Atap aıtsaq, Nazym Qyzaıbaı (50 kılo) fınlıandııalyq Pıhla Kaıvo-Ojany oısyrata utty. Madına Nurshaeva (66 kılo) lıtvalyq Aýsteıa Aýchıýteden aılasyn asyrdy. Darıǵa Shákimova (66 kılo) norvegııalyq Medelına Angelsendi esh qınalmaı jeńdi. Alýa Balqybekova (48 kılo) serbııalyq Snejana Sılkoıchqa san soqtyrsa, Sánııa Sultanqyzy (57 kılo) chehııalyq Katerına Kavajdovany qapy qaldyrdy. О́kinishke qaraı, Aıdana Zabynbekova (60 kılo) chehııalyq Lenka Bernardovaǵa jáne Rıma Volosenko (60 kılo) chılılik Valentına Býstamantege ese jiberdi.
Ispanııanyń Sevılıa qalasynda jalaýy jelbiregen halyqaralyq týrnırde qazaqstandyq tennısshi Tımofeı Skatov tabysty óner kórsetýde. Keshe ol ıspanııalyq Havera Barranko Kosanony 6:2, 3:2 esebimen utyp, shırek fınalǵa joldama aldy. Dál sol mejede Taılandtyń Nonthabýrı qalasynda taıpeılik Reı Homen juptasyp oınap jatqan Grıgorıı Lomakınniń de qarqyny jaman emes. Keshe bul jup kort qojaıyndary Kredıt Chaıarın men Noppadol Noıkoradan basym tústi – 6:1, 7:6.
6-11 qazan aralyǵynda Almatyda gandboldan áıelder arasyndaǵy Azııa chempıonatynyń jalaýy jelbireıdi. Osydan tórt jyl buryn sary qurlyqtyń úzdikteri Alataý baýraıynda bas qosqan bolatyn. Sol jarysta «Almatynyń» arýlary aldyna jan salmaı, altynnan alqa taqqany esimizde. Kúmis medaldy Qyzylordanyń «Qaısary» ıelense, «Astana» qolaǵa qol sozdy. Jerlesterimizden bólek, bul jarysta О́zbekstannyń «Ýzbechka», Irannyń «Larestan» jáne Úndistannyń «T-Sports» klýbtary óner kórsetti. Al onyń aldynda Qyzylorda men Tashkentte uıymdastyrylǵan eki klýbtyq chempıonatta jergilikti «Qaısar» men AGMK klýbtary bas júldeni oljalady.
Fýtzaldan Qazaqstan chempıonatyna jańa eki komanda qosyldy. Olar – Shymkenttiń «Ordabasysy» men Taldyqorǵannyń «Jastary». Osylaısha, 2022/23 jylǵy maýsymda joǵaryda atalǵan qos ujymnan bólek, «Qaırat» (Almaty), «Aıat» (Rýdnyı), «Kaspıı» (Aqtaý), «Atyraý», «Baıterek» (Oral), «Aqtóbe», «Astana» (Nur-Sultan) jáne «Rahmet» (Aqtóbe) klýbtary chempıondyq ataq úshin talasady. Bul jarys 24 qyrkúıekte bastalyp, kelesi jyldyń maýsym aıynda óz máresine jetedi.
13 qyrkúıekte Almatyda ústel tennısinen «WTT Contender Almaty» dep atalatyn halyqaralyq týrnırdiń shymyldyǵy túrilip, 28 memleketten kelgen 140 sportshy baq synaıtyny jaıynda biz buǵan deıin de habarlaǵanbyz. Júlde qory 75 000 AQSh dollaryn quraıtyn dúbirli dodada Qazaqstannyń týy astynda kimderdiń óner kórsetetini kúni keshe belgili boldy. Sóıtip, Kırıll Gerasımenko, Sarvınoz Mırqadyrova, Alan Qurmanǵalıev, Aıdos Kenjeǵulov, Anastasııa Lavrova, Záýresh Aqasheva, Irısbek Artýkmetov, Ánel Baqyt (halyqaralyq dárejedegi sport sheberleri), Eskendir Harkı, Erık Raıter, Vladıslav Zaharov, Denıs Jolýdev, Dastan Kenjeǵulov, Baqdáýlet Ákimáli, Saǵantaı Qurmambaev, Aııa Álimbaeva, Anjelına Romanovskaıa, Araı Áshkeeva, Alsý Saparova, Janerke Qoshqymbaeva, Aleksandra Smırnova jáne Gúlchehra Hýseınova (sport sheberleri) syndy sportshylar Alataý baýraıynda el namysyn qorǵaıdy.
Daıyndaǵan
Ǵalym SÚLEIMEN,
«Egemen Qazaqstan»
