Grek-rım kúresinde TOP-10 balýannyń qataryna Qazaqstannyń eki ókili ǵana enip otyr. Olar – Qorlan Jaqansha men Almat Kebisbaev. 55 kılo salmaqta saıysqa túsip júrgen 30 jastaǵy Jaqansha 2019 jyly Nur-Sultandaǵy álem chempıonatynda fınalǵa deıin jetip, jankúıerlerdiń nazaryn ózine aýdarǵan bolatyn. Odan bólek, ol Azııa birinshiliginde úsh ret úshinshi orynǵa taban tiredi. Qorlan qazirgi kezde jetinshi satyǵa jaıǵasty. 67 kılo salmaqta úzdik ondyqty túıindep turǵan 34 jastaǵy Almat Kebisbaev jaıynda uzaq áńgimeleýge bolady. Ol – álem chempıonatynyń bes jáne Azııa oıyndarynyń eki dúrkin júldegeri, Azııa birinshiliginiń fınalynda bes márte beldesip, eki altyn men úsh kúmis medal oljalady. Biraq Belgradqa baratyndardyń tiziminde ekeýi de joq. Sebebi bul joly ulttyq qurama bapkerleri asa jeńil salmaqta Amanǵalı Bekbolatovty boz kilemge shyǵarýdy jón kórgen eken. Al Almat bolsa, byltyr úlken sporttan qol úzip, bul kúnderi elimizdiń jasóspirimder quramasyn jattyqtyrýda. Mine, úzdikter tiziminen Qazaqstannyń osy eki «klassıginiń» ǵana esimderin keziktirdik. Árıne, bul qýanatyndaı jaǵdaı emes.
Qazirgi kezde Ázerbaıjan balýandarynyń qarqyny óte kúshti. Qap taýy bókterinde ornalasqan bul memlekettiń 10 balýany úzdikter sanatynda. Solardyń ekeýi álemdik reıtıngte kósh bastap tur. Olar – Sanan Sýleımanov (77 kılo) men Rafıg Gýseınov (82 kılo). Alǵashqysynyń álem chempıonatynyń kúmis júldegeri, Eýropa chempıony degen ataǵy bar. Ekinshisi – Tokıo Olımpıadasynyń qola júldegeri, álem chempıony jáne Eýropa birinshiliginiń úsh dúrkin jeńimpazy. Parsy eli pehlevandary Mohammadreza Geraeı (67 kılo) men Mohammadhadı Saravıge (87 kılo) de teń keler eshkim joq. Geraeı sońǵy úsh jyldaǵy baıraqty básekelerdiń barlyǵynda jeńis toıyn toılady. Ol Olımpıada, álem jáne Azııa chempıony atandy. Saravı Tokıodaǵy oıyndarda qola alsa, álem jáne Azııa birinshilikterinde qarsylas shaq keltirmedi. Grýzııa quramasynyń da qos qyrany – Lerı Abýladze (63 kılo) men Iаkob Kadjaıa (130 kılo) UWW reıtınginde aldaryna jan salar emes. Sondaı-aq japonııalyq Ken Matsýı (55 kılo), moldovalyq Vıktor Chobaný (60 kılo), lıtvalyq Krıstýpas Shleıva (72 kılo) jáne serbııalyq Zýrabı Datýnashvılı (87 kılo) syndy dúldúlder óz salmaqtarynda dara tur.
Álemdik reıtıngte TOP-10-dyqqa myna elderdiń grek-rım kúresi sheberleri enip otyr: Ázerbaıjan –10, Reseı – 9, Túrkııa – 8, Iran – 7, Grýzııa, Germanııa, Majarstan – 5, Japonııa, Armenııa, Moldova, Polsha – 4, Qyrǵyzstan, Ýkraına, Lıtva, Norvegııa – 3, Qazaqstan, AQSh, Kýba, Fınlıandııa, Serbııa – 2, Qytaı, Úndistan, Ońtústik Koreıa, Mysyr, Shvesııa, Estonııa, Belarýs, Danııa, Aljır, Bolgarııa, Italııa jáne Chılı – 1.
Erkin kúrestegi jaǵdaıymyz «klassıkterge» qaraǵanda birshama jaqsy. Qazirgi kezde Qazaqstannyń alty birdeı óreni úzdik ondyqtyń qatarynda. Olar – Nurıslam Sanaev (57 kılo) – 6-oryn, Azamat Dáýletbekov (86 kılo) pen Oleg Boltın (125 kılo) – 7-oryn, Talǵat Syrbaz (70 kılo) – 8-oryn, Iýsýp Batyrmurzaev (125 kılo) – 9-oryn jáne Ádilet Daýlynbaev (92 kılo) – 10-oryn.
