Qalyń kórermennen qashyqtaý, stadıonnyń qaq ortasyna qurylǵan keń sahnaǵa kóterilgen belgili aqyn, júrgizýshi Júrsin Erman aıtýly dodada esimderi elge máshhúr jyr jampozdarymen qatar, osy óńirge ataǵy jaıylǵan Tobyl-Torǵaı aqyndarynyń da óner kórsetetinin habarlap, bul jolǵy aıtystyń jóni bólek, mańyzy erek ekenin atap ótti.
– Tek qazaq halqynyń emes, kúlli túrki jurtyna ortaq uly tulǵa, ult ustazy, álipbı jasap bergen reformator Ahańnyń 150 jyldyǵyna arnalǵan bul aıtysta 14 aqyn aldaryńyzǵa shyqty. Osydan 100 jyl buryn Orynborda Ahmet atamyzdyń 50 jyldyǵy atalyp ótkende, taǵy bir zańǵarymyz uly Muhtar Áýezov: «Ahańnan basqa jalpaq eldiń synyna tolyp, meıirin qandyrǵan kisileri sanaýly. Ahań ashqan qazaq mektebi, Ahań túrlegen ana tili, Ahań salǵan ádebıettegi elshildik urany – «Qyryq mysal», «Masa», «Qazaq» gazetiniń 1916 jyldaǵy qan jylaǵan qazaq balasyna istegen eńbegi, óner-bilim, saıasat jolyndaǵy qajymaǵan qaıratyn biz umytsaq ta, tarıh umytpaıtyn ister», degen eken. Iá, búgin – ult ustazynyń rýhyna taǵzym etip, taǵylymyn dáripteıtin kún. Dál qazir aldaryńyzǵa shyǵatyn aıtýly aqyndar osy údeden shyǵyp, jaqsy aıtys jasaıdy degen senimdemin, – dedi Júrsin Erman.
Alamanǵa Serikbaı Ospanov, Ásııa Berkenova, Amanjol Áltaı, Serik Qalıev, Abylaı Maýdanov tórelik etti. Aqyndar Ahańnyń rýhanı murasyn, elge sińirgen ólsheýsiz eńbegin jyrǵa qosyp qana qoımaı, talaı alypty dúnıege keltirgen Torǵaıdyń búgingi jaǵdaıyn da tilge tıek etti. Aıtys súıer aǵaıynnyń delebesin qozdyrǵan jyr dodasynyń ábden qyza túsken shaǵynda Áýlıekól aýdanynda orman órti boı bermeı jatqanyn estigen aqyndar eldiń amandyǵyn, irgeniń bútindigin jyrǵa qosty. Tótenshe jaǵdaıǵa baılanysty aıtysty da erte aıaqtaýǵa týra keldi.
Qazylar alqasy aıtystyń bas báıgesine Aıbek Qalıev laıyq degen sheshim shyǵaryp, jeńimpazǵa Qostanaıdaǵy «Saryarqaavtoprom» zaýytynan shyqqan sý jańa temir tulpardyń kiltin tabys etti.
Birinshi oryndy Ulytaý oblysynan kelgen Tólegen Jamanov jeńip aldy. Ekinshi oryn elordalyq Erkebulan Qaınazarov pen qyzylordalyq Meıirbek Sultanhannyń enshisine tıse, úshinshi oryndy Qyzylorda oblysynan kelgen Nurzat Qarý men Pavlodar oblysynyń aqyny Jiger Bóken ózara bólisti. Sharany uıymdastyrýshylar birinshi orynǵa 2 mln, ekinshi orynǵa 1 mln, al úshinshi orynǵa 500 myń teńge qarjylaı syılyq tikken. Jalpy, aıtysqa qatysqandardyń eshqaısysy júldesiz qalǵan joq. Aqyndardyń árqaısysyna 300 myń teńge kóleminde aqshalaı syılyq tabystaldy.
Osylaısha, dúrildetip bastaǵan toı-dýmandy tún jarymda kúńirenip aıaqtaýǵa týra keldi. Sahnaǵa kóterilgen oblys ákiminiń orynbasary Arman Ábenov: «Áýlıekól aýdanyndaǵy orman órtiniń saldarynan týyndaǵan tótenshe jaǵdaıǵa baılanysty Ahmet Baıtursynulynyń 150 jyldyq mereıtoıyna arnalǵan barlyq is-shara keıinge shegerildi. О́tkizetin ýaqyty qosymsha habarlanady», dedi.
Jangeldın aýdandyq máslıhatynyń hatshysy Serik Nurǵazın de el aldyna shyǵyp, oblystyń bir shetin alapat órt jaıpap jatqanda, myna jaqta dúrkiretip toı ótkizý ábestik bolatynyn aıtyp, kópshilikti qysyltaıań shaqta aýyzbirshilik tanytýǵa shaqyrdy.
Qostanaı oblysy
