Kámelet jasyna tolmaǵan jasóspirimderdiń qaýipsizdigin qamtamasyz etý maqsatynda ótkiziletin turaqty reıdtik tekserý jumystary barysynda 42 jasóspirim anyqtaldy. Nege ekeni belgisiz, jylda qyrkúıek aıynyń basynda polısııa qyzmetkerleri tekserý júrgizetinin bile tura, ata-analar balalaryn túngi ýaqytta baqylaýǵa qulyqsyz bolyp otyr. О́kinishtisi, bul jaǵdaı jyl saıyn qaıtalanady.
Josparlanǵan is-sharalardy iske asyrý barysynda ıývenaldy polısııa ınspektorlary turǵyn úılerdiń aýlalarynda, saıabaqtarda jáne jastar kóp jınalatyn oryndarda reıdtik is-sharalar ótkizgen bolatyn. Nátıjesinde, oıyn-saýyq otaýlarynda qorqor tartyp otyrǵan jetkinshekter quqyq qorǵaý salasy qyzmetkerleriniń quryǵynan qutylyp kete almady.
Tekserý barysynda belgili bolǵandaı, ishki ister organdaryna 42 kámeletke tolmaǵan jasóspirim jetkizilip, 46 ata-ana men zańdy ókil ákimshilik jaýapkershilikke tartyldy. Kámeletke tolmaǵandardyń túngi mezgilde oıyn-saýyq oryndarynda bolǵany úshin 1 meıramhana qojaıyny jaýapkershilikke tartyldy.
«Jańa oqý jylynyń bastalýyna oraı barlyq kóńil kóteretin oıyn-saýyq oryndary men jastar jıi jaǵalaıtyn jerler quqyq qorǵaý organdarynyń jiti nazarynda bolady. Bizdiń mindetimiz – balalardyń qaýipsizdigin qamtamasyz etý jáne jasóspirimder jasaǵan jáne olarǵa qatysty quqyq buzýshylyqtardyń aldyn alý. Ata-analardan balalarynyń bos ýaqytyn jáne baılanys ortasyn qadaǵalaýdy suraýdaı surap kelemiz. Alaıda nátıje joq. Balalardyń eshbir qadaǵalaýsyz bolýy zańǵa qaıshy áreketter jasaýǵa sebep bolýy múmkin», deıdi Jambyl oblysy polısııa departamenti jergilikti polısııa qyzmeti basqarmasy ıývenaldyq polısııa tobynyń aǵa ınspektory, polısııa maıory Oksana Semenova.
Jambyl oblysy
