Segiz aı boıy jalǵasqan «Amanat» komıssııasy jumysynyń qorytyndysy retinde Prezıdentke Qańtar oqıǵasynyń qatysýshylaryna bir rettik raqymshylyq jasaý jóninde usynys bildirgen edik. Adamdardyń taǵdyryna, jastardyń ómirine alańdap, árbireýiniń jaǵdaıyna úńilip, Memleket basshysyna amnıstııa jasaý jóninde tilek aıttyq.
Usynys qoldaý tapty! Kishkentaı ǵana uıymnyń jumysy nazarǵa alynyp, usynysymyz eń joǵarǵy deńgeıde qoldaý taýyp, qańtar oqıǵalaryna qatysyp, qapasqa qamalǵan azamattarymyzǵa qatysty bir rettik raqymshylyq jasaý jaıynda tıisti sheshim qabyldanǵany Prezıdent aýzymen Parlament qabyrǵasynda qalyń elge jarııalandy. Myńdaǵan janǵa qýanysh syılaǵan bul súıinshi habardy biz ádilettiń saltanat qurýy, gýmanızm aktisi dep qabyldaımyz. Memleketimizdiń irgetasyn nyǵaıtýǵa baǵyttalǵan qadam desek, artyq aıtqanymyz emes.
Árıne, jastar bir ret jaza basty eken dep uzaq jylǵa sottap jiberý durys bolmas edi. Ol azamattardyń bala-shaǵasy bar, týystary bar, jaǵymsyz is-áreket olardyń memleketke degen senimine selkeý túsirip, teris aınaldyrar edi. Memlekettiń basty qundylyǵy – adam bolsa, bul sheshim mańyzdy sheshim – adamnyń taǵdyryn oılaýǵa degen talpynysynyń kórinisi. Bul – «Ádiletti Qazaqstan» tujyrymdamasyna sáıkes keletin uıǵarym.
Memleket basshysynyń raqymshylyq jarııalaý týraly usynysyn «Amanat» komıssııasy jumysynyń sheshýshi qorytyndysy dep qabyldadyq. Alaıda bizdiń jumysymyz munymen aıaqtalmaıdy, aldaǵy ýaqytta komıssııamyz raqymshylyq týraly zańnyń jasaqtalýyna, qoldanylýyna qatysty zań oryndarymen birge jumys isteıdi. Biz óz atymyzdan jáne qańtar oqıǵalaryna qatysty qamaýda bolǵan azamattar men olardyń týma-týystarynyń atynan memleket bolashaǵyn eskerip, adamdar taǵdyryna qatysty osyndaı ádil sheshim qabyldaǵany úshin Prezıdent Qasym-Jomart Toqaevqa úlken alǵys aıtamyz!
Ýaıs ERSAIYNULY,
«Amanat» táýelsiz komıssııasynyń múshesi
