Gýmanıtarlyq kómektiń ishinde azyq-túlik, kıim-keshek, gıgıenalyq zattar bar. Qaıyrymdylyq kómek jasaý týraly bastamany alǵashqy bolyp «Amanat» partııasy kótergen edi, ony basqa da uıymdar, kásipkerler jáne qalyń kópshilik qoshtap ketti. Úlken qoldaý kórsetkenderdiń arasynda jergilikti taýar óndirýshiler bar. Máselen, «Radýga», DEZ, «RahatOpt», «Shveınaıa fabrıka «Progress», «Noǵaıbaı», «Maslodel», «Arhstroı», «Kurylys-servıs SK» JShS-teri, «Sultan-AMMK» AQ, «Korona», «Severnyı» saýda úıleri, «Mambetov ı K» ShQ jáne basqalar bar. Olar Qostanaı oblysyna 15 tonna un, 5 tonna kúrish, qaraqumyq, makaron, kúnbaǵys maıy, qurylys materıaldaryn jınady. «Qazir zardap shekkenderge jyly kıim men jamylǵylar óte qajet, óıtkeni sýyq kele jatyr. Sondaı-aq biz taza aýyz sýdy júktedik. Gýmanıtarlyq júk jınaýǵa jáne jóneltýge qatysqan árbir kásipkerge, árbir turǵynǵa olardyń janashyrlyǵy men kómektesýge degen yqylasy úshin úlken alǵysymdy bildirgim keledi. Jergilikti atqarýshy organdarǵa da alǵys aıtamyz, olar uıymdastyrý máselelerin óz moınyna aldy», dedi Amanat partııasy aımaqtyq fılıalynyń atqarýshy hatshysy Ásem Rahmetova.
Qazir kóptegen tilek bildirýshiler, sonyń ishinde kásipkerler partııa fılıaldaryna ózderiniń kómegin usyna otyryp, qońyraý shalyp jatyr. Aıta keteıik, gýmanıtarlyq kómek qabyldaý pýnktteri jumysyn jalǵastyrýda.
Kómek qabyldaý jumystary jeksenbi kúni tańerteń bastaldy. Pýnktter Petropavlda jáne óńirdiń aýdan ortalyqtarynda Amanat partııasy fılıaldarynyń ǵımarattarynda ashyldy. Taýarlardy qabyldaýdy «Jastar Rýhy» jastar qanatynyń eriktileri júzege asyrady.
Basqa saıası partııalardyń arasynda Qazaqstannyń halyq partııasy da óz kómegin jınaýda. Olar qoǵamdyq uıymdardan qarjy jınap, ony ózderiniń Qostanaıdaǵy fılıalynyń belsendilerine aýdarýda. Bul kómekke Petropavl qalasynyń qoǵamdyq keńesiniń músheleri de atsalysyp, árqaısysy 10 myń teńgeden aýdardy.
«Men naqty ispen kómekteskim keledi. О́zimdi baspanasyz qalǵan jáne keshegi jáne ótken túndi qorqynysh pen belgisizdikpen bastan ótkergen adamdardyń ornynda elestete almaımyn. Osyndaı ýaqytta qazaqstandyqtardyń birligin kórsetý kerek. Barshańyzdy kómek kórsetýge shaqyramyn», deıdi Qaıyrjan Aısın esimdi qala turǵyny. Osyndaı janashyrlyq pikirler aıtyp júrgender kóp. Qysyltaıańda halyq bir jeńnen qol, bir jaǵadan bas shyǵara alatynyn kórsetti.
PETROPAVL