Kúrestiń bul túrinde AQSh-tyń aldyna eshkim túse alar emes. Bul eldiń 10 balýany TOP-10-dyqqa kirgeni bylaı tursyn, solardyń tórteýi álemdik reıtıngte kósh bastap tur. Olar – Olımpıadanyń qola júldegeri, álem chempıony Tomas Gılman (57 kılo), Olımpıadanyń qola júldegeri, álemniń úsh dúrkin chempıony Kaıl Deık (74 kılo), Olımpıada chempıony, álem birinshiliginiń bes dúrkin jeńimpazy Djordan Barroýz (79 kılo), Olımpıada chempıony jáne fınalısi, álemniń eki dúrkin chempıony Kaıl Snaıder (97 kılo). Sonymen qatar olardyń árqaısy Panamerıka oıyndary men birinshiliginde san márte top jarǵanyn da aıta ketken abzal. Myqtylardyń aldyńǵy leginde Irannyń eki balýany bar. Rıo Olımpıadasynda altyn, Tokıoda kúmis alyp, álemniń úsh dúrkin chempıony atanǵan Hassan Iаzdanı (86 kılo) men álem chempıony Kamran Gasempýrge (92 kılo) búgingi tańda teń keler eshkim joq. О́zge salmaq dárejelerinde reseılik Abasgadjı Magomedov (61 kılo), mońǵolııalyq Týlga Týmyr Ochır (65 kılo), qyrǵyzstandyq Ernazar Ahmatalıev (70 kılo) jáne grýzııalyq Geno Petrıashvılı (125 kılo) syndy sańlaqtar dara tur.
TOP-10 erkin kúres sheberleri arasynda myna memleketterdiń marqasqalary bar: Reseı –11, AQSh – 10, Iran – 9, Túrkııa – 7, Qazaqstan, Ázerbaıjan – 6, Úndistan, Grýzııa – 5, Belarýs, Mońǵolııa – 4, Armenııa, Japonııa, Qyrǵyzstan – 3, Germanııa, Makedonııa, Slovakııa, Mysyr, Italııa, Ýkraına – 2, Bolgarııa, Brýneı, Pýerto-Rıko, Majarstan, Polsha, Moldova, О́zbekstan, Grekııa, Kamerýn, Fransııa, Kanada jáne Kýba – 1.
Áıelder kúresinen Japonııa qurama komandasynyń 14 múshesi úzdik ondyqtyń tizimine engenimen, olardyń bireýine de kósh bastaý baqyty buıyrmady. Bul rette AQSh-tyń asyǵy alshysynan túsip tur. Búgingi tańda amerıkalyq balýandardyń tórteýi top jarýda. Olar – Sara Hıldebarndt (50 kılo), Helen Lýıza Marýlıs (57 kılo), Forrest Enn Molınarı (65 kılo) jáne Adelaın Marııa Greı (76 kılo).
Sońǵy ýaqytta Qyrǵyzstannyń qyzdary keremet nátıje kórsetip júrgeni barsha jurtqa málim. О́zderiniń óreli óneri men orasan zor tabystarynyń arqasynda bul kúnderi Aısulý Tynybekova (62 kılo) men Meıirim Jumanazarova (68 kılo) óz salmaq dárejeleri boıynsha UWW reıtınginde jeke-dara kósh bastap keledi. Al asa aýyr salmaqta saıysqa túsip júrgen Aıperi Medetqyzy ekinshi oryndy ıelenýde. Bul alaqandaı ǵana qyrǵyz eli úshin kermet jetistik ekeni sózsiz.
Qazaq qyzdary arasynda úzdikter tiziminen jalǵyz ǵana Jámıla Baqbergenovany keziktirdik. Desek te Alashtyń arýy qalyń toptyń arasynda emes, 72 kılo salmaqta kúresetin burymdylardyń kósh basynda. Tipti ataǵy alysqa jaıylǵan túrkııalyq Býse Tosýn, germanııalyq Anna Shell, japonııalyq Masako Fýrýıtı, fransııalyq Vanessa Veskan, mońǵolııalyq Davaanasan Enh-Amar, úndistandyq Dıvııa Kakran syndy balýandardyń ózderi Baqbergenovanyń artynan syǵalap qaldy. Myqtylar kóshin bastap turǵan Jámılaǵa biz aldaǵy jarysta da jarqyn jeńis tileımiz. Sondaı-aq mońǵolııalyq Bolotýıa Bat-Ochır (53 kılo), germanııalyq Nına Nemmer (55 kılo) jáne úndistandyq Sarıta Sarıta (59 kılo) tórtkúl dúnıeniń teńdessizi dep tanylýda.
TOP-10 balýandardyń tizimine engenderdiń sany jaǵynan Japonııanyń alda turǵanyn joǵaryda aıttyq. Odan keıingi oryndarǵa myna komandalar jaıǵasty: AQSh – 10, Mońǵolııa – 8, Bolgarııa, Ýkraına – 6, Reseı, Úndistan – 5, Kanada, Belarýs, Germanııa – 4, Rýmynııa, Qytaı, Moldova, Shvesııa, Polsha, Túrkııa, Qyrǵyzstan – 3, Brazılııa, Ázerbaıjan – 2, Ekvador, Meksıka, Týnıs, Nıgerııa, Chehııa, Qazaqstan, Fransııa, Mysyr jáne Estonııa – 1.
10 qyrkúıekte shymyldyǵy túriletin álem chempıonatynda alǵashqy bolyp boz kilemge grek-rım kúresi sheberleri shyǵady. Olar úsh kún boıy aıqasady. 12 qyrkúıekte burymdylar ózderiniń alǵashqy júldelerin sarapqa salady. Al sońǵy kúnderi erkin kúres sheberleriniń ónerin tamashalaımyz. Atalǵan doda 18 qyrkúıekte óz máresine jetedi.
