605 shaqyrym jol jóndeledi

О́ńirdegi avtomobıl joldarynyń sa­pasy qandaı? Búginge deıin óńirde qandaı jumystar atqaryldy? Qolǵa alyn­ǵan jumystar qandaı nátıje berdi? Oblys ákimdigi jolaýshylar kóligi jáne avto­mobıl joldary basqarmasynyń bas­shysy Baqytjan Jánibekovke osy saýaldardy qoıǵan edik.

Basqarma basshysynyń aıtýynsha, óńirdegi 10 038 shaqyrym joldyń 4 376 shaqyrymy avtomobıl joldary bolsa, 5 662 shaqyrym eldi meken kósheleriniń jelisine tıesili eken. Aldaǵy kúnderi osy jol bólikterin jóndeý, jańa jol salý máseleleri nazardan tys qalmaq emes.

«О́ńirimiz boıynsha respýblıkalyq mańyzy bar avtomobıl joldarynyń uzyndyǵy 1 198, oblystyq mańyzy bar avtomobıl joldary 1 756, aýdandyq mańyzy bar avtomobıl joldary 1 383 shaqyrymdy quraıdy.

Jergilikti mańyzy bar avtojoldar men eldi meken kósheleriniń jaǵ­da­ıyn jaqsartý maqsatynda In­dýs­trııa jáne ınfraqurylymdy damy­tý mınıstrligimen 2022 jyly res­pýb­lı­ka­lyq jáne jergilikti bıýdjetterden birlesip qarjylandyrý tájirıbesin jalǵastyrý arqyly jalpy 16,2 mlrd teńge bólinip otyr. Onyń ishinde 8,3 mlrd teńge respýblıkalyq, 7,9 mlrd teńge jergilikti bıýdjetterden qaraldy. Bó­lingen qarjy esebinen 9,4 shaqyrym joldy qaıta jańǵyrtý jáne 605,2 sha­qy­rym joldy orta jóndeýden ótkizý josparlanǵan. Bul sanatqa oblystyq mańyzy bar avtojoldardan 194,1, aýdan­dyq mańyzy bar 53,6, eldi meken kóshe­le­ri­niń 357,5 shaqyrymy engizildi», deıdi Baqytjan Jánibekov.

Jaýapty basqarma basshysynyń só­zi­ne súıensek, óńirdegi joldardy qal­py­na keltirý boıynsha uzyn-yrǵasy 252 joba qolǵa alynypty. Onyń ishinde 28 joba (194,1) «Nurly jol», 77 joba (169 shaqyrym) «Aýyl – el besigi», 2 joba (9,4 shaqyrym) «О́ńirlerdi damytý-2025» baǵdarlamasy aıasynda júzege assa, 145 joba jergilikti bıýdjetter ar­qy­ly sheshimin tappaq.

«Basqarmanyń 3 jyldyq josparyna keler bolsaq, 2025 jylǵa deıin Amanat partııasynyń saılaýaldy plat­­for­masynyń bekitilgen is-sharalar jos­paryna jáne oblystyń damý jos­pary­na sáıkes, 621 shaqyrymdy qu­raı­tyn jer­gilikti mańyzdaǵy avtojoldardy orta jóndeýden ótkizip, qanaǵattanarlyq deń­geıin 100 paıyzǵa jetkizý kózdelip otyrǵanyn aıta ketken lázim. Onyń ishin­de 414 shaqyrym oblystyq máni bar, 207 shaqyrym aýdandyq mańyzy bar avtomobıl joldary sanatynda. Jyl­dar bólinisi boıynsha 2023 jyly 98 paıyz mejeni baǵyndyrý úshin 203 shaqyrym (25 joba), 2024 jyly 99,5 paıyzdy qamtý úshin 238 shaqyrym (24 joba), 2025 jyly 100 paıyz mejege qol jetkizý úshin 180 shaqyrym (16 joba) oryndaıtyn bolamyz.

Bizdegi ózekti másele – avtojoldardyń merziminen buryn buzylýy. Mundaı ol­qy­lyqtardyń barlyǵy da ruqsat etilgen salmaqtyq parametrlerden asyp ketetin júk kólikteriniń baqylaýsyz júrýinen oryn alyp otyr.

