Kelisim jobasy qaraldy

Keshe Máskeýde Qazaqstan  Premer-Mınıstriniń birinshi orynbasary Baqytjan Saǵyntaev Eýrazııalyq ekonomıkalyq komıssııa (EEK) keńesiniń otyrysyna qatysty. Onda Eýrazııalyq ekonomıkalyq odaq (EAEO) týraly Kelisim jobasyn daıyndaý máseleleri qaraldy, dep habarlady Premer-Mınıstrdiń baspasóz qyzmeti. «EAEO týraly Kelisim jobasy ázirlendi. Kelesi qadam ishki memlekettik pro­sedýralardy júrgizý bolady. Son­daı-aq, Kelisim jobasy osy jylǵy 29 ma­myrda Astanada ótetin Joǵarǵy eýra­zııalyq ekonomıkalyq keńes otyrysy barysynda memleket basshylarynyń qol qoıýyna daıyndaý úshin memlekettik tilge aýdarylatyn bolady», dedi B.Saǵyntaev EEK keńesi qorytyndysy boıynsha. Tutastaı alǵanda, EAEO týra­ly Kelisim jobasy odaqqa múshe-mem­le­ketter ekonomıkasyn, onyń ishinde, kólik, energetıka, agroónerkásip salalaryn, ortaq naryqta adal básekelestikti damytý úshin ózara tıimdi, teń quqyqty eko­­no­mıkany óristetýge qosymsha serpin beredi. Bútindeı alǵanda, Kelisim jobasyn daıyndaý sheńberinde kelisimderge qol jetkizý jóninde alǵa úlken qadam jasaǵanymyzdy atap ótemin. Bizdiń birlesken jumysymyz elderimiz ara­syn­daǵy ıntegrasııanyń joǵary deńgeıde ekeniniń kórinisi, teń quqyqty áriptestik qatynas áleýetin tıimdi paıdalanýǵa peıil ekenimizdi atap ótýge tıispin, dep qorytyndylady sózin B.Saǵyntaev.