Mýzeıdegi mektep kúnderi

«Búginde óskeleń urpaqtyń keleshegin qam­tamasyz etý, ult sapasyn jaqsartý – aıryqsha mańyzǵa ıe. 2022 jyl Prezıdent Qasym-Jomart Toqaevtyń Jarlyǵymen Balalar jyly dep jarııalandy. Osy rette vedomstvo aıtýly merekege oraı orta bilim beretin mektepterdiń oqýshylary men tarıh páni muǵalimderi úshin «Mýzeıdegi mektep kúni» jańa jobasyn usynyp otyr. Jobanyń aty aıtyp turǵandaı, jas jetkinshekterimiz mek­teptegi josparly sabaqtarynan bólek, san taraý tarıhqa murajaı arqyly da den qoıady. Ulttyq mýzeı ekspo­zısııasyndaǵy jádigerler oqýshylarymyz úshin taptyrmas qundy materıal­dar deýge bolady. Tas dáýirinen bastap Táýelsiz Qazaqstan tarıhyna deıin syr shertetin Ulttyq mýzeıge jastarymyz basqa ýaqytta da jıi kelgeni jón», dedi mınıstr.

Onyń aıtýynsha, aldaǵy ýaqytta ınteraktıvti dáristerdi elimizdiń basqa da óńirlerine taratý josparlanyp otyr.

Vedomstvo málimetine qaraǵanda, sabaqtar offline jáne online formatta ótedi. Jobanyń offline formaty Ulttyq mýzeıdiń ekspozısııalyq zaldarynda júredi. Interaktıvti sabaqtardy mýzeı­diń zertteýshi ǵalymdary, ekskýrsııa jetek­shileri Nur-Sultan qalasy ákimdiginiń Bilim bas­qarmasyna qarasty orta mek­tepterdiń tarıh páni muǵalimderimen birigip ótkizedi. Ár sabaq­tyń uzaqtyǵy 35-45 mınýt araly­ǵynda bolady. Sabaq kezinde oqýshylar mýzeı ekspozısııala­ryndaǵy eksponattardy ortaǵa alyp tanysady. Eksponattardy (kóshirmelerin) ustap kórip, jaqyn tanysýyna múmkindik jasalady. Ár beısenbi saıyn túske deıin 2 sabaq jáne tústen keıin 2 sabaq ótiledi.

Jobanyń online formaty aldyn ala túsiril­gen beınesabaqtar arqyly júzege asyrylady. Beı­nesabaqtardyń baǵdarlamasyn mýzeı maman­dary daıyndaǵan. Ár sabaqtyń uzaq­tyǵy 5-7 mınýt aralyǵynda bolady. Daıyn sabaqtar mek­tepterdegi oqý baǵdarlamasynyń kúntizbesine sáıkes Ulttyq mýzeıdiń resmı saıtyna salynady. Beıne­sabaqtardyń qurylymy júrgizýshiniń tanys­tyrý sózinen, grafıkadan jáne ekspozısııalarǵa sholýdan turady. Online format barsha Qazaqstan oqý­shylaryn qamtýǵa múmkindik beredi. Al sabaq­tar­dyń taqyryby men mazmuny Oqý-aǵartý mınıs­trligi bekitken oqý baǵdarlamasyna sáıkes keledi.