Aýyr júk kólikteriniń baqylaýsyz jú­rýinen jergilikti mańyzy bar avto­jol­dardyń buzylýyna jol bermeý maqsatynda Jambyl oblysy boıynsha kóliktik baqylaý ınspeksııasymen birlesken is-sharalarǵa sáıkes, oblys joldarynda kezekshilikter uıym­das­ty­rylyp, tekserýler júrgizilip jatyr. 2022 jyldyń 7 aıynda jyljymaly kóliktik baqylaý posttarynda 69 ákimshilik hattama toltyrylyp, 4,0 mln teńge aıyppul salynyp óndirildi», deı­di basqarma basshysy jaǵdaıdy túsindirip.

B.Jánibekovtiń aıtýynsha, kúre jol boıyndaǵy jol-kólik oqıǵalarynyń aldyn alý baǵytynda aýqymdy jumys qolǵa alynbaq. Derekterge súıensek, osy jyldyń alty aıynda 709 jol-kólik oqı­ǵalary tirkelgen. Saldarynan 128 azamat baqılyq bolyp, 1 112 adam túrli dárejedegi dene jaraqatyn alǵan bolatyn. Kólik júrgizýshilerdiń basym bóligi jyldamdyqty shamadan tys arttyrý, qarama-qarsy qozǵalys jolaǵyna ótýi saldarynyń sońy qaıǵyly jaǵdaılarǵa ákep otyr.

«Jol qozǵalysy qaýipsizdigin qamta­masyz etý maqsatynda osy jyly «Kór­kem­telekom» JShS bastamasymen oblys ortalyǵynda quqyq buzýshy­lyq­tardyń aldyn alý úshin «Taraz qalasyndaǵy zııat­kerlik qaýipsizdik júıesi jáne jol trafıgin taldaý» sergek memleket-je­kemenshik áriptestigi jobasy iske asyrylýda. Atalǵan joba jol boıyndaǵy oqys oqıǵalardy azaıtýǵa barynsha yqpal etetinine kúmánimiz joq.

Jobany iske asyrý kezeńi 2022-2027 jyldardy qamtıdy. Jalpy quny – 5 mlrd 230 mln 430 myń teńgeni quraıdy. Jospar boıynsha Taraz qalasynda 35 jelilik ýchaskedegi apparattyq-baǵdar­la­malyq keshen, 450 nysanǵa 1 250 jalpy beınebaqylaý kameralary, derekterdi óńdeý jáne taldaý ortalyǵy: serverler, derekterdi saqtaý júıesi; kom­mý­ta­sııalyq jáne baǵyttaýshy jab­dyq, 13 qıylysqa apparattyq-baǵdarlamalyq keshen ornalastyrylmaq.

Búginde memleket-jekemenshik árip­tes­tigi shartymen bekitilgen adrestik baǵ­darlamaǵa sáıkes, 130 nysanda 413 dana jalpy beınebaqylaý kamerasy ornatylyp, onyń 165 danasy iske qo­syldy. Atalǵan jobanyń qurylys jumystaryn aıaqtaý qyrkúıek aıyna josparlanǵan. Sondaı-aq júıeni to­lyq iske qosqannan keıin UQK Mem­lekettik tehnıkalyq qyzmetiniń aqpa­rat­tyq qaýipsizdik júıesiniń talaptaryna sáıkestik rásimderi júrgizilip, oń qorytyndysy alynǵan soń, 2022 jyldyń jeltoqsanynda nysandy paıdalaný kózdelýde.

Budan bólek, Jambyl oblysy Po­lısııa departamenti tarapynan respýb­lı­kalyq mańyzy bar avtomobıl joldarynda jyldamdyqty shekteý kameralaryn ornatý adresi bekitilip, 10 dana jyldamdyqty shekteý kameralary ornatyldy.

Basqarma aımaqtaǵy avtojoldardyń sapasyn, qaýipsizdikti arttyrý baǵytyn­da­ǵy jumystardy odan ári de jalǵastyra beretin bolady. Jalpy óńir joldaryn retteý boıynsha atqarylyp jatqan jumystar aldaǵy ýaqytta qarqyndy júrgizilmek», deıdi basqarma basshysy.

Jambyl oblysy