Memleket basshysy halyqqa arnaǵan bıylǵy Joldaýynda ekonomıkany damytýdyń jańa kezeńine erekshe nazar aýdarǵany málim. Osy rette Úkimet shaǵyn jáne orta bıznestiń úlesin arttyrýǵa basymdyq berýdi kózdep otyr.
Oblys ákiminiń orynbasary qazir otandyq óndirýshilerge shekteý qoımaıtyn kedergisiz orta qurý qajet dep sanaıdy.
«Samuryq-Qazyna» ulttyq ál-aýqat qorynyń bul baǵyttaǵy jumysyn atap ótken oryndy. Máselen, qordyń satyp alý kólemi 4,2 trln teńgeden asyp, bul shaǵyn jáne orta bıznesti damytý, jergilikti qamtý úlesin arttyrý jáne basqa da múmkindikterdi keńeıtýge jol ashady.
Qazir Abaı oblysynda óńdeý óndirisine baılanysty 30 ınvestısııalyq jobany júzege asyrý josparlanyp otyr. Soǵan sáıkes 7 myń jumys orny ashylady. Onyń ishinde bıyl 3 joba qolǵa alynady. Nátıjesinde, 785 adam jumyspen qamtylady», dedi A.Kárimov.
Qazir otandyq bıznesti damytýǵa arnalǵan memlekettik qoldaýdyń kóptegen tetigi bar. Mysaly, Úkimettiń bastamasymen qolǵa alynǵan ishki qundylyqty damytýǵa baǵyttalǵan baǵdarlama aıasynda ımportty otandyq ónimdermen almastyryp, Qazaqstannyń taýar óndirýshilerine qarjylyq qoldaý kórsetý kózdelip otyr.
«Otandyq kásipkerler men taýar óndirýshilerdi qoldaý – qordyń negizgi mindeti. Qazaqstandyq bıznesti tapsyrystar jáne basqa da qoldaý tetikterimen qamtamasyz etý maqsatynda osy jyly «Atameken» palatasymen birlesip, qordyń satyp alý júıesine eleýli ózgerister engizildi. Otandyq taýar óndirýshilerdi qoldaýdyń 10 sharasy aıqyndaldy. Onyń ishinde qamtamasyz etýdi joıý, tólem merzimderin azaıtý, qujattardyń qysqartylǵan tizbesi jáne basqa da artyqshylyqtar qamtylǵan», dedi «Samuryq-Qazyna Kontrakt» JShS bas dırektorynyń orynbasary Darhan Ramazanov.
Bul oraıda Abaı oblysynyń ákimdigi, «Atameken» UKP jáne «Samuryq-Qazyna Kontrakt» JShS arasynda úsh jaqty kelisimge qol qoıylǵanyn aıta ketken oryndy. Sondaı-aq birqatar ofteık-kelisim jasaldy.
Abaı oblysy
