Kezdesýge Qazaqstan Jazýshylar odaǵy basqarma tóraǵasy, Memlekettik syılyqtyń laýreaty Ulyqbek Esdáýlet, oblys ákiminiń orynbasary Erkin Úısimbaev, qalamgerler Jumabaı Shashtaıuly, Júsipbek Qorǵasbek, Qasymhan Begmanov, Maraltaı Raıymbekuly bastaǵan ózge de azamattar qatysty. Dóńgelek ústel otyrysyn respýblıkalyq jalpyulttyq «Egemen Qazaqstan» gazetiniń ádebıet jáne óner bóliminiń meńgerýshisi, aqyn Erlan Júnis júrgizip otyrdy.
Basqosýǵa qatysqan qalamgerler qaýymy «Qordaıdyń qońyr quljasy» taqyrybymen ótken jıynda jazýshy týraly estelikterimen bólisip, usynystaryn aıtty. Olar Nesipbek Dáýtaıuly ómiriniń sońyna deıin «Jambyl» respýblıkalyq ádebı jýrnalyn shyǵaryp otyrǵan, «Aıǵyrkisi», «Qudiret pen qasiret», «Batyr», «Kisi ıesi», «Shal» sekildi ózge de ǵajap týyndylaryn jazǵan kabınetti qalamgerdiń mýzeı-úıi retinde saqtaýdy surady. Sondaı-aq «Jambyl» respýblıkalyq ádebı jýrnalyn ármen qaraı shyǵarý qajettigin atap ótti. Sonymen qatar qalamgerler Taraz tórinde jazýshynyń oryndyqta otyrǵan beınesi ornatylsa degen tilekterin de jetkizdi. Joǵaryda qalamgerge Sheraǵanyń «Qordaıdyń qońyr quljasy» dep at qoıǵanyn aıttyq. Bıyl Sheraǵanyń 90 jyldyǵyna oraı Tarazdaǵy «Jambyl» dańǵylynyń boıynda Sherhan Murtazanyń eskertkishi boı kóteredi. Al jyl sońynda qalamgerdiń 75 jyldyǵy ótýi kerek. Shyǵarmashyl tulǵanyń beınesi Sheraǵa eskertkishiniń qasynda tursa esh artyq bolmas edi. Birinshiden, Sherhan Murtaza Neskeńdi qalamger inisi retinde qurmettedi. Ekinshiden, «Jambyl» jýrnalyn shyǵarǵan qalamgerdiń aqyn atyndaǵy kóshede, Sheraǵanyń qasynda turǵany naǵyz arhıtektýralyq ansambl ári utymdy sheshim bolar edi.
Dóńgelek ústel otyrysy barysynda qalamgerler qazaqtyń qabyrǵaly jazýshysynyń esimin qurmetteý úshin kóptegen usynys aıtty. Ásirese Júsipbek Qorǵasbektiń usynysy kóńilge qondy deýge ábden bolady. Ol Nesipbek Dáýtaıuly týdyrǵan «Aıǵyrkisi» obrazyn áspetteý úshin sol beıne tuǵyrǵa qonyp, boı kóterse degen nıetin jetkizdi. Qordaı aýdanynyń ákimi Máden Musaev atalǵan usynysty qabyl alyp, qalamger týǵan ólkede júzege asyrsa eshkim utylmas edi.
Qazaqstannyń eńbek sińirgen qaıratkeri, Halyqaralyq «Alash» ádebı syılyǵynyń laýreaty Nesipbek Dáýtaıulynyń jyldyq asyna oraılastyrylyp ótkizilgen is-shara barysynda qalamgerdiń izdeýshisi, inisi, elimizdiń Aqparat jáne qoǵamdyq damý mınıstri Darhan Qydyráliniń qoldaýymen jaryq kórgen «Qordaıdyń qońyr quljasy» atty estelikter toptastyrylǵan jınaqtyń tusaýy kesilip, jıynǵa kelgen jurtshylyqqa túgeldeı taratyldy.
Kezdesýler ótedi, usynystar aıtylady. Alaıda kóp jaǵdaıda aıtylǵan áńgime sóz kúıinde qalyp jatady. Jergilikti atqarýshy bıliktiń ókilderi bul joly basqosýda kóterilgen utymdy usynystardy qaperge alyp, qorytyndy shyǵarar ma eken? Kim bilsin... Bárine ýaqyt tóreshi. Bir anyǵy, jeltoqsan aıynda qalamgerdiń 75 jyldyq mereıtoıyna oraı birqatar is-shara ótkiziletin sekildi.
Jambyl oblysy,
Qordaı aýdany
