Sýretti túsirgen Erlan OMAR, «EQ»
Qyzylorda óńiriniń aq marjany, Araldyń balyǵy saýdany qyzdyrdy. Mundaǵy sary maı, irimshik, qurt, et pen shujyq jáne kókónister naryqtyq baǵadan 15-20 paıyz tómen saýdalanýda. Jalpy, elordadaǵy aýyl sharýashylyǵy ónimderiniń jármeńkesine Qyzylorda oblysynan 500 tonnadan astam ónim jetkizildi.
«Qyzylorda oblysynan jármeńkege 70-ten asa kásipker qatysyp, 500-den asa taýar, aýyl sharýashylyǵy ónimderin ákeldi. Jármeńke negizi qaladaǵy azyq-túlikti qamtamasyz etýge, baǵany turaqtandyrýǵa baǵyttalǵan. Qazaqstannyń barlyq oblysynyń qatysýymen bolady. Qarasha aıyna deıin jalǵasady. Osy aptada Almaty oblysy men Jetisý oblystarynyń aýyl sharýashylyǵy ónimderin kútip otyrmyz. Ár senbi-jeksenbi saıyn kezekpen oblystar kelip otyrady», dedi qalalyq ınvestısııalar jáne kásipkerlikti damytý basqarmasy basshysynyń orynbasary Qýanysh Saparov.
Jármeńkede óńirlerde óndiriletin otandyq ónimderdi qoldaý maqsatynda arnaıy aýyl sharýashylyǵy ónimderiniń kórmesi uıymdastyrylǵan. Syrdyń dıqandary men kásiporyndary 50 júk avtokóligimen jalpy quny 200 mln teńgeni quraıtyn 500 tonnadan astam ónim túrlerin elordaǵa jetkizdi. Onyń ishinde 100 tonna kúrish, 15 tonna et jáne 30 tonna balyq ónimderi, 80 tonna kókónis pen jemis-jıdekter, 210 tonna baqsha ónimderi, 50 tonna asqabaq, 3 tonna as tuzy, 10 tonna sút ónimderi, 5 tonnaǵa jýyq kondıter ónimderi qoıylǵan.
«Jármeńkege úsh túrli buqtyrylǵan et, eki túrli kúrish, qaraqumyq jáne asqabaq, sábiz shyrynyn, balalar taǵamyn ákeldik. Onyń barlyǵy – esh qospasyz, ekologııalyq taza, sapasy joǵary ónimder. Qoljetimdi arzan baǵamen satyp jatyrmyz. Halyqqa taza tabıǵı ónim usyný – tehnolog retindegi basty qaǵıdam. Munda adamdar kóptep kelýde. Usynyp otyrǵan baǵamyz olardyń kóńilinen shyǵýda», dedi Qyzylorda oblysyndaǵy bas tehnolog Qýat Shakızbaev.
«Elordada apta saıyn ótetin óńirlerdiń aýyl sharýashylyǵy jármeńkesin jibermeı kelip turamyn. Qala turǵyndary úshin Qyzylordanyń brendine aınalǵan kúrish kelip jatyr. Maı men shubat ta aldym. Shubattyń lıtri 1000 teńgeden eken. Baǵasy óte qoljetimdi dep oılaımyn. Munda Qazalynyń kámpıtteri, táttileri jáne balyq ónimderi de bar eken. Arzan baǵamen qaýyn-qarbyz da aldym. Sondaı-aq kórme uıymdastyrylyp jatyr. Kórmede usynylǵan tamaqtyń dámin tatyp kórip, unasa alýǵa bolady. Barlyǵy halyqtyń qamy úshin jasalyp jatyr. Nur-Sultan qalasy ákimdigine turǵyndardyń jaǵdaıyn oılap, osyndaı jármeńkeler uıymdastyryp jatqandaryna alǵysymyzdy bildiremiz», dedi qala turǵyny Aınur Jumataeva.
Sonymen qatar jármeńkede Qyzylordalyq ónerpazdar ánnen shashý shashyp, elordalyqtarǵa kóterińki kóńil kúı syılady. Jármeńke aıasynda Qyzylorda oblysy ákimdiginiń bastamasymen qaıyrymdylyq is-sharasy uıymdastyrylyp, kómekke muqtaj otbasylarǵa azyq-túlik sebetterin taratty.
«Búgingi aksııa boıynsha Qyzylorda oblysynan azyq-túlik toltyrylǵan 80 sebet berildi. Onyń ishine 10 kılo kúrish, 2 kılo makaron, 5 kılo kartop, 5 kılo pııaz, asqabaq jáne qaýyn 1 danadan salyndy. Bul aksııaǵa Saryarqa aýdany ákimdiginen volonterler qatysty. Barlyq azyq-túlik sebeti turmysy tómen, áleýmettik osal toptaǵy tıisti adamdarǵa jetkizildi. Bul aksııa Nur-Sultan qalasy ákimdiginiń qoldaýymen ótip jatyr. Meılinshe kóp otbasyny qamtýǵa tyrysýdamyz. Jármeńke joǵary deńgeıde ótýde», dedi qalalyq ákimdiktiń ókili Erasyl Qaıratov.
