Endigi jerde bul baǵyttaǵy zańdardyń qabyldanyp, júıeli júzege asýy mańyzdy. Jyl sońyna deıin konstıtýsııalyq zańdar, ózge de zań tarmaqtary tolyǵymen qabyldanyp, jańa kózqaraspen jańa belesterdi baǵyndyrýǵa umtylýymyz kerek.
Saılaý júıesin jańǵyrtýdyń búginge mańyzy zor. Jasyratyny joq, halyq saılaýǵa selqos qaraıdy. Ár daýystyń mańyzdy ekenine senbeıdi. Budan bylaı majorıtarlyq júıe boıynsha árbir aımaq Parlamenttiń tómengi palatasyna óziniń keminde bir depýtatyn saılaı alady. Jańa úlgi kózqarasy ártúrli azamattardyń Májiliske kelýine múmkindik beredi. Májilistiń depýtattyq korpýsynyń 70 paıyzy – proporsıonaldy (partııa atynan), 30 paıyzy majorıtarlyq negizde jasaqtalady. Demek úmitkerdiń qandaı da bir partııada bolýy mańyzdy emes. Tikeleı saılanady. Oblystar men respýblıkalyq mańyzy bar qalalar máslıhattarynyń saılaýyna da aralas úlgi engizildi. Aýdandar men qalalardaǵy saılaý tolyǵymen majorıtarlyq júıege kóshti. Iаǵnı ár depýtat tikeleı saılanady. Bul básekeli saıası orta qalyptastyrý úshin mańyzdy. Endigi jerde el aldynda bedeli bar jańa tulǵalardyń saıasatqa kelýine jol ashylady.
Taǵy bir mańyzdy másele – sot júıesiniń jańǵyrtylýy. Sot júıesindegi júrgizilip jatqan reformalar atalǵan salaǵa jańadan bilikti mamandardy jumyldyrýǵa, ádil sot tóreligin ornyqtyrýǵa tıis. Mundaı is-sharalar men
bastamalar, eń aldymen, qoǵamnyń sottarǵa degen senimin nyǵaıtý úshin jasalyp otyr. Endi jańa normalardyń naqty júzege asyrylýyn qamtamasyz etip, sot qyzmetindegi bıýrokratııany túbegeıli joıý qajet.
Sottar qylmystyq prosesti júrgizý barysynda tergeý organdaryna jaltaqtamaýy kerek. Sýdıalar tabandylyq tanytsa, tergeý amaldary sapaly júrgiziletini anyq. Qylmystyq qýdalaýǵa túsken azamattardyń quqyqtary da laıyqty qorǵalary sózsiz.
Serik AQYLBAEV,
Ulttyq quryltaı múshesi
