Kórkem gımnastıkadan álem chempıonaty 1963 jyldan beri úzdiksiz uıymdastyrylyp keledi. Alǵashqy jarysty Chehııanyń Praga qalasy qabyldady. Odan keıin atalǵan jarys álemniń ár qıyrynda ótti. Sporttyń bul túriniń favorıtteri reseılikter ekeni esh daý týǵyzbasa kerek. Kelmeske ketken KSRO-nyń qosa alǵanda, olar barlyǵy 286 (141 altyn+91 kúmis+54 qola) júlde oljalady. Bolgarııanyń da jeńispen órilgen baı dástúri bar. Bul eldiń ókilderi 167 (66+53+48) ret jeńis tuǵyryna kóterildi. Ýkraınanyń kórsetkishi de jaman emes. Táýelsizdikke qol jetkizgeli beri olar 89 (25+28+36) márte úzdikter qatarynan kórindi. Sondaı-aq tórtkúl dúnıeniń teńdessizderi jınalǵan tartysta Belarýs (9+24+36), Italııa (7+15+5), Ispanııa (7+11+18), Germanııa (5+6+3), Chehııa (4+5+8), Grekııa (3+1+2), Soltústik Koreıa (1+2+4) jáne Japonııanyń (1+1+1) ánurany shyrqaldy. Al júlde alǵandar qatarynda Ázerbaıjan (0+1+7), Izraıl (0+1+2), Qytaı (0+1+2), Fransııa (0+0+2), Rýmynııa (0+0+1) jáne Ońtústik Koreıa (0+0+1) quramalary bar.
О́zderińiz baıqaǵandaı, álemdik dodada olja salý baqyty bar-joǵy 17 memlekettiń ókilderine buıyrǵan eken. О́kinishke qaraı, solardyń qatarynda qazaqstandyq burymdylar joq. Jerlesterimizdiń arasynan eń úzdik nátıje Álııa Iýsýpovaǵa tıesili. Shymkenttiń sulýy álem chempıonatynda alǵash ret 2001 jyly Madrıdte boı kórsetip, odan keıin birer jyl boıy el namysyn qorǵady. Alǵashqy jarysynda Iýsýpova kópsaıystyń qorytyndysy boıynsha segizinshi satyǵa taban tirese, 2003 jyly Býdapesht jáne 2005 jyly Bakýde jetinshi oryndardy ıelendi. 2007 jyly Patryda ozyq alty gımnasshynyń qataryna qosyldy.
Álııanyń álemdik dodada joly bolmaǵanymen, ózge baıraqty básekelerde eleýli tabystarǵa qol jetkizdi. Myń buralǵan qazaq qyzy 12 ret qurlyq chempıony atanyp, Azııa oıyndarynda eki altyn men eki kúmis medaldy oljalady. Dúnıejúzilik Ýnıversıada men Búkilálemdik oıyndarda san márte júldeli oryndardy enshiledi. 2004 jyly Afına Olımpıadasynda tórtinshi oryndy ıelense, 2018 jyly Beıjińde besinshi satyǵa jaıǵasty. Qazirgi kezde Álııa Maqsutqyzy Qazaqstan ulttyq qurama komandasynyń bas bapkeri qyzmetin atqarýda.
Sońǵy álem chempıonaty byltyr Japonııanyń Kıtakıýsıý qalasynda ótti. Sol jarysta sarapqa salynǵan toǵyz altynnyń jeteýin Reseı quramasy jeńip aldy. 23 jastaǵy Dına Averına jekelegen jattyǵýlarda tórt altyn alsa, egizi Arına ekeýi komandalyq saıysta da aldaryna jan salmady. «Taspada» belorýssııalyq Alına Gornosko top jardy. Toptyq básekedegi bas júldeniń ekeýin reseılikter jeńip alsa, bireýi Apennın túbeginen kelgen arýlarǵa buıyrdy. Kúnshyǵys elinde barlyǵy tórt eldiń burymdylary ǵana jeńis tuǵyryna kóterildi. Olar – Reseı (7+4+2), Italııa (1+3+1), Belarýs (1+2+4) jáne Japonııa (0+0+2). Sol jarysta Qazaqstannyń birde-bir gımnasshysy úzdikter sanatyna qosyla almady.
