Bıyl dıspanserdiń onkohırýrgııalyq bólimshesinde onkoplastıkalyq rezeksııalar jasaý bastaldy. Bólimshege naýqastar óńesh pen asqazannyń, uıqy beziniń, baýyrdyń, tikishek pen sút beziniń, áıel men er adamdardyń jynys músheleriniń, sondaı-aq qımyl-tirek apparatynyń isigimen túsedi. Bıylǵy sáýirde 59 jastaǵy er adam qoıý tamaq ishkende ózin jaısyz sezingen. Tipti álsizdik baıqalǵan.
Dıspanser dárigerleri naýqasqa fıbrogastroskopııa júrgizip, óńeshtiń ortakókirek tusynda isik baryn anyqtaǵan. Gıstologııalyq qorytyndy – óńeshtiń adenokarsınomasy. Naýqasqa «О́ńeshtiń ortakókirek bóliginiń qaterli isigi» dıagnozy qoıylǵan. Sol sebepten naýqasqa aralas torakolaparotomııa operasııasyn jasaýǵa sheshim qabyldandy. Bul – oń jaq plevralyq qýysta lımfodısseksııamen ishki keýdelik ezofagastroanastomozdy qura otyryp, asqazan plastıkasy bar óńeshtiń sýbtotaldy dıstaldy rezeksııasy. Kókbaýyrdyń tósegin, ishek asty keńistigin, oń jaq plevralyq qýysty drenajdaý. Tórt saǵatqa sozylǵan operasııany hırýrg Maqsat Shámshenov jasaǵan.
Otadan keıingi gıstologııalyq qorytyndyda kesilgen shetterden isiktiń ósýi anyqtalǵan joq. Naýqasqa sáýlelik jáne hımııalyq terapııamen emdeýdiń eki kýrsy júrgizilgen. Qazir naýqas em alýdy jalǵastyryp jatyr.
– Onkologııalyq aýrýlar áleýmettik mańyzy bar dert qataryna jatady. Mundaı dıagnozben aýyrǵan naýqastarǵa medısınalyq kómek, onyń ishinde dárilik qamtamasyz etý MÁMS boıynsha saqtandyrylǵan statýsynyń bar nemese joqtyǵyna qaramastan kórsetiledi, – deıdi «Áleýmettik medısınalyq saqtandyrý qory» KeAQ Atyraý oblysy boıynsha fılıalynyń dırektory Baıtolla Ǵazızov.
Atyraý oblysy
