Negizgi basym baǵyttardyń biri – balalar bolashaǵynyń jarqyn bolýy. Jyl basynda jarııalanǵan Balalar jyly óte mańyzdy, durys sheshimmen aıaqtalyp otyr. Memleket basshysy 2024 jyldan bastap Ulttyq qordyń jyldyq ınvestısııalyq kirisiniń 50 paıyzyn balalar shotyna 18 jasqa deıin aldyn ala alý quqyǵynsyz aýdaryp otyrýdy usyndy. Is júzinde bul is-shara qazaqstandyqtardyń «ekonomıkalyq tólqujatyn» qalyptastyrý bolyp sanalady. Mundaı tájirıbe álemniń birqatar elinde bar jáne ol bolashaqta balalarǵa elimizdiń materıaldyq resýrstaryn paıdalanǵany úshin tólem alýǵa múmkindik beredi. Bul – qoǵamdaǵy suranysqa ıe qadamdardyń biri.
Ulttyq qordyń bolashaq urpaqqa arnalǵan qor ekeni birneshe ret aıtyldy. Bolashaq urpaq bul sheshimdi tek abstraktili kategorııa dep túsinbeı, shyn máninde, 18 jasqa tolǵan kezde belgili bir bastapqy kapıtalǵa ıe bolatynyna senimdi bolýy kerek. Qarjyny qaıda jumsaıtynyn ár jas ózi anyqtaıdy. Bilim alýǵa jumsaı ma, jyljymaıtyn múlik ala ma nemese avtokólikterge ınvestısııa quıa ma – ony ózi sheshedi.
Jalpy, Qasym-Jomart Toqaevtyń ustanymy absolıýtti pragmatızmmen, sheshimderge salmaqty kózqaraspen jáne popýlızmnen boıyn aýlaq salýymen erekshelenedi. Bul – qazirgi qıyn kezeńde eń durys strategııa.
Juldyzaı YSQAQOVA,
saıasattanýshy
