Kýbok úshinshi márte Qazaqstanda

Qazaqstandyqtar Kreml kýbogyna sońǵy jyldary turaqty qatysa bastady. Atap aıtar bolsaq, buǵan deıin eki birdeı talantty sportshymyz Kreml kýbogyn qanjyǵasyna baı­la­ǵan. Qanybek Saǵyndyqov – 2005, al Álıhan Qaraneev 2010 jyly jeńis tuǵy­ryna kóterildi. Endi, mine, úshinshi már­te Kreml kýbogy Qazaqstanǵa keldi.

Jaqynda ǵana Máskeýde aıaqtalǵan Kreml kýbogyna álemniń 9 elinen, atap aıtqanda, Reseı, Qazaqstan, Qyr­­ǵyz­stan, Ýkraına, Belarýs, Ońtústik Ko­reıa, О́zbekstan, Moldova, Arme­nııa­­dan 392 bılıardshy keldi. Bular­dyń bári óz elinde báıgeni shappaı alyp júrgender. Dúbirli doda 3 túri (biriktirilgen pıramıda, erkin pıramıda, basseın) boıyn­sha ótti.

Qazaqstannan barǵan 11 sportshy, onyń ishinde ulttyq quramanyń múshesi, eki dúrkin álem chempıony, halyqaralyq dárejedegi sport sheberi Ernar Chımbaev bul joly da taktıkalyq sheberlik tanyta bildi. Ol qarsylastaryn basym­dyqpen jeńdi. Aqtyq synda qyr­ǵyz­standyq Dastan Lepshaqovty 5:2 ese­bimen utyp, mártebeli kýbokty ıe­len­di. Eki úshinshi orynǵa reseılik pen qyr­ǵyzstandyq ıe boldy.

Bılıard sporty elimizde qa­rysh­­­tap damý ústinde. Qazaqstan Res­pýb­­­lıkasynda bılıard sporty­nyń ór­kendeýine Bılıard sporty federa­sııa­synyń prezıdenti Ańsary Qa­raneev erekshe úles qosyp keledi. Bul kúnderi atalǵan oıyn túri elimizdiń barlyq óńirinde damyp, onymen shuǵyldanatyndar qatary kún saıyn arta túsip otyr. Máselen, О́skemende sońǵy jyldary birneshe dúbirli jarys ótti. Respýblıka bılıard sporty federasııasynyń Shyǵys Qazaqstan oblystyq fılıalynyń dırektory Serik Aqtanovtyń bastamasymen О́skemende Azııanyń ashyq chempıonaty, jaqynda ǵana qoǵam qaıratkeri, ja­zýshy Qabdesh Juma­dilovti eske alýǵa arnalǵan týrnır ótti. Reti kel­gende aıta ketý kerek, elimizdiń shyǵy­syndaǵy federasııany da 2008 jyly Ańsary Qaraneev ashqan bolatyn. Onyń bastamasymen ár óńirde halyq­aralyq týrnırler ótip turady. Kreml kýbogynyń syrtynda álem, Eýropa birinshilikterinde jeńip alǵan júldeler de qomaqty.

Endi Ernar Chımbaev týraly aıta keteıik. Ańsary Qaraneevtiń pa­ıym­­daýynsha, Ernar sııaqty ultyn súıetin, patrıot azamattar el namy­syn abyroımen qorǵaı biledi. Ernar Sábıtuly 2010, 2012 jyldary bılıardtan álem chempıony atandy. Qazaqstannyń birneshe dúrkin chempıony, absolıýtti jeńimpaz. Qa­zaq­stan men Túrikmenstannyń qura­ma komandalaryn jattyqtyryp júr. Ernardyń izbasarlary aldaǵy ýaqytta da Qazaqstannyń Kók týyn jelbirete bermek.

Ońdasyn ELÝBAI,

Qazaqstannyń qurmetti sport qaıratkeri