«Shańyraq» balalar aýylynyń dırektory Gúlsara Botataevanyń aıtýynsha, byltyr munaı kompanııasynyń demeýshiligimen Jaıyq ózeniniń jaǵalaýynan segiz otbasyna arnalǵan turǵyn úıler salynǵan edi. Munda ózin ózi taný jáne áleýmettik beıimdeý ortalyǵy bar. Zamanaýı konferens-zalda balalardyń onlaın-rejimde oqýyna múmkindik jasalǵan. Balalar Atyraý qalasyndaǵy úsh mektepke qatynap oqıdy.
– Balalar bos ýaqytyn tekke ótkizbeıdi. On jyl buryn qoıan ósirýdi qolǵa alǵan edik. Qazir 12 qoıan, 6 taýyq pen 18 balapan asyrap otyrmyz. Demeýshilik kómek arqyly 2014 jyly tigin sheberhanasynda qyzdar sahnalyq qoıylymdarǵa, ózge de is-sharalarǵa arnalǵan kıimderdi ózderi tigedi. Sulýlyq salony bar. Endi aldaǵy ýaqytta uldarǵa arnalǵan aǵash óńdeý sheberhanasy ashylady. Qazir úsh stanok satyp aldyq, – deıdi Gúlsara Botataeva.
Jaqynda munda jylyjaı ashyldy. Onyń qurylysyna oblystyq isker áıelder keńesi uıytqy bolǵan. Keńes jetekshisi Gúljan Muhataevanyń aıtýynsha, jylyjaı qurylysyna 2 mln teńge jumsalǵan.
– Bul jylyjaı bıylǵy Balalar jylyna oraı qolǵa alyndy. Qurylysy maýsym aıynda bastaldy. Jylyjaıdyń aýmaǵy 50 sharshy metrdi quraıdy. Jylyjaı ashýdaǵy maqsatymyz – otbasy úlgisindegi balalar aýylynyń tárbıelenýshilerin eńbekke baýlýǵa yqpal etý. Sol sebepten balalarmen birge kókónisterdiń kóshetin egýge keldik, – deıdi Gúljan Muhataeva.
Atyraý oblysy
