Qazirgi kúrdeli jahandyq geosaıası ózgerister memleketimizdiń qurylymdyq irgetasy saıası basqarý salasyn jańǵyrtý, ekonomıkalyq qaıta qurýdy talap etýde. Bul – jurtshylyqqa ortaq múdde. Halyqtyń judyryqtaı jumylýyna táýeldi. О́tken onjyldyqtarda tehnologııany jetildirý, bilim men ǵylym, basqarý salalaryndaǵy kásibı biliktilikti arttyrý baǵytyndaǵy strategııalyq sharalar málimdeldi. Alaıda «Osy sharalardyń mańyzdylyǵy men mánin halyqqa uǵyndyra aldyq pa, ortaq is úshin baýyrymyzǵa tarta aldyq pa?» degen suraq turady kókeıde.
Ras, qyrýar jumys atqaryldy. Jańa dáýirdiń jas býyny ósip jetildi. Muny teriske shyǵara almaımyz. Osyǵan sáıkes ǵalam da bir ornynda turǵan joq, onymen qosa jas urpaqtyń maqsat-muraty jetildi. «Sóz qadirin bilmese, baıdan baılyq ketedi» degen ataly sóz bar. Biz bar dúnıemizdi qadirleı aldyq pa? Qadirine jettik pe? Ony ıgerýde nemese jetildirýde birtutas jurt bola aldyq pa? Elimizde jyldar boıy halyq pen bılik, azamattar men qoǵam arasyndaǵy qalypty qatynasty júıesizdendirýge adamı faktorlar da áserin tıgizgeni qazir qupııa emes. Búgingi másele: aımaqtyq, halyqaralyq naryqqa naqty qabiletti salalarǵa qoldaý jasaldy ma, básekelestik ortany qalyptastyrýda ádil báseke erejeleri, quqyqtyq tetikter qanshalyqty tıimdi jumys atqarýda? Sondyqtan da bolar, Memleket basshysy bıylǵy Joldaýyn keleshektegi is-áreketter strategııasyn Prezıdent janynan Adam quqyqtaryn qorǵaý jónindegi ýákil ınstıtýtynyń qurylatyndyǵy jónindegi málimdemesinen bastady. Bul – qabyldanǵan túrli saladaǵy zań normalarynyń saqtalýyna baqylaý jasaý jáne árbir azamattyń quqyǵy men erkin qorǵaý qajettiligi kún tártibinde tur degen sóz. Memleket qoǵam ıgiliginiń joǵary deńgeıin qanshalyqty kepildendirgenimen, aınalyp kelgende halyqtyń senimi men kóńil kúıine kelip tireledi. Áleýmettik-ekonomıkalyq máselelerdi qolǵa alýdan buryn, shendilerdiń turǵyndarmen qarym-qatynasynyń shynaıylyǵy mańyzdy, el-jurttyń taǵdyry men jaı-kúıin de únemi esepke alý, tabıǵı túrde halyqty yntalandyrý tásilderi qajet degen sóz. Sondyqtan da Joldaýda salyq tártibin engizý, júıesiz naryqqa jutylyp ketpeıtindeı shaǵyn bıznesti qorǵaý baǵytynda ákimshilik kedergilerdi joıýdyń naqty sıfrlandyrý sharalary atalyp otyr. Iаǵnı qoǵamda oryn alǵan keleńsizdikterge qarsy naqty uıǵarym jasaý quptarlyq. Eger jaýapkershilik alǵan azamattar basty murat úshin ádil de adal jumys atqaratyn bolsa, eldiń turaqtylyǵy men órkendeýine úlken úles qosady dep paıymdaýǵa bolady.
О́ńirlerdiń áleýmettik-ekonomıkalyq, ásirese aýyl sharýashylyǵy salalaryn, ekologııalyq, demografııalyq damýy men aımaqtyq erekshelikterine oraı qabyldanatyn naqty sheshimder jedel qolǵa alynǵanda ǵana nátıjege qol jetkizýge bolatyndyǵy aıqyn. Muratqa jetýdiń kilti – halyqtyń ıntellektýaldyq qarymdy áleýeti, ortaq iske umtylysy, eńbek jáne materıaldyq resýrstar júıesi bar. Baǵalaı alsaq – baǵymyz. Álemdik deńgeıdegi eldik múdde, azamattardyń bir-birine degen qurmeti men qamqorlyǵynan bastaý alatynyn jadymyzda ustasaq ıgi.
Qundyzaı ERIMBETOVA,
Memleket tarıhy ınstıtýtynyń jetekshi ǵylymı qyzmetkeri
