150 kılolyq alyp Almatyda aıqasady

34 jastaǵy AQSh-tyń alyby áýelde taı boksy men kıkboksty jetik meńgerip, eleýli tabystarǵa qol jetkizdi. Tipten Japonııadaǵy K-1 týrnıriniń Gran-prıinde de aıqasty. Keıin­nen boksqa aýysty. Kezinde ol dańqty Mırko KroKoppen kúsh synasyp, Vladımır Klıchko, Taıson Fıýrı jáne taǵy basqa dúleı kúsh ıeleriniń sparrıng-áriptesi boldy. О́zi kásipqoı rıngte 26 kezdesý ótkizip, birde-bir ret jeńilgen emes. Djarrell 20 qarsylasyn nokaýtqa jiber­di. Onyń áli tek óziniń otandasy Djoı Daveıkoǵa ǵana jet­pedi. 2013 jyldyń basynda ótken bul kezdesýde teń esep tir­keldi. Ke­zinde Mıller Ahror Mý­ralımov, Derald Vashıngton, Marıýsh Vah, Joan Dıýopa, Tomash Adamek, Bogdan Dıný syndy tanymal boksshylardan basym tústi.

2019 jyldyń aqpan aıynda Djarrell Mıller chempıondyq táj úshin ulybrıtanııalyq Entonı Djoshýamen judyryqtasýǵa tıis edi. Alaıda amerıkalyq alyp dopıng-tekserýden óte almady. Sonyń kesirinen ol jekpe-jek ótpeı qaldy. Bıyl jazda bas-aıaǵy bir aıdyń ishinde Mıller eki jekpe-jek ótkizip úlgerdi. 23 maýsymda argentınalyq Arıel Esteban Brakamonteni upaı sanymen utsa, 23 shildede mek­sıkalyq Derek Kardenasty tórtinshi raýndta esinen tandyrdy. Árıne, oǵan tańdanýǵa bolmaıdy. 

Alataý baýraıynda Mago­medrasýl Medjıdov ta óz ónerin ortaǵa salady. Osydan toǵyz jyl buryn Almatyda ótken álem chem­pıonatynyń fınalynda ol bizdiń Ivan Dychkony aýyr nokaýtqa jibergenin jankúıerler umyta qoıǵan joq. 27 qyrkúıekte Ázer­baı­jannyń 26 jas­qa tolǵaly otyrǵan alyby áýesqoı rıngti armansyz shaıqady. Ol – London Olımpıadasynyń qola júldegeri, álemniń úsh dúrkin chempıony, Eýropa chempıonaty men Islam yn­tymaqtastyǵy oıyndarynyń jeńimpazy. 2009 jyldan beri Med­jıdov kásipqoılar arasynda kúsh synasyp júr. Ázirge tórt kez­desý ótkizip, úsheýinde jeńiske jetti.

Almatydaǵy kásipqoı boks keshinde Dáýren Eleýsinov, An­ge­lına Lýkas jáne taǵy basqa otan­dyq bylǵary qolǵap she­ber­­le­rimiz sharshy alańǵa kóteriledi. Sondaı-aq shet memleket­terden kelgen birqatar tanymal boksshynyń da ónerin tamashalaımyz.