Jańadan qurylǵan Almaty qalalyq Qoǵamdyq keńestiń jumysyna jaqynda júz kún toldy. Keńes tóraǵasy Altynaı Kóbeevanyń aıtýynsha, uıymǵa belsendi azamattyq ustanymy, belgili bir máselelerdi sheshýde yqpaly bar adamdar engen. «Bılik júzege asyratyn azamattyq qoǵam ókilderiniń usynystarynyń sany artty. Búginde qoǵamdyq keńesterdiń qyzmetin aqparattyq qamtý deńgeıi men sapasy jaqsardy», deıdi keńes tóraǵasy.
Bıyl qurylǵan Qoǵamdyq keńestiń quramyna 39 adam kirgen. Onyń ishinde úkimettik emes uıymdar men BAQ ókilderinen – 20 (51,3%), bilim berý salasynan – 5 (10,2%), memlekettik organdardan – 3 (7,7%), densaýlyq saqtaý salasynan – 1 (2,6%), mádenıet jáne sporttan – 3 (7,7), bıznes qurylymdardan 7 (20,5%) adam bar.
BAQ ókilderiniń qatysýymen ótken brıfıngte Altynaı Kóbeeva III shaqyrylymdaǵy Qoǵamdyq keńestiń qyzmetine keńinen toqtaldy. «Keńes qyzmeti búginde azamattardy tolǵandyratyn máselelerdi sheshýde aýqymdy jumys atqaryp keledi. Muny naqty isterden-aq kórýge bolady. Qoǵamdyq keńes bılik pen azamattyq qoǵam arasyn baılanystyrýshy býyn retinde áreket etip, sol arqyly jurtshylyq pen bıliktiń tıimdi dıalogin quryp keledi», dep atap ótti ol.
Qoǵamdyq keńestiń bıýdjet jobasyn, onyń oryndalýy týraly esepti, strategııalyq damý josparlaryn, azamattardyń quqyqtary men bostandyqtaryn qozǵaıtyn normatıvtik-quqyqtyq aktilerdi talqylaýdan bastap, ókilettikterdiń úlken toby bar ekenin eskere otyryp, naqty jáne pándik qyzmetti qamtamasyz etý úshin bes komıssııa qurylǵan. Bul toptyń árqaısysynyń óz jaýapkershilik aımaǵy bar.
Osy ýaqytqa deıin keńes qoǵamdyq baqylaý nysandaryn paıdalana otyryp, qoǵamdyq monıtorıng, qoǵamdyq tyńdaý, qoǵamdyq saraptama, memlekettik organdardyń esepti kezeńdegi esepterin tyńdaý, 25 otyrys ótkizgen bolsa, osy basqosýlarda uzyn sany 62 másele qaralǵan. Sonymen qatar quqyqtyq aktilerge 17 qoǵamdyq monıtorıng pen 30 qoǵamdyq saraptama júrgizilipti. Jalpy, 100 kúndik jumys barysynda keńes suranysy boıynsha qalalyq basqarmalar atqarǵan jumystar men bıýdjet qarajatynyń ıgerilýi týraly 14 esep berilip, jeke jáne 77 zańdy tulǵalardan 58 ótinish, 80 suranys jiberilgen. Sondaı-aq ártúrli mekemelerge jiberilgen usynys, talap-tilekter taǵy bar.
Altynaı Kóbeevanyń aıtýynsha, jıyndarda aýqymdy máseleler de, jergilikti sıpattaǵy ózekti máseleler de talqylanady. «Atqarýshy organdar qabyldaıtyn normatıvtik-quqyqtyq aktilerge júrgizilgen monıtorıng nátıjeleri boıynsha Qoǵamdyq keńes músheleri óz qorytyndylary men usynymdaryn bul aktilerdiń turǵyndardyń negizgi bóliginiń múddesine qaıshy kelmeýin, al qalalyq qyzmetter usynatyn jáne qalyń jurtshylyqtyń talaby arasynan mámile tabý kerektigin eskere otyryp daıyndady», deıdi spıker.
Qoǵamdyq monıtorıng asa ótkir suraqtardy da qamtyǵan kórinedi. Bular – kóshe-jol jelisin damytý, qoǵamdyq kólik jumysy, turǵyn úı qurylysy, medısınalyq qyzmet kórsetý, balalar men jasóspirimder úshin sport seksııalarynyń qoljetimdiligi, turǵyn úı-kommýnaldyq sharýashylyqtaǵy reformalar, «Mindetti áleýmettik medısınalyq saqtandyrý týraly» zańyn iske asyrý máseleleri, kóliktik qyzmet kórsetý máseleleri men káriz jelileriniń jaǵdaıy, qalanyń kommýnaldyq menshigin paıdalaný, jasyl jelekterdiń jaı-kúıi jáne kútip-ustaý syndy máseleler.
Eseptik kezeńde Qoǵamdyq keńestiń kóshpeli otyrystary da uıymdastyrylyp, «Qazaqstan Respýblıkasynda qoǵamdyq keńester aptalyǵyn uıymdastyrý jáne ótkizý» tujyrymdamasy aıasynda Almatyda monıtorıngtik toptyń jumys kezdesýleri júrip jatyr.
«Biz qalanyń segiz aýdanynda 5 dıalog alańyn ótkizdik. Negizgi máselelerge – shaǵyn jáne orta bıznes baǵdarlamalaryn iske asyrý sharttaryn uıymdastyrý men jetildirý, qaladaǵy qoqystardy shyǵarý, qattaý men shyǵarýdy baqylaý, múlik ıeleriniń birlestigi jáne PT qurý úshin turǵyn úı qatynastarynyń jańa jaǵdaılarynyń problemalary, halyqtyń áleýmettik osal toptaryn memlekettik qoldaý baǵdarlamalarynyń tıimdiligin anyqtaýǵa taldaý men monıtorıng júrgizý jatady», deıdi A.Kóbeeva.
Munan bólek qalalyq deńgeıde áleýmettik qyzmet kórsetý men memlekettik basqarý salasyn sıfrlandyrý máseleleri boıynsha Parlament Májilisi jáne máslıhat depýtattarymen birge jumys kezdesýleri ótken. Mundaı basqosýlardyń arasynda Almaty qalasy boıynsha Medısınalyq-áleýmettik saraptama komıssııalarynyń qyzmetin uıymdastyrý jáne monıtorıng júrgizý jónindegi monıtorıngtik toptyń otyrystary bar. Osy is-sharalardyń qorytyndysyna sáıkes Almaty qalalyq Qoǵamdyq keńesi qala ákimdigi men Úkimet basshysy Álıhan Smaıylovqa usynystar joldady.
ALMATY
