Erler arasyndaǵy jarystyń shırek fınalyna joldama alǵan segiz tennısshiniń birde-bireýi buǵan deıin «Úlken dýlyǵa» sanatyndaǵy týrnırlerde top jarǵan joq edi. Al ataq-dańqtary alysqa jaıylǵan Stefanos Sısıpas, Sten Vavrınka, Fernando Verdasko tusaýkeser kezdesýlerinde jeńilis tapsa, Grıgor Dımıtrov ekinshi aınalymda sátsizdikke ushyrady. Sol sekildi Danııl Medvedev, Rafael Nadal, Endı Marreı, Marın Chılıch jáne basqa da dúldúlder alysqa shappady. Mine, sensasııanyń «kókesi» osy emes pe?!
Shırek fınalda reseılik Karen Hachanov (№31) aýstralııalyq Nık Kırosty (№25), norvegııalyq Kasper Rýýd (№7) ıtalııalyq Matteo Berrettınıdi №14), ıspanııalyq Karlos Alkaras (№4) Apennın túbeginiń taǵy bir ókili Iаnnık Sınnerdi (№13) jáne amerıkalyq Frensıs Tıafo (№22) orys oıynshysy Andreı Rýblevti (№11) qapy qaldyrdy.
Alkaras pen Tıafo jáne Rýýd pen Hachanov arasynda ótken jartylaı fınaldyq saıysta alǵashqylary jeńiske jetti. Aqtyq saıysta 19 jastaǵy Ispanııanyń asa daryndy tennısshisi men 23 jastaǵy Skandınavııa túbeginiń sańlaǵy kúsh synasty. Bul oıynshylardyń ekeýi de TOP-10-dyqtyń qatarynda. Karlostyń osy kúnge deıingi eń úzdik kórsetkishi – ATR týrnırinde bes márte top jaryp, bıyl Rolan Garrostyń shırek fınalyna shyǵýy. Kasper bıyl Rolan Garrostyń fınalynda oınap, asa iri halyqaralyq dodalarda toǵyz ret dara shyqty. San mıllıon jankúıer taǵatsyzdana kútken báseke keshe ótti. Úsh jarym saǵatqa sozylǵan báseke 6:4, 2:6, 7:6, 6:3 esebimen Karlos Alkarastyń jarqyn jeńisimen aıaqtaldy.
Áıelder arasynda aıtarlyqtaı tosyn nátıjeler tirkelgen joq. Jartylaı fınalǵa joldama alǵandardyń barlyǵy da kil myqtylar. Bul mejede álemniń birinshi raketkasy, polshalyq Iga Shvıontek WTA tiziminde jetinshi orynǵa jaıǵasqan belorýssııalyq Arına Sobolenkony san soqtyrsa, mysyrlyq Ons Jaber (№5) fransııalyq Karolın Garsııany (№17) jeńdi. Aqtyq synnyń alǵashqy setinde Shvıontek ońaı jeńiske jetse, ekinshisinde Jaber ájeptáýir qarsylyq kórsetti. Oıyn taı-breıkke ulasty. Desek te bul joly da polshalyqtyń mysy basym boldy.
1 saǵat 50 mınýtqa sozylǵan báseke 6:2, 7:6 esebimen aıaqtaldy. Osylaısha, 21 jastaǵy Iga «Úlken dýlyǵa» sanatyndaǵy týrnırlerde úshinshi márte bas júldeni oljalady. Al 28 jastaǵy Ons qatarynan ekinshi ret fınalda utyldy. Osydan eki aı buryn ǵana ol Londonda uıymdastyrylǵan Ýımbldon dodasynyń aqtyq synynda qazaqstandyq Elena Rybakınaǵa ese jibergen edi.
US Open týrnırinde Qazaqstan tennısshileriniń birde-bireýi tabysty óner kórsete alǵan joq. Bul joly biz Elena Rybakınaǵa (WTA reıtınginde 25-orynda) zor senim artqan edik. Taıaýda ǵana Ýımbldonda aıdy aspanǵa bir-aq shyǵaryp, bas júldeni oljalaǵan elimizdiń birinshi raketkasy Nıý-Iorktegi týrnırdiń tusaýkeser kezdesýinde álemdik reıtıngte ózinen áldeqaıda tómen turǵan fransııalyq Klara Bıýrelge (№131) jol berdi. Iýlııa Pýtınseva (№36) amerıkalyq Amanda Anısımovadan (№22) aılasyn asyrǵanymen, ekinshi aınalymda germanııalyq Iýle Nımaıerdiń (№108) osal tusyn taba almady. Aleksandr Býblık te dál sol mejede súrindi. Fransııanyń ókili Iýgo Gastondy (№72) jolynan yǵystyrǵan jerlesimiz ile-shala Ispanııanyń myqtysy Pablo Karreno-Býstadan (№15) utyldy. Al Mıhaıl Kýkýshkın men Dmıtrıı Popko irikteý synynda súrindi.
Juptyq saıysta da jolymyz bolmady. Andreı Golýbev pen Pedro Martınes-Portero (Ispanııa) jáne Iýlııa Pýtınseva men Iаnına Vıkmaıer (Belgııa) birinshi kezeńde jeńilistiń kermek dámin tatsa, Aleksandr Býblık pen Holger Vıtýs Rýne (Danııa) jáne Aleksandr Nedovesov pen Aısam Ýl-Hak Kýreshı (Pákistan) ekinshi aınalymnan asa alǵan joq. Eń táýir nátıjege Anna Danılına qol jetkizdi. Brazılııalyq Beatrıs Haddad-Maııamen ıyq tirese oınaǵan ol úshinshi kezeńge deıin jetti.
Atalǵan jarysta jerlesterimiz sátsiz óner kórsetse de, materıaldyq jaǵdaılaryn biraz jaqsartyp aldy. Jekelegen jáne juptyq básekelerdegi syıaqylardy qosa eseptegende, olardyń tabystary mynadaı: Býblık – 138,9 myń dollar (65,27 mıllıon teńge), Pýtınseva – 131,65 myń dollar (61,86 mıllıon teńge), Rybakına 80 myń dollar (37,59 mıllıon teńge), Kýkýshkın men Popko – 33,6 myń dollar (15,78 mıllıon teńge), Danılına – 28,2 myń dollar (13,25 mıllıon teńge), Nedovesov – 17,9 myń dollar (8,41 mıllıon teńge) jáne Golýbev – 10,65 myń dollar (5,04 mıllıon teńge). Qazaqstan tennısshileriniń AQSh-tyń ashyq birinshiliginde tapqan jalpy tabysy – 474,5 myń dollar (222,9 mıllıon teńge).
Al jekelegen saıysta bas júldeni oljalaǵan oıynshylar 2,6 mıllıon dollardan ıemdendi. Aqtyq synda jeńilgender sol somanyń teń jartysyn aldy. Jartylaı fınalǵa jetkenderdiń esepshotyna 705 000 dollar aýdarylsa, shırek fınalǵa shyqqandar 445 000-dy enshiledi. Tórtinshi kezeńde oınaǵandar 278 000-dy ıelense, úshinshi aınalymda súringender 188 000 dollarǵa ıelik etti.
