Aıdos óz isiniń mamany retinde áriptesterdiń esinde máńgi qalady. TJM qaıtys bolǵan órt sóndirýshiniń otbasyna jan-jaqty kómek pen qoldaý kórsetedi. Abaı oblysy TJ departamentiniń psıhologtary órt sóndirýshiniń týystaryna kómek kórsetýde.
2022 jyldyń 7 qyrkúıeginde 13 saǵat 35 mınýtta 112 kezekshi pýltine Abaı oblysy Jarma aýdanynyń Bojyǵur aýyldyq okrýgi Birinshi aýylynyń ýchaskesinde qurǵaq shóp janyp jatqany týraly habarlama kelip tústi. Shaqyrý ornyna №22 órt sóndirý beketiniń qyzmetkerleri jiberildi.
Shaqyrý ornyna kelgen órt sóndirýshiler dereý órtti sóndirýge kiristi.
Tabıǵı órtti sóndirý kezinde órt sóndirý avtosısternasy Baqyrshyq taý-ken óndirý kásipornynyń órt sóndirýge sý jetkizetin KAMAZ (12 tekshe metr) sý aldy. Osy kezde jel baǵytynyń ózgerýi saldarynan órt avtosısternaǵa qaraı aýmaqty sharpydy. Tehnıkaǵa arnalǵan evakýasııalaý joldary barlyq jaǵynan otqa oranyp, bıiktigi eki metr qaraǵaı aǵashy órtendi.
О́rt sóndirýshiler jaǵdaıdy baǵalap, órt-tehnıkalyq qarý-jaraqty jınaýdy toqtatyp, shuǵyl evakýasııalaýǵa kiristi. Avtosısterna men KAMAZ sý tasymaldaýshy kóligi tolyǵymen janyp ketti.
Nátıjesinde órt sóndirý beketiniń bólimshe komandıri Amangeldi Turlybekov pen órt sóndirý beketiniń júrgizýshi-qyzmetkeri Aıdos Toǵyzbaev, órt sóndirýshi-qutqarýshy Nurlan Salımjan túrli dárejedegi kúıik alyp, Jarma aýdany Shar qalalyq aýrýhanasyna jatqyzyldy.
О́rt aýmaǵy 500 ga qurady, órt 8 qyrkúıekte saǵat 5.40-ta sóndirildi. О́rtti sóndirýge Tótenshe jaǵdaılar departamenti men jergilikti atqarýshy organdardyń jeke quramynan 14 adam men 5 birlik tehnıka jumyldyryldy. Qazirgi ýaqytta oqıǵanyń mán-jaıy anyqtalýda.
Aıdos qatty kúıik alyp, jaraqatynan aýrýhanada kóz jumdy. Qyzmettik boryshyn oryndaý kezinde kórsetken batyldyǵy men janqııarlyq erligi úshin azamattyq qorǵaý serjanty Aıdos Erulanuly Toǵyzbaev qaza tapqannan keıin III dárejeli «Aıbyn» memlekettik nagradasyna usynyldy.
Aıdos 36 jasta edi. Azamattyq qorǵaý organdarynda 2019 jyldan bastap qyzmet etken. Onyń artynda áıeli men 5 balasy qaldy.
