«Festıval maqsaty – týrısterdi, sezge qatysýshylardy Uly dalanyń murageri – qazaq halqynyń baı mádenıetimen tanystyrý. Is-sharalarda dástúrli baǵyttaǵy óner ıeleri, etno-folklorlyq ujymdar jáne basqa da tanymal qazirgi zamanǵy etnostyq baǵyttaǵy ártister óz ónerlerin ortaǵa salady», dedi Nur-Sultan qalalyq mádenıet basqarmasy basshysynyń orynbasary Nuran Qamzın.
Is-shara «Báıterek» monýmentiniń janynda ornalasqan Etnoaýyl aýmaǵynda ótedi. Onda segiz qanatty kıizúıler tigilip, altybaqandar ornatylady. Qolóner sheberleriniń buıymdary qoıylatyn «Sheberler aýyly», shaǵyn sáýlet nysandary jáne t.b. alańdar qurylady.
Etnoaýylda turǵyndar jáne qala qonaqtary dástúrli qolóner túrlerimen – tórt kıizúıde otandyq qolóner sheberleriniń kórme-jármeńkesi, zamanaýı ulttyq naqyshtaǵy kıim, zergerlik óner, kilem jáne keste buıymdary qoıylǵan jármeńkeni tamashalaı alady. Sonymen qatar 3 kıizúıde Y.Dúkenuly atyndaǵy halyq mýzykalyq aspaptar mýzeıiniń mýzykalyq aspaptary qoıylady. Sonymen qatar «Ańshy úıinde» halyq kásibiniń túrleri usynylady. Onda mamandar halyqqa qyran búrkit pen ańshy ıtterin qalaı ustaý kerektigi men eptiligin kórsetedi.
«Uly dala sazy» etnofestıvali 12-16 qyrkúıek aralyǵynda ótedi. Etnoaýyl saǵat 10:00-19:00 aralyǵynda ashyq bolady. Kelýshiler kóshpendi halyqtyń mádenıetimen, turmysymen tanysady, sondaı-aq sheberlik synyptaryna, ulttyq oıyndarǵa qatysa alady. Kún saıyn keshkilik konsert uıymdastyrylady. Bul is-sharalar 18:00-de bastalyp, 20:00-ge deıin jalǵasady.
