Aýyldaǵy aǵaıynnyń densaýlyǵyn durys kútpeıtini, oǵan laıyqty medısınalyq ınfraqurylymnyń da shalǵaıdaǵy eldi mekenderde durys jasaqtalmaǵany kópten beri aıtylyp júrgen kókeıkesti másele edi. El halqynyń jartysyna jýyǵyn aýyl halqy quraıtyndyqtan, bul jaǵdaıǵa basa mán berip, jolǵa qoıý óte mańyzdy. Atalǵan máseleni Prezıdenttiń qatysýymen ótken jıyndarda ózim de kótergenmin. Sondyqtan osy Joldaý aıasynda naqty tapsyrmalar arqyly aýyl medısınasyn jaqsartý baǵytynda ilkimdi is-sharalar qolǵa alynatynyna qýanyp qaldym.
Memleket basshysy aıtqandaı, búginde elimizde 650 eldi mekende emdeý mekemesi joq. Bul – bile-bilgenge úlken másele. О́ıtkeni osynsha aýyl-aımaqtyń halqy sapaly medısınadan tys qalyp otyr degen sóz. Endi osy olqylyq joıylyp, Joldaýda júktelgen tapsyrma boıynsha aldaǵy eki jylda bul aýyldarda medısınalyq jáne feldsherlik-akýsherlik bólimsheler salynatyn boldy, sondaı-aq oǵan qajetti qural-jabdyqpen tolyq qamtamasyz etiledi. О́z kezeginde osy bastama arqyly memleket 1 mln-nan asa adamnyń alǵashqy medısınalyq-sanıtarlyq kómek alýyna múmkindik jasaıdy.
Aýyl-aımaqpen qatar aýdandaǵy aýrýhanalardyń da ahýaly ájeptáýir jaqsarady. Aıtalyq, Joldaýda 32 aýdandyq aýrýhana zamanǵa saı jańaryp, aýdanaralyq kópbeıindi mekemege aınalatyny aıtyldy. Bul aýrýhanalarda ınsýltten emdeý ortalyqtary, hırýrgııa, jansaqtaý jáne ońaltý bólimderi ashylady. Osylaısha, 4 mln-nan asa adamǵa kórsetiletin medısınalyq qyzmettiń sapasy artady. Sonymen qatar telemedısına baǵytyn damytý jolǵa qoıylyp, shalǵaıda turatyn halyqqa sapaly medısınalyq qyzmet kórsetiledi. Prezıdent aıtqandaı, munyń bári ult densaýlyǵyn sóz júzinde emes, is júzinde jaqsartýǵa bastaıdy.
Osy oraıda erikti medısınalyq saqtandyrý júıesin engizýdi de jaqsy bastama dep atap óter edim. Sebebi medısınalyq saqtandyrý júıesine halyq tarapynan týyp jatqan aryz-shaǵym, qynjylystar az bolmaı tur. Basynan syn arylmaı qoıǵan bul medısınalyq kómektiń memleket kepildik bergen jáne saqtandyrý paketi dep ekige bólingeni asa tıimdi bola qoımaǵanyn ýaqyt kórsetti. Muny Prezıdent durys aıtyp otyr. Alda bul máseleniń de oń sheshimin tabatynynan úmittenemiz.
Abaı BAIGENJIN,
«Ulttyq ǵylymı medısınalyq ortalyǵy» AQ basqarma tóraǵasy
