Aldymen baýyrlas halyqtardyń ókilderi Ertis jaǵalaýyna baryp, tatar halqynyń kórnekti aqyny Ǵabdolla Toqaıdyń bıýstine gúl shoqtaryn qoıdy. Sonymen qatar uly Abaıdyń eskertkishine aıaldap, hakimniń rýhyna taǵzym etti.
Sabantoıǵa oraı Beıbitshilik aralynda eki jaqtyń bastamasymen shaǵyn etnoaýyl salynǵanyn aıta ketken oryndy. Munda Tatarstan Respýblıkasynyń Aqtanysh aýdanynyń qoldaýymen ulttyq buıymdarmen bezendirilgen etnoúı, dıirmen, kóne monsha ornalastyrylyp, merekeniń sánin keltirdi. Jınalǵan halyq alyp samaýrynnan shaı iship, tatar halqynyń ulttyq taǵamdarynan dám tatýǵa múmkindik aldy.
Abaı oblysynyń ákimi Nurlan Uranhaev jáne Tatarstan Respýblıkasynyń Memlekettik Keńesiniń tóraǵasy Farıd Muhametshın shyrsha kóshetterin egip, týys halyqtardyń mádenı baılanysynan bólek, ekijaqty alys-beris pen barys-kelisti qunttaýdyń tıimdi joldaryn talqylady.
«Semeı qalasynda Sabantoıdy ótkizýdiń jaqsy dástúri qalyptasqan. Bıylǵy merekeniń ereksheligi sol, ol jańadan qurylǵan Abaı oblysynda alǵash ret keń aýqymdy deńgeıde ótkizilip otyr. Dostyq, baýyrlastyq baılanystarymyz ekonomıkalyq yntymaqtastyqqa ulasady degen úmittemiz. Aıtalyq, biz úshin Qazandaǵy abattandyrý tájirıbesi óte qyzyqty. Osy baǵytta jumys isteýge nıettimiz», dedi N.Uranhaev.
О́z kezeginde Tatarstan Respýblıkasynyń Memlekettik Keńesiniń tóraǵasy baýyrlas ulttardyń beıbitshilik pen kelisimde ómir súrip jatqany qýantatynyn jetkizdi. «Biz úshin Qazaqstannyń Prezıdenti Qasym-Jomart Toqaevtyń Qazanǵa kelgen kezdegi qol jetkizgen ýaǵdalastyqtardy bekitip, saqtaý óte mańyzdy», dedi F.Muhametshın.
Atalǵan merekege baılanysty Semeıde tatar óner mektebiniń jańa ǵımaraty paıdalanýǵa berilgenin aıta ketý kerek. Bul ekijaqty yntymaqtastyqtyń taǵy bir jemisi deıdi kórshiles eldiń ókilderi. О́ner mektebiniń talantty oqýshylary kelgen meımandarǵa merekelik konsert usyndy.
Oblys ortalyǵynda ótken Sabantoı mýzykalyq baǵdarlamamen, túrli oıyn konkýrstarymen, sondaı-aq sporttyq jarystarmen jalǵasty.
Abaı oblysy
