Qazaqstan qurama komandasy músheleri arasynda Amanǵalı Bekbolatov Belgradtyń bozkileminde ózin jaqsy qyrynan kórsetti. 55 kılo salmaqta synǵa túsken qandasymyz bastapqy básekelerde bolgarııalyq Nedıalko Petrov (3:1) pen ırandyq Poıa Soýlat Dad Marzdy (3:1) jeńip, jartylaı fınalda grýzııalyq Nýgzarı Sýrsýmııamen kúsh synasty. Dál osy balýan osydan úsh jyl buryn Nur-Sultanda uıymdastyrylǵan álemdik dodada bizdiń Qorlan Jaqanshany bas júldeden aıyrǵan edi. Odan bólek Sýrsýmııanyń álem birinshiliginiń eki jáne qurlyq chempıonatynyń úsh dúrkin júldegeri degen ataǵy bar. Bul tartysta eki ǵana upaı aıyrmashylyǵymen grýzııalyq sportshy jeńiske jetti. Endi Amanǵalı qola medal úshin kúresedi.
Alǵashqy aınalymda japonııalyq Taıshı Horıeni (7:3) jeńgen 72 kılo salmaqtaǵy Ibragım Magomadov 1/8 fınalda ázerbaıjandyq Ýlvı Ganıdzege (2:4) ese jiberdi. Desek te qarsylasy fınalǵa joldama alǵanynyń arqasynda otandasymyz jubanysh básekelerinde beldesýge múmkindigin saqtap qaldy. Dál sondaı jaǵdaıdy Temirlan Shadýkaev te basynan keshirdi. 77 kılo salmaqta kúresken jerlesimiz norvegııalyq Per Anders Kýre (8:3) men germanııalyq Idrıs Ibaevty (11:2) jolynan yǵystyrǵanymen, shırek fınalda majarstandyq Zlotan Levaıǵa (0:9) áli jetpedi. Jartylaı fınalda Levaı serbııalyq Vıktor Nemeshti san soqtyrdy. Sonyń nátıjesinde, Temirlannyń jeńis tuǵyryna kóterilýine taǵý bir múmkindik týyndady.
Al 87 kılo salmaqtaǵy Nursultan Tursynov polshalyq Shımon Shımonovıch (9:0) pen qytaılyq Haıtao Kıannyń (8:0) tas-talqanyn shyǵarǵanymen, Majarstannyń taǵy bir beldi balýany Davıd Losonzıdiń (3:13) osal tusyn taba almady. Losonzı de alysqa uzamady. Osylaısha, NurSultan úshin bul jarys aıaqtaldy.
