«Aqqyz» degen atpen tanymal Múgilsin Ahmetqyzy qazaqtyń aty ańyzǵa aınalǵan dombyrashysy ári ánshisi. Onyń «Qosbasar», «Sarjaılaý», «Bestóre» syndy Táttimbet kúılerin oryndaýy erekshe. Múgilsin Ahmetqyzy «Qaıran elim», «Aqqyz», «Qosbasar» jáne basqa da tamasha kúılerdi jalǵastyrýshy retinde Qazaqstan kompozıtorlarynyń shyǵarmashylyǵyna orasan úles qosty. Onyń shákirtteriniń biri Maǵaýııa Hamzındi de el úlken talant dep tanıdy.
Kesh sahnasynda Aqqyz ben Maǵaýııa Hamzınniń – «Qosbasar», «Jetim qyz», «Qaıran elim», «Ǵaryshkerler valsi», «Belgisiz soldat», «Jaılaý» syndy shyǵarmalary oryndaldy. Ǵ.Jubanova atyndaǵy Memlekettik ishekti aspaptar kvarteti Qazaqstannyń eńbek sińirgen qaıratkeri Ernar Myńtaevtyń jetekshiligimen óner kórsetti. Fılarmonııa kúıshileri Arman Jaıymov pen Qýat Shildebaevtyń zamanaýı ınterpretasııasynda Táttimbet pen Tólegen Mombekovtiń kúılerin oryndady.
«Saryarqa» ansambliniń kórkemdik jetekshisi Toǵjan Jahın sazdy keshti tarqata kele dástúrli mýzykanyń tarıhyna toqtaldy.
«Eki bıik tulǵany bir konsertte biriktirgenimiz beker emes. О́ıtkeni Aqqyz Maǵaýııa Hamzınniń tálimgeri. Ekeýi de Arqa oryndaýshylyq dombyra mektebiniń muragerleri, shertpe dástúrin jalǵastyrýshylar. Eki kúıshi de repertýaryn ózderi shyǵarǵan kúılermen toltyrdy. Konsertte «Saryarqa» ansambliniń oryndaýynda Aqqyz ben Maǵaýııa Hamzınniń kúıleri men shertpe dástúriniń jarqyn solısteri – Janǵalı Júzbaev, Qaırat Aıtbaev, Marat Nókeev, Erbolat Sapýanov, Amangeldi Sádýov, Rústem Núrkenov óner kórsetti. Sondaı-aq keshte arnaıy shaqyrylǵan qonaqtar – Aqqyzdyń shákirti Qalken Qasymov pen kúıshi, Aqqyz kúılerin oryndaýshy Bolat Tákishev boldy», deıdi ol. Sondaı-aq onyń aıtýynsha, HH ǵasyr qazaq kúıleri úshin qıyn kezeń boldy. Arqanyń kóptegen ónerpazy qýǵyn-súrgin, asharshylyq, soǵys órtinde qyryldy.
«Sembek, Táttimbet sekildi kúıshiler ketip qaldy. Sondyqtan Aqqyz Arqa kúıleriniń murageri bolyp qalady. Dına sheshemiz Qurmanǵazynyń kúılerin jetkizgen bolsa, Aqqyz Táttimbettiń mektebin jetkizdi. Al Maǵaýııa Hamzınmen biriktirgen sebebimiz, Maǵaýııa Aqqyzdyń shákirti, sodan keıin ol óziniń oryndaýshylyq stılin qalyptastyrýshy. Burynǵy kúıshiler notamen emes, quıma qulaq arqyly úırengen edi. Sol kezde quıma qulaq kúı oınaǵan kezde, 100 % oryndaý múmkin emes, 70% oryndaı alady. Sondyqtan óziniń tabıǵatymen, saýsaqtarynyń ereksheligimen ózindik bir stıl qalyptastyrady. Tarıhtan bilemiz, Qurmanǵazynyń stılin Dına jalǵastyrsa, Dınanyń óziniń bólek mektebi bar. Sol sekildi, Aqqyz da óz mektebin qalyptastyrdy», dep atap ótti T.Jahın.
