Vedomstvo málimetinshe, 2023 jyldan bastap Qorǵanys mınıstrligi áskerı mindettiler men áskerge shaqyrylýshylardy esepke alýdy elektrondyq formatqa kóshirýdi josparlaýda. Bul ishki kóshi-qon kezinde azamattardy áskerı esepke qoıý jáne odan shyǵarýdyń qajettiligin alyp tastaýǵa múmkindik beredi.
Budan ózge, elde sıfrlandyrý prosesteriniń damýyna oraı azamattardyń áskerı qyzmetke qatynasy, ony ótkerý jáne áskerı esepke alynýy týraly málimetter «e-gov» portalyndaǵy jeke kabınette kórsetiletin bolady. Qajet bolǵan jaǵdaıda ony memlekettik organdar paıdalanýy nemese suratýy múmkin.
«Osyǵan súıene otyryp, áskerı bılet pen tirkeý kýálikterin paıdalanýdyń oryndylyǵy birqatar jaǵdaıda ózekti bola bermeıdi. Sonymen qatar áskerge shaqyrý jáne áskerı qyzmetke kirý kezinde áskerı bıletter buryn belgilengen tártippen beriledi», dedi Uıymdastyrý-jumyldyrý jumystary departamentiniń bastyǵy – Qarýly kúshter Bas shtaby bastyǵynyń orynbasary general-maıor Sáken Júsipov.
Mamandardyń pikirinshe, usynylǵan jańalyqtar qarjyny únemdeýge yqpal etedi. Blankilerdi saqtaý, shyǵarý jáne berý jergilikti áskerı basqarý organdary qyzmetkerleriniń shyǵyndaryn da edáýir azaıtpaq. Odan ózge ákimshilik quqyq buzýshylyqtar quramynan joǵaltý nemese búldirý faktilerin alyp tastaýǵa múmkindik beredi. Bul qoldanystaǵy zańdy izgilendirý jolyndaǵy kezekti qadam bolmaq.
