaı sanymen ese jiberse, byltyr jazda argentınalyq Braıan Kastanomen teń tústi. Qazirgi kezde AQSh boksshysy birinshi orta salmaqta absolıýtti álem chempıony atanyp otyr. Eger de Djermelldiń salmaǵy sál aýyrlasa, keleshekte ol Álimhanulyna qarsylas atanýy da ábden múmkin.
Qazirgi kezde «Jánibek Álimhanuly óz ataǵyn qaı kezde qorǵaıdy?» degen saýal kópshilikti qyzyqtyrýda. Ol jaǵyn dál búgin eshkim dóp basyp aıta almaıdy. Desek te keıbir derek kózderine súıensek, qandasymyz qarasha aıynda chempıondyq belbeýin qorǵaý úshin jekpe-jekke shyǵýy bek múmkin. Onyń qarsylastary retinde joǵaryda biz sóz etken Eskıva Falkaodan bólek, meksıkalyq Haıme Mýngııa men ulybrıtanııalyq Krıs Iýbenktiń de esimderi atalýda. Bul boksshylardyń úsheýi de álemdik reıtıngte alǵashqy úshtiktiń qatarynda. Máselen, kelesi aıda 26 jasqa tolǵaly otyrǵan Mýngııa osy kúnge deıin adam balasynan jeńilgen emes. Ol 40 básekeniń 32-sin merziminen buryn aıaqtady. 33 jastaǵy Iýbenk 34 kezdesýdiń tek ekeýinde ǵana utyldy. 23 aıqasta aıqyn basymdyq tanytty. Osylardyń qaısysymen jolyqsa da, qazaqtyń uly namysty qoldan bermeıtini anyq. Sol sebepti de biz aldaǵy ýaqytta Jánibektiń jarqyn jeńisterine talaı márte kýá bolamyz-aý dep úmittenemiz.